掃呢頁CODE去手機

2014年7月10日 星期四

[壹週刊 1270] 林嶺東玩命 錢嘉樂劈炮 林嶺東,錢嘉樂,M1,




電影《迷城》開拍唔夠一個月,連環有演員出意外,日前輪到古天樂駕駛快艇失控撞船,雙腳受傷。

探熱針

林嶺東玩命 錢嘉樂劈炮

林嶺東出山執導的新片《迷城》,開工唔夠一個月,連環發生意外。

主角余文樂拍飛車戲率先撞爆鼻,五日後,古天樂的替身在葵湧碼頭試戲時被車撞到,頭和盆骨重創,要送入深切治療部。上週,終於輪到古天樂,揸快艇時失控撞船傷腳。

據知,鍾意求真又好火氣的林導,拍攝危險場面經常不按動作指導要求,罔顧安全,令意外頻生,因而與動作組「錢家班」(錢嘉樂班底)多次拗撬。日前,「錢家班」亦正式劈炮。

余文樂堅撞

在戲中飾演兩兄弟的余文樂和古天樂,均有不少打鬥和飛車追逐場面要上陣。電影公司用「錢家班」負責動作,但另一邊廂,導演林嶺東又安插「自己人」在場插手。

「導演自己搵咗個前輩級嘅動作指導嚟幫手,因為大家唔同年代,對好多問題睇法都有出入,導演又聽曬個前輩講話,好多要做安全措施嘅地方都唔做,佢哋仲話以前啲人都係咁撞埋去,最後咪出事囉。」劇組一名工作人員透露。

古天樂腳傷未癒又再開工,當日撞完船,工作人員替他洗傷口,古仔一臉痛楚。

原本由錢嘉樂的「錢家班」擔任電影動作指導,但接二連三發生意外後,「錢家班」便向電影公司劈炮。

撞完船,古仔埋位拍攝被人追打鏡頭,動作場面一個接一個。

古天樂與余文樂在電影記者會上連環發炮,余文樂明寸林嶺東(中間戴帽)導演唔係拍緊戲,係拍紀錄片,拍斬人戲要用真刀。

劇組接二連三發生意外,同林嶺東意見相左的「錢家班」,最終向電影公司請辭。「嘉樂仔講到明,拍動作場面嗰陣如果覺得有危險,即使只係萬分之一機會出事,都應該嗌停,但導演好堅持佢自己嗰套,大家嘅分歧太大,冇可能繼續合作。」

早前,劇組在九龍灣拍飛車場面,余文樂被飾演黑幫大佬的張孝全追殺,揸住大貨車的樂仔與兩架私家車發生碰撞,但原來是「堅撞」,自己埋位的余文樂即時「爆缸」。據了解,因為車內並無裝置防滾架,才導致余文樂受傷。

拒與時並進

導演玩命!古天樂和余文樂早前出席電影記者會時,忍唔住輪流寸爆林嶺東。「我真心覺得,導演唔係拍緊戲㗎,係拍緊紀錄片,本來話用道具刀,但到拍嘅前一晚就同我講用真刀,我都嚇一跳。」余文樂說。

在旁的古天樂亦加把口,重提撞船受傷經過。「隻快艇幾犀利,揸揸嚇,連個軚盤都甩埋,跟住我要撞埋另一隻船度先停到,咁就整傷隻腳!」

林嶺東作風向來追求逼真,嚇嚇 real take,拒與時並進,搞到演員和做特技動作的工作人員頻頻受傷,他絕對要負上最大責任。

開工第一日,余文樂拍攝撞車戲時,因劇組未有替他安裝防滾架,結果撞「爆缸」。

早前劇組在葵湧 8號碼頭試戲,古天樂的替身因被私家車撞倒,以致頭和盤骨重傷,要送入 ICU,事後有警員到場調查。

冇人道

活躍於 8、 90年代影圈的林嶺東,無綫第三期藝員訓練班出身,同期同學包括:周潤發、盧海鵬、吳孟達等。

82年,林嶺東由加拿大回流香港,首次執導電影《陰陽錯》,大獲好評,最擅長拍動作片的他,出名對演員苛刻嚴厲,為求逼真,經常假戲真做。 87年的代表作《監獄風雲》,更被指虐待演員。有指他曾將一班演員困在一個監倉裡,幾日幾夜,食又嗰度屙又喺度,十分不人道。



鍾意就快D Share啦!