周麗淇寄望憑《衞子夫》攻內地市場，卻被林峯拖累，等了大半年，仍未有內地電視台購入播放。
探熱針
播映無期 內地失守 林峯新劇冰封
林峯周麗淇孭飛， nowTV投資的內地劇《大漢賢後衞子夫》，去年五月在橫店開機，至今起貨大半年，仍未有內地電視台睇啱出資買播映權，為此，無綫原計劃三月在高清台播的安排，亦被迫延期。
據知，林峯之前與葉璿合作的《紫釵奇緣》在內地收視不理想，令他人氣失守；近日投資者即使在上海電視節繼續 sell，劇集亦未有被當成重點推介，不樂觀！
一肚氣
由 nowTV與華策影視合作的內地劇《大漢賢後衞子夫》，投資超過半億，有無綫過檔的王牌監製劉家豪、梅小青操刀，但作品先後經過兩輪內地電視節推介，至今仍無人問津，劇集播出無期。
「小青姐同家豪哥過檔係威係勢，拍呢套《大漢賢後衞子夫》進軍大陸市場， now投資咗唔少錢，仲搞掂樂易玲，放林峯俾期接拍，大家對套劇好大期望，無諗過 sell唔出。」知情者說。
據了解，當初為滿足無綫一哥林峯要求，投資方低聲下氣配合，如今賠了夫人又折兵，有份俾錢的華策影視，難免一肚氣。
「林峯除咗要收八百萬，其他條件都好辣，好似埋位三個月，佢住橫店頂級酒店貴賓樓，跟佢嘅助手髮型化妝要住獨立房間，連女友吳千語嚟探班，機票酒店住宿都開埋公數。」
大頭痕
在林峯身上花了一大筆，但近年只顧拍拖的他，在國內人氣已逐漸失守。
「林峯開工帶埋 BB喺橫店片場拍拖，喺內地都有傳媒報導，話佢唔夠專業，加上之前同葉璿套《紫釵奇緣》收視好差，電視台唔想血本無歸，而家買片比早兩年手緊咗好多。」一位內地製作人說。
劇集播映無期，投資半億隨時渣都冇！ nowTV十分頭痛。
「套劇舊年八月煞科， now嗰邊同無綫有共識，計劃好今年三月安排喺無綫高清台播，而家因為內地未出街，香港幾時播都未知。」
就劇集延期播出， nowTV製作部副總經理梅小青直認《大漢賢後衞子夫》未能三月播出。
「內地電視台都未播，咁點會三月喺無綫做，你話出年三月我就唔敢講！」對於劇集究竟會在內地哪電視台播，她卻顯得迴避。「呢個唔方便透露，等宣傳整好曬先會公布。」梅小青說。
唔一定掂
國內市場大，機會多，唔少香港演員北上吸金，不過唔係個個掂，只顧賺快錢，企唔住腳的大有人在。
|
鍾意就快D Share啦！
|
|
|
