掃呢頁CODE去手機

2014年6月19日 星期四

[壹週刊 1267] 14K毒梟 周圍收𡃁 14K,政治時事,M1,




爆壹爆

14K毒梟 周圍收𡃁

上期《壹》仔報導 14K最惡大佬華喜餐壽酒,爆哥嗰晚都有去,仲見到同樣係 14K出身嘅 Teddy洪漢義到場,佢當晚喺酒樓入面滿場飛,仲周圍「收𡃁」喎,爆哥以為佢又重操故業,於是上前八一八,佢話已經將華喜個仔收歸旗下,仲講明華喜係佢目標之一喎,嘩!唔通有大食大, Teddy收𡃁收到咁明目張膽!

原來信咗基督教嘅洪漢義,計劃喺佢以前開嘅 348 Disco原址開教會,佢話「專俾黑社會信教」, Teddy同爆哥呻,話叫黑社會過底信主,難過登天,所以為咗叫佢哋返教會, Teddy絞盡腦汁吸引班黑社會,佢話到時會將個教會開到好似演唱會咁樣,以視聽效果吸引批江湖人士。

今年六十四歲嘅洪漢義好巴閉,七十年代係香港最大毒梟,身家數以億計,八四年衰販毒罪被判監廿年;佢大佬佐治洪依家仲係上市公司主席。 Teddy最出位係搞 348 Disco,爆哥當年都成日去 fing頭,場內吸毒場外打交幾乎晚晚有,話係當年罪惡溫床絕對冇錯。

世界盃賭波莊家集體逃亡

世界盃又開鑼,早幾日爆哥去咗南灣,一個富豪嘅獨立屋攬女睇波,平時佢有賭開外圍波,每注過千萬上落,佢同爆哥講咗一個賭外圍嘅有趣現象,原來香港班外圍大莊家有一個傳統,每逢世界盃就唔喺香港,佢哋會集體包私人飛機外遊,相信讀者同爆哥一樣,腦裡即時打個問號,乜唔係應該留番喺香港睇住個市咩?富豪話俾爆哥知,查實世界盃前夕,通常都係大陸同香港警方出動嘅時候,日日冚幾個外圍賭波集團交數,好似上個禮拜,香港 O記聯同大陸公安,拘捕歷來最大嘅跨境賭波集團,檢獲有史以嚟最高紀錄七億元波纜,所以世界盃一開鑼,就只好集體外遊。

話時話,賭波莊家最出名係 14K「賭波之父」虎兒,同埋佢老死陳明華,佢哋聯同其他莊家,上屆世界盃去咗英國遊埠,今年聽聞就揀去柬埔寨抖暑,順便睇嚇有冇得搞賭場,批莊家會離岸開工,遙控手下收注,而家一屆世界盃,莊家閒閒哋收過百億波纜,佢哋仲可以一路歎世界㖭。

防空洞變停屍間

話說爆哥有幾個護士女友,得閒鍾意同佢哋摸酒杯底八嚇醫院秘聞,有一晚爆哥就嚟瞓覺,聽到喺瑪麗醫院急症室做嘅 DaDa𠲖𠲖吟吟,個樣好苦惱口噏噏話「擴建好唔好呢」,爆哥以為佢想整容,仲想安慰嚇 DaDa,點知佢原來心掛掛公事,佢爆料話,原來瑪麗醫院停屍間近年成日爆棚,醫院頭痕搵地方存放屍體,但係薄扶林一帶寸金尺土,豪宅林立,想搵多塊地做停屍間都難。

聽聞瑪麗醫院同緊路政署傾,將薄扶林嘅防空洞,連同荒廢嘅軍用設施,計劃改建成停屍間。 DaDa話反正都係荒廢,不如物盡其用啦,爆哥平日好鍾意行黃泥湧峽徑同大潭郊野公園,其實防空洞大多位於郊野公園內,萬一停屍間設置喺行山徑附近,到時爆哥咪有機會與鬼同行?

爆哥乜料

金融界撈家,穿梭黑白政商界,朋友遍布旺角至中環,每星期都八到唔同料,同《壹》仔讀者過嚇癮!



鍾意就快D Share啦!