2014年6月13日 星期五

[忽然1周 985] 金剛女 陳蕊蕊 34E寫真開波 金剛:佢 body係我嘅 陳蕊蕊,金剛,BKD_S,MW,




娛樂喧

金剛女 34E寫真開波 金剛:佢 body係我嘅

書展將至,𡃁模寫真陸續「開波」。今年黃榕、仙樂都、「藍莓」劉俐等中堅分子繼續落場,另外又有 Ashina與 AD2新女谷胸陪跑,在暑假比拼球技,榨乾宅男血汗錢。

至於近年被金剛私有化的「柑桔」陳蕊蕊,今年亦加入寫真戰圈。難得金剛唔介意將女友的 34E噴血身材與巴打分享,金剛仲得戚話:「佢 body係我嘅!唔擘大個髀就 OK」嘩!金剛條底線咁低,蕊蕊可以去到盡









金剛去年被本刊踢爆與陳蕊蕊拍拖後,兩人感情發展迅速,今年初更開始同居。雖然金剛成功將陳蕊蕊私有化,不過陳蕊蕊對外仍是有價有市,作為歌手的她,除了 keep住推出單曲,每逢夏天都有出版商打她主意,希望她大曬 34E身材吸金。

本周一晚上,金剛與蕊蕊拍拖行超市買餸,買足一小時才離開,然後返家玩「煮飯仔」,非常甜蜜!

西瓜胸殺「野獸」

寫真封面有句英文:「美女殺死野獸」(意譯),露出西瓜胸嘅蕊蕊梗係美女啦。咁金剛咪即係野獸?

「幾年前,蕊蕊同一班『味之天使』夾埋出過本寫真,不過當時影得麻麻,搞到佢之後對推出個人寫真都十五十六。一來擔心效果唔好,二來驚男朋友唔鍾意。」知情者說:「今年又有人搵佢出寫真,金剛知道咗不但贊成,仲鼓勵佢去盡啲。蕊蕊見男友咁支持,咪決心豁出去,所以今次不但影內衣,連有 SM感覺嘅衫佢都肯影。」

醃死宅男

寫真年年有,今年新舊靚女交戰,舊乳新波共冶一爐。宅男們,儲定鼻血未?

黃榕鋼管舞功 舊乳再現

書名:待定

拍攝地點:香港

頁數: 128頁

售價:待定

期待度:★★★

賣點:已經第 4年出寫真嘅黃榕( Gloria),今年玩鋼管舞,亦會背部全裸影人體彩繪, Gloria仲公開減肥心得㖭。

仙樂都家鄉埋齋

書名:待定

拍攝地點:布吉

頁數: 128頁

售價:大約$128

期待度:★★★★

賣點:今次是中泰混血兒仙樂都(吳堯堯)最後一炮寫真:「希望可以用寫真帶 fans返我家鄉,透過旅遊寫真形式等大家了解我多啲!」

藍莓戶外全裸

書名:《 Heartbeat Recording》(暫名)

拍攝地點:布吉

頁數: 128頁

售價:大約$138

期待度:★★★★★

賣點:擁有 34C索身材嘅「藍莓」劉俐,今年推出首本個人寫真集。除了到泰國取景,她更會戶外全裸。寫真是 A5 size,宅男睇得更真。

AD2巨胸女俠 新波進場

書名:《 Super Sexy Hero 2》

拍攝地點:香港

頁數: 128頁

售價:大約$118

期待度:★★★★

賣點: AD2除原有 Amy外,近日加入 18歲新成員 Angie,兩人連同另外 7名靚女,齊齊變身性感英雌。 Amy拍攝時更豪放到乳貼都唔黐。

Ashina校服誘惑

書名:《 School Girl》

拍攝地點:香港

頁數: 128頁

售價:大約$128

期待度:★★★

賣點:由 Ashina(郭奕芯), Cherry(嚴詠彤)及 Siu Yan(龍欣怡)展示初熟胴體,全書大玩校服誘惑。

金剛監場睇相

金剛雖然對女友拍寫真開綠燈,不過為免女友蝕底,他都親自去監場睇過,覺得冇問題至放心。「拍攝第一日,金剛已經去咗監場啦。佢睇完啲相,對攝影師都有信心。不過蕊蕊事後同佢講,話佢喺度自己會緊張,金剛至好少嚟。」

