《大話天仙》 3年前開拍，不過拍到一半就因為投資者「斷水」而停機，被迫爛尾收場。伊麵經理人林珊珊（小圖）話由於已收足片酬，所以唔追究。
FBI
被騙賀歲 伊麵替身埋尾
今年新年特別多港產賀歲片，不過要數港星卡士，年初三（ 2日）在內地上畫的《大話天仙》都唔弱。
由拍過《月光寶盒》嘅劉鎮偉執導，搵到鄭伊健、鄭中基同《甄嬛傳》女主角孫儷孭飛，更有蔡少芬、胡歌等客串，單計牌面唔差過其他賀歲片。不過 FBI收到風，近日有傳 3年前開拍的《大》片，拍到一半因為唔夠資金而爛尾，而投資一方為拍咗唔好嘥，求其搵替身補拍埋尾就推出街，搞到劉鎮偉都要發微博解話，暗示被電影公司擺上枱。
無端端「被賀歲」， FBI即刻打畀伊麵經理人林珊珊了解，珊珊話：「拍到接近完成階段，收到投資方話冇得拍喇……直到兩年幾前，知道佢哋將套戲雪藏咗。等劉鎮偉同投資方之間搞清楚，先再搞嘅。我哋當然有驚訝啦，因為實在部片上嘅時候係點，我哋從來都冇聽過，亦都冇睇過，亦都冇做過配音，究竟搞成點呢，真係唔知喇！我哋當然同劉鎮偉一樣遺憾啦，有陣時拍戲就係會有咁嘅狀況……所以以後盡量都係拍番自己公司嘅電影。（片酬收足嗎？）據調查所得，係收曬錢嘅。」珊珊眉精眼企，伊健先冇損失啫！
|
鍾意就快D Share啦！
|
|
|
