掃呢頁CODE去手機

2014年4月25日 星期五

[忽然1周 978] 林小明拒絕放生 江若琳絕路爆抑鬱 林小明,江若琳,MW,




滾熱辣

林小明拒絕放生 江若琳絕路爆抑鬱

與經理人公司寰宇的十年死約下月正式完結,江若琳自稱「一毫子收入都未分過」,向公司發律師信提出解約。十年白做得個吉,皆因公司連電影換票券的印刷費都要入埋江若琳數。小數怕長計,令她現時還倒欠公司過百萬。孭落成身債,加上前路茫茫,搞到她爆抑鬱病。

為了回復自由身,江若琳隨時要賣屋打官司。不過寰宇老闆林小明一於奉陪到底,更鬧江若琳扮可憐博同情:「要解約唔使講呢啲。肯賠錢咪解約囉!」林小明拒絕放生,江若琳則透過 WhatsApp回應:「十年來遇到過嘅委屈都捱過咗!」句句有骨。











上月尾,江若琳向公司發律師信要求解約,希望可以於 5月 2日,十年死約正式完結後回復自由身。不過老闆林小明則堅稱公司擁有延長合約 5年的優先權。雙方勢成水火,現時他們交由各自律師處理合約糾紛,隨時要對簿公堂。

WhatsApp回應

江若琳透過 WhatsApp回覆本刊,指捱過了不少辛酸及風浪,現在會以平常心面對,不過對於抑鬱症一事,她卻拒絕回應。

衰事接二連三

合約糾紛不特止,江若琳婆婆近日因病入院,周一( 21日),她在 instagram宣洩傷痛。

加人工有阻滯

有「寰宇一姐」之稱的江若琳,表面風光,揚言十年冇收入的她,除向友人呻公司連祝捷會的蛋糕錢都同佢計外,據知她連電影換票券的費用都要孭上身。知情人士說:「 08年, Elanne(江若琳英文名)孭飛嗰套《嚇死你》上畫,佢當時問老闆攞咗廿張換票券(電影贈券),第二日公司就有人好快手俾咗啲飛,連帶嗰廿張飛嘅價值同印刷費嘅收據俾 Elanne。其實嗰度都係千零蚊, Elanne冇諗過呢啲錢都要計囉。」

當時江若琳還是新人惟有死忍。不過隨著知名度愈來愈高,她去年終於大膽向林小明要求加人工。知情人士說:「公司不嬲都抽佢六成傭,上年 Elanne問老闆可唔可以抽少 5%,老闆見佢聽話,答應加人工!點知到簽約嗰陣, Elanne見抽傭條款根本冇變過,咪打俾老闆,點知老闆話『飲醉酒,冇講過』。」

前年江若琳拍攝電影《高舉愛》雖獲影後提名,但拍攝時被啞鈴擊中受傷。早前她在拍電視劇《巾幗大將軍》時,又意外墮馬,捱得一身傷。

換票券計錢

08年電影《嚇死你》上映,女主角江若琳戮力宣傳,不過有指換票券要入佢數,但林小明卻否認此事。

買車代步

入行多年,江若琳被拍得多次睇車,據知她早前以 30萬買入 Audi代步。

諗過買樓

據知寰宇近年不時提出借首期俾江若琳買樓。前年,她手拎價值兩萬元的 Celine手袋去杏花邨睇樓,但最終並無置業。

得個做字

江若琳入行十年,電視劇及電影的產量多達數十套,不過記者發現其八成以上的作品屬寰宇投資。若以一般新人簽約行規六四分賬,公司佔 6成,江佔 4成,她也分到 920萬,十年平均每月約 9萬多收入。但林小明聲言用了二億捧江,當然填唔到個氹!

電影

《男兒本色》、《同門》等 15部電影,不過當中有 12部屬寰宇投資,行內估計她片酬可達 30萬一部,亦即帳面收入有 400萬。

電視

曾拍過《洪武三十二》等兩部大台電視劇,收入有限。但她出道至今共拍過八部內地劇,其中她稱《巾幗大將軍》有 10萬一集劇酬,保守估計有 600萬收入。

代言廣告

廣告商向來水喉大開,江若琳出道至今擔任 Neutrogena等三個品牌代言人,合共有 300萬酬勞。

活動

大台女藝人閒閒哋都話收幾萬蚊出席商場騷,估計江若琳收 6萬蚊一次,出道十年照計出席過 100個騷,賺 1千萬走唔甩。

合共 2,300萬

解約糾紛

寰宇旗下藝人不多,不過大部分藝人解約時都是不歡而散,要搵前林太趙雪英求救。

李彩華

有指有人於 07年叫阿 Rain做合約以外的事,阿 Rain拒絕,令工作量驟減。當時和林小明辦理離婚的趙雪英,將阿 Rain解約要求列入離婚協議中,才令阿 Rain得以逃出生天。

