掃呢頁CODE去手機

2014年7月11日 星期五

[忽然1周 989] 千語 BB拍戲發老脾 林峯仆入離島做阿四 千語,吳千語,MW,




5/7 入坪洲陪 B

上周六,林峯被吳千語急 call入坪洲,陪她拍戲。兩人晚上七時步出碼頭, BB全程講電話懶理記者,林峯就笑曬,似乎 BB船上發功,冧得林峯咁開心。

娛樂喧

千語 BB拍戲發老脾 林峯仆入離島做阿四

林峯自 12年被吳千語征服後,昔日工作狂的他,變得萬事以千語 BB為先。

上周六 BB在坪洲拍新片《青春鬥》外景發老脾,她一聲令下,有錢有地位的林峯亦要仆入坪洲湊 BB放工兼做外賣仔。為愛情,公子都可以變阿四!

為了爭取更多時間湊千語 BB,林峯就算臨近與大台約滿亦唔著緊,少工作多陪女。樂易玲一直對峯語戀林峯祝福,林峯滿約在即, BB於是力說男友離巢。雖然有林峯會自組公司,現時據聞好大機會連經理人約亦簽埋俾英皇。能夠全面掌控林峯,呢個 BB一啲都唔簡單。







上周六( 5日),吳千語為新戲《青春鬥》到坪洲開工,一向被林峯寵慣的千語 BB,當日倒塔咁早開工。在烈日當空,三十幾度高溫下,千語 BB心情煩躁。加上一對「頂趾鞋」著得 BB唔舒服,佢全日黑面示人。未埋位時,幕後人員目擊,千語 BB不停打電話俾林峯,軟硬兼施。

「千語嗰日勁躁,猛打俾男友呻,到咗下午四點幾,就見林峯隻身坐船嚟坪洲𠱁女友。千語埋位嗰陣,佢就行埋一邊罰企、陪曬個幾鐘,但千語依然黑曬面,之後佢哋搭黃昏六點十五分船離開。」

去年林峯細佬林逸洺大學畢業,林逸洺只係 post自己同林峯及堂姐林夏薇合照,當時已傳林逸洺唔 like有份觀禮的吳千語。後來林逸洺再在微博留言,話自己也要買粉絲,明寸冇代表作、但微博粉絲逾 600萬的 BB。

睇實女友

吳千語近日拍攝電影《青春鬥》,同內地靚仔男星徐正曦有不少感情戲,難怪林峯要睇實女友。

記者收到風在中環碼頭守候,半小時後林峯伴住煲電話粥的千語 BB落船。林峯發現記者守候笑笑口,千語 BB卻板著臉。

問到林峯仆入坪洲冧女,他冧爆話:「唔係搭呢班船就係下班。(係咪去探 BB班呀?)係呀、係呀!我又得閒。(咁熱怕唔怕 BB辛苦呀?)今日都好熱呀……哈哈……」身旁的千語 BB未有搭嘴,只一邊講電話一邊指揮助手及林峯行左行右。林峯上了千語 BB的車後,便到跑馬地的彭慶記買外賣,最後返回兩人金櫻閣愛巢開飯、睇波直落。

BB發難

BB當日著咗對「頂趾鞋」,對腳唔舒服,搞到要踩踭行,心情躁爆。之後佢仲用手篤助手搵車,霸氣盡現。

明星風範

兩人之後到跑馬地買外賣。在食肆內,一直面燶燶嘅吳千語終於除低副黑超,林峯就負責點餸同俾錢。

公子阿四

等了十多分鐘,吳千語一馬當先離開食肆。而平日俾人照顧慣嘅林峯,就負責攞外賣,為女友做阿四。

左右林峯續約

廿四孝男友林峯,除了經濟上全力支持女友,連續約決定都受 BB左右。去年中,樂易玲已多次與林峯傾談續約,但林峯對續約一事卻愛理不理,事關 BB一直意見多多。據知今個月他將約滿,但至今還未與大台續約。

「大台高層都冇一個人鍾意林峯同千語 BB拍拖,覺得有人當正林峯提款機,仲勸過佢對呢段感情唔好太認真。吳千語知道就梗係唔高興其實樂易玲為咗同林峯續約已多次讓步,不但加薪 80%,仲俾佢一年只拍一劇。林峯都心鬱,不過 BB就猛落嘴頭,勸佢趁後生往外闖,唔使咁辛苦。英皇高層吳雨知道後好積極同林峯傾,聽講都傾得七七八八!」知情者說。

林峯為了睇住貪玩 BB,去年 8月在內地拍竣《衞子夫》後,已經暫停接拍內地劇。 5月他為大台拍竣《使徒行者》,之後一直放長假,間中只做快靚正的登台活動及巡唱,實行陪實吳千語。

雖然得唔到林家上下認同,甚至惹大台反感,但林峯仍多次為千語 BB護航,更甘願為 BB做阿四,呢個野蠻女友真是犀飛利!

雖然樂易玲一手捧紅林峯,但在千語 BB發功之下,林峯和大台續約機會大減,反而因與吳雨私交甚篤,改簽英皇機會大。

林峯在 5月拍畢大台新劇《使徒行者》,呢套隨時係佢喺大台最後一套劇。

星級老婆奴

因為愛才會怕,娛樂圈亦有不少男星甘於做老婆奴、女友奴的例子。

張智霖 收追魂 call

靚靚對丈夫、兒子管束多多, Chilam亦直認不諱,更大爆從前半夜經常接老婆追魂 call,又自言為怕老婆,所以多爛玩都會有分寸。

陳小春捱獅子吼

2012年陳小春有小三,老婆應采兒即時在微博當眾警告小三,若再搞她老公,定必公開對方名字。事後小春自爆:「我老婆火到時,就係少林寺獅子吼,唔使動手,一出聲我就嚇親。」



鍾意就快D Share啦!