靠自己入行的 Wesley，勤力操肌，望以最佳狀態開工。
探熱針
趙雅芝碩士仔操肌入行
12年陪住靚媽趙雅芝出席慧妍雅集三十周年晚會的「星二代」 Wesley黃愷傑，其時已預告會加入娛樂圈。
父親是型佬黃錦燊，媽咪趙雅芝時至今日，在國內人氣依然高企，但 Wesley唔想靠家蔭，三年前，完全不懂普通話的他，隻身飛到北京電影學院讀碩士課程，又努力操肌練大隻，密謀做打仔，自己在娛圈打出一番事業。
同學踢爆
自小便對娛樂圈有興趣的 Wesley黃愷傑，是趙雅芝跟第二任丈夫黃錦燊所生，在美國南加州大學畢業的他，雖然有個紅足半世紀的媽咪，但在北京電影學院進修期間，一直對「星二代」身份秘而不宣，免得被同學誤會他「子憑母貴」。
「 Wesley好低調，從來唔會主動話趙雅芝係佢媽咪。去北京讀書，佢一句普通話都唔識，邊讀邊學，唔提自己背景，係怕俾人覺得佢靠關係，後來有同學問起，先冇得唔認。」知情者說。
據了解， Wesley當初向父母提出入行時，趙雅芝唯一要求他必須完成大學課程，父親黃錦燊則採取開放態度，無條件支持。
「趙雅芝從來唔介紹工作俾個仔，就算同圈中人有聚會，都唔會刻意帶 Wesley出嚟。之前 Wesley第一部戲喺內地做首映，得老豆撐場，因為趙雅芝話唔想俾壓力啲後生，覺得個仔最好靠自己，經歷過先識珍惜。 Wesley拍咗四部戲，全部經學校老師推薦，搭上搭先有機會。」
接媽咪機
早前， Wesley有機會與前輩林保怡合作，到泰國拍新戲《按摩師》，趁有假期，返港一行。陪爹哋食 lunch，又到機場接媽咪機做孝順仔。
上星期日（六月八日）下午四時，趙雅芝出席活動後由寧波返港，大批粉絲早已在機場守候，同老豆一齊到場接機的 Wesley，第一時間上前幫媽咪推行李，等趙雅芝放心同 fans傾偈。
「趙雅芝呢十年其實只係拍咗一套劇，但以前套《白娘子》不斷重播，仲有《上海灘》，內地好多廣告客都鍾意搵佢做代言，試過忙到一個月得幾日喺香港，一家人唔係成日見面，所以佢老公有時會陪佢一齊飛返內地開工。」知情者說。
做打仔
現年 27歲的黃愷傑（ Wesley），在南加州大學經濟系畢業後，三年前再到北京電影學院攻讀碩士課程，未正式入行，已先後拍過四部電影包括《對不起，我愛你》、《不朽的時光》、以及《珍珠島的天空》和《按摩師》。想靠實力做打仔的 Wesley，兩年前已經帶埋拍拖七年的女友 Denise出席活動，大方公開戀情。
拍戲受傷
想靠自己在娛樂圈打出名堂， Wesley冇偷懶，上週到旺角跟師父 Eddie學打拳，因為要兼顧返學和拍戲，斷斷續續學了一年的他，要爭取時間，加緊操練。
對於接拍台灣電影《珍珠島的天空》因為唔用替身以致受傷， Wesley接受訪問時表示媽咪趙雅芝對此未有太大反應。
「媽咪冇話支唔支持，自己鍾意就可以，其實由細到大都有 keep住做運動，唔係因為入行先特登去操。」
入行唔靠父母，但 Wesley指媽咪好多時都有俾意見。「我想靠自己努力，雖然佢哋好少介紹人俾我識，但一定會俾意見。」
美魔女
憑《上海灘》走紅的趙雅芝，是名副其實美魔女始祖，當年二十六歲仍可飾演少女的她，到近年出席活動做美容代言人，依然 keep住樣貌身形，靚足四十年。
靚媽撐
星二代雖然入行快人一步，但試問圈中有幾多個謝霆鋒？要有樣有實力又要有運行，天時地利人和缺一不可。
黃淑儀囝囝
黃淑儀跟第二任老公所生的細仔徐肇平，早前亮相媽咪的飲食節目《吾淑吾食》做特別嘉賓被網民大讚靚仔。在加拿大 Vancouver Film School就讀電影的他，在溫哥華已經開始做舞台劇及幕後工作，有指 GiGi姐亦有意幫細仔在香港開路入娛圈。
|
鍾意就快D Share啦！
|
|
|