梁俊一

在不少電影做大茄的梁俊一, 08年透過蔡少芬及王祖藍,搵趙雪英幫手,希望與寰宇提早解約。雖然當時趙在公司被架空並無實權,但她仍擔任軍師幫他成功解約。

睇醫生減壓

人工冇得加,兼夾所有濕碎開支都要計數,令初入行時已向公司借了 300萬的江若琳,即使再捱更抵夜拍戲也無法填數,現時還倒欠公司 150萬。知情人士說:「佢公司好得意,呢幾年仲成日叫 Elanne買樓,話可以再借多 200萬俾佢做首期,其實無非想箍死佢。」

舊數未清,新數又來,苦無對策的江若琳最終患上抑鬱,試過日日匿埋屋企爆喊,要食藥鎮定情緒。「佢想逃出生天,咪搵律師搞囉,如果應付唔到律師費,佢會考慮賣咗屋企人買落、依家自己住緊嗰層北角樓應急。」

03年時,趙雪英簽江若琳為旗下藝人,不過 07年時江若琳被指捲入林小明的婚變,趙雪英與她劃清界線。圖片

多年來,江若琳與林小明的關係不錯,江開新碟發布會,林亦到場支持。如今二人交惡,罵戰不斷。

林小明:叫土豪俾錢解約

對於換票券都要江若琳找數一事,記者搵過寰宇老闆林小明,他說:「我真係唔知!咁多年前嘅事。換票券唔會收佢錢,《嚇死你》成七年前嘅事,七年嚟都冇不滿,依家先挖出嚟講?」他承認江若琳有嗌加人工,「佢想 extend時(延長五年生約合約)提升個分帳比例,依家佢都未續約,佢又唔認同 extend,講乜都冇意義。」

至於江若琳被逼到抑鬱,林小明則說:「我唔知佢有(抑鬱病),其實要解約唔使講呢啲。(唔會放生佢?)無啦啦我做乜要解約,要解約咪傾囉,仲有五年,咪計數囉,我要維護合約精神。(盛傳江若琳有土豪男友照住?)如果真係有,叫土豪俾錢解約,我 anytime open傾,我仍然同佢接 job,只係佢唔聽電話。」

續約戰爆發後江若琳足不出戶。對於林小明種種指控,她只透過 WhatsApp回應:「十年來我遇到過嘅風浪、辛酸同委屈,我都一一捱過啦……我交俾律師處理,多謝關心。」另周二晚林小明出席活動時,再寸爆江若琳,叫佢「咪扮可憐」。

趙雪英:兩個都唔幫

前林太趙雪英不相信江若琳十年來冇糧出,但同時她也強調林小明多次對自己「出爾反爾」,更指:「一早知佢兩個會反面!」

再數前夫

林小明承諾江若琳加人工但冇下文,趙雪英得悉後不覺驚訝,皆因她指林小明多次對她「講咗唔算數」,更講出以下事例力證有人出爾反爾。

轉身家

「 05年嗰陣,寰宇嘅會計陳先生發現林小明轉走我所有資產,當時我哋三個人三口六面喺房傾。陳生叫林小明轉返啲資產俾我,林小明當時答應還俾我,我等了半年,林小明都唔肯簽名俾返我,所以我先提出離婚,最終要打官司。」

中港牌

《蘋果日報》圖片

「明明個中港車牌係我嘅,佢都可以 cut咗,搞到我喺內地被人拉。講好咗又唔俾,搞到我要打官司拎返。」

仔女信用卡

「離婚時,寫明仔女嘅信用卡,每人每個月有一定嘅簽帳額,由林生負責找數,不過仔女試過幾次俾人 cut卡,因為林生冇找數,搞到班仔女好唔開心!」

謝偉俊:江若琳有機會違約

林小明稱寰宇可以行使合約「延續權」,若果江若琳唔簽餘下五年合約,分分鐘出事。律師謝偉俊說:「江若琳有機會違約,因為寰宇有行使延續合約權,不過都要視乎合約字眼先可作準。」至於違約的賠償,謝偉俊指要計算合約上的損失,以「賺幾多錢為指標」,多數會參考過往五年的平均數,或者公司已經幫藝人接了的工作,因她違約而未能完成所造成的損失。



鍾意就快D Share啦!