金剛與陳蕊蕊周一( 9日)在沙田拍拖行超市,對女友谷胸拍寫真全力支持,指「係好嘢先俾人睇」,所以跟大家分享女友 body冇問題,更得戚話班宅男「始終係齋睇」,自己至係真正擁有喎。

陳蕊蕊的寫真集厚約 128頁,在深圳酒店取景,除了有 SM內衣,也有迫爆泳衣照,售約$128。

陳蕊蕊練得好腰功,大擺 S甫士。

2月尾,金剛拖住陳蕊蕊睇梳化,精靈嘅金剛仲好快發現記者。兩人連隨落埋 order,勁有夫妻 feel。

唔擘髀就 OK

記:記者金:金剛

記:蕊蕊拍寫真前,有冇得你批准?

金:唔好話批准咁嚴重。佢做嘢,我唔會阻住佢囉。我淨係同佢講:「唔擘大個髀就 OK!」我都驚佢(蕊蕊)太介意我會點諗,我覺得做得好就 OK。

記:你有冇睇過相?

金:睇過啲,影得幾好。

記:部分有 SM feel喎?

金:係唔同嘅 style啫。

記:你唔介意女朋友俾人睇蝕?

金:哎呀!係好嘢先俾人睇,係咪先!既然大家都想睇,我覺得分享嚇都 OK嘅,因為始終係齋睇!佢 body係我嘅,我點會介意!

記:你去監場?

金:冇話監場,咁啱車佢去拍攝現場啫。

記:即係有上去睇啦?

金:都係差唔多影完至去到。(有冇現場睇住點影?)有睇,不過我都驚好似俾壓力佢咁。

記:你好信任佢?

金:信任。我對佢不嬲都放心。

陳蕊蕊:我仲介意過金剛

陳蕊蕊之前同其他味之天使拍住出過《 Taste of Angels》寫真(下),不過啲相被人彈 pose唔靚,又鬆鬱矇。

問到是否性感無極限,陳蕊蕊話:「其實我仲介意過佢(金剛)。攝影師影我著內衣褲,我已經好尷尬。其實都講咗好多年出寫真,當年啱啱做完天使,想隔一段時間,等大家認同我歌手身份先。今年我係用歌手身份拍寫真,唔想同 model寫真太似,希望大家唔係只記得我叫『柑桔』。」擺明不屑同𡃁模平起平坐。

金剛與阿蕊蕊行超市行足一粒鐘,訪問後便回家煮飯仔,鬼咁 sweet!咁識冧男友,唔怪得金剛放心女友出噴血寫真

唔靠大台

今年 30歲嘅陳蕊蕊, 04年加入大台嘅舞蹈藝員訓練班,捱咗五年之後,靠在《美女廚房》飾演柑桔開始有知名度。 09年尾陳蕊蕊離開大台,轉為歌手。去年陳蕊蕊和金剛撻著,令她人氣更盛。

小春識貨

06年,陳蕊蕊出騷為小春伴舞,當時小春涉嫌胸襲陳蕊蕊,事後她向傳媒哭訴。

拍住 Liddy

陳蕊蕊曾經同「彭順小三」 Liddy,一同擔任「 Sing之天使」,兩人後來再喺電視電影《南華夢飛翔》合作。

《勁歌》獻唱

近年陳蕊蕊拒簽大台,成為前歌星漢洋旗下歌手,曾以歌手身份在《勁歌金曲》獻唱,算是吐氣揚眉。



鍾意就快D Share啦!
Related Posts Plugin for WordPress, Blogger...