掃呢頁CODE去手機

2014年8月21日 星期四

[壹週刊 1276 財經] 股海浮沉 兄弟轉戰雞蛋仔 M1,




自拍檔 Eric退股後,細佬阿銓(左)及 Calvin兩兄弟頂硬上,細佬阿銓

負責鋪頭營運, Calvin則全力搵鋪,務求年底前開多一間分店。

壹盤生意

股海浮沉 兄弟轉戰雞蛋仔

股市跟商場,是兩個完全不同的世界。三十一歲的譚瑋叡(音:銳)( Calvin)和弟弟譚瑋銓,八年來都是炒期指,生活如坐過山車。他們試過賺過千萬,亦因一場金融海嘯令身家大縮水。去年恒指橫行,兩人無啖好食,細佬阿銓厭倦了望天打卦的日子,於是與大哥及老死 Eric拍住上,三人由股海轉戰商場,兩個月前在佐敦開設「乜嘜雞蛋仔」,賣十八蚊份的榛子朱古力味雞蛋仔。

不過鋪頭未企穩陣腳,拍檔 Eric因與兩兄弟意見不合而退股。加上食物成本貴,開業兩個月只賺得萬多元。內外夾擊,但兩兄弟沒有氣餒,深信打響名堂後,便能開分店賺大錢。一蚊一蚊賺,與往日炒股每日動輒賺六位數相距甚遠,但細佬阿銓說:「我覺得而家先有實在嘅感覺。我由細到大都鍾意食雞蛋仔,希望可以做到全港最好食!」

「唔該一個原味,一個花生醬煉奶!」客人落單後,阿銓倒下雞蛋仔蛋漿,合上雞蛋仔爐,利落地將爐翻轉,並用刀削去流出來的蛋漿,三分半鐘後新鮮出爐,整塊起出,再用電風扇吹乾,一塊外脆內暖的雞蛋仔就此誕生。大汗疊細汗的阿銓,其實自畢業後跟隨哥哥 Calvin進入股票行工作,一直都在冷氣房炒股。兩兄弟試過一日勁賺五十萬,翌日又勁蝕三十萬,戶口餘額總像過山車般走上走落。 Calvin說:「其實自○九年後個市已經好差,我個股票組合由千七萬跌到而家一千萬多啲。」兩人認為這種生活太不實在,兩人的老死 Eric,去年游說兩兄弟合資開雞蛋仔店, Eric的父親是小食店龍頭「龍津」股東之一,於是他向其父請教雞蛋仔配方。眾人小試牛刀,合資三十萬元,在佐敦渡船街開鋪。但做生意跟炒股不同,不能不如意就即時沽貨(執笠)離場,每天都充滿挑戰。

花生醬煉奶味雞蛋仔一塊$16,外面涂上煉奶,內裡含有粒粒花生,口感特別。

阿銓一家四口總動員落鋪,媽媽負責門面,爸爸則專門煮咖喱,一家人的感情比以前更親密。

股東爭拗 拆股收場

開鋪不夠一個月,仍未有錢賺,三人的合作便出現問題, Eric更決定退股唔玩。阿銓指三人在鋪頭全職工作,各人支一萬一千元人工,但 Eric卻要求加薪至二萬元,他說:「 Eric覺得自己花咗好多時間喺鋪頭,出去打工都唔只賺到呢個數。但鋪頭都未有錢賺,又點可以咁快加人工。」三人在出糧方面,一直找不到共識,最後 Eric決定退股。當初每人夾十萬元開鋪,但 Eric賣股要求拿走十八萬,最後兩兄弟還價十五萬,阿銓說:「開咗一個月,仲未賺到錢,正常佢應該蝕住走,但我哋唔想麻煩,所以就寧願俾多啲錢。」記者致電 Eric,他坦白說:「盈利咁少,仲要分三份,我係碩士畢業,出去打工搵得仲多,加上我日日整雞蛋仔,好快右手出現腕管綜合症,中指同無名指開始麻痺,要做物理治療。其實大家都有問題,無謂互數不是。」阿銓亦強調與 Eric仍然是朋友,不過分道揚鑣後,一直未有聯絡,記者相信雙方心中都有一條未拔的刺。

拆夥既成事實,兩兄弟唯有頂硬上。鋪頭少了一個人,他們即時動員全家幫手, Calvin找其女朋友,幫手設計招牌圖案及傳單,爸爸負責廚房,媽媽 Eling負責鋪面,她說並不習慣:「我以前做文職,而家要企全日好辛苦,我住元朗,搭村巴再轉車出嚟,每日淨係來回都三個鐘。」不過,媽媽認為 Eric退股對兩兄弟是好事,因此願意無條件支持:「鋪頭可以自己話晒事,一家人亦更團結。」

「乜嘜雞蛋仔」以自創的榛子朱古力做生招牌,售$18,上週下大雨,仍有大批顧客幫襯。

阿銓指蛋漿隔夜就會變質,因此每日要新鮮打蛋漿。

毛利低 阿媽下海送外賣

Calvin對鋪頭位置充滿信心,不但租金平,他認為就近柯士甸站,附近有不少新盤,如已入伙的御金國峰及銷售中的 Grand Austin等。加上近幾條街都沒有雞蛋仔及小食店,就連旁邊的 7-ELEVEN亦沒有賣魚蛋等熟食,令 Calvin的鋪頭做「獨市生意」。這裡的雞蛋仔共有五種味,包括原味、朱古力、榛子朱古力、花生醬煉奶及芝麻味。開張兩個月,每日都賣出百多底雞蛋仔,連同賣魚蛋燒賣,營業額達十多萬,但旺丁卻不旺財,扣除食物食本、人工及雜費後,每月只得一萬二千元落袋。

記者過去訪問不少小食店,食物成本佔營業額一至兩成,惟「乜嘜雞蛋仔」食物成本連雜費佔三成五,令毛利大減。 Calvin坦言為打響名堂,希望用真材實料,坊間的朱古力味雞蛋仔,只是在蛋漿加入朱古力粉,但「乜嘜雞蛋仔」用的朱古力是 Hershey's朱古力粒,每粒蛋仔中間都放有兩至三粒朱古力,一底共有五、六十粒朱古力粒,非常重本。一箱 Hershey's來貨價約四百五十元,共十多包,每包可做廿底雞蛋仔,單是朱古力成本已佔雞蛋仔售價一成多。榛子亦是預先焗起,再去皮及絞碎,放入雞蛋漿內,花生是用原粒花生絞碎,花生醬則用頂好牌,食客李小姐在門外吃一口花生醬煉奶雞蛋仔後表示:「唔太甜,幾香口!原來佢個花生味入面真係有一粒粒嘅花生粒,幾特別喎!」客人喜歡,但卻令成本大增,「乜嘜」定價亦比對手平,一底原味雞蛋仔售十三元,油尖旺區賣十五元。

他們近日積極開拓客源,希望做到薄利多銷, Calvin指鋪頭已增設外賣,只要買滿八十元便可送貨。媽媽於非繁忙時間亦四出派傳單:「遲啲會去埋柯士甸站派﹗」

Calvin現時仍有炒股,鋪頭一有空閒時間就會留意股市動態。

咖喱魚蛋一碗$12,咖喱由譚爸爸每天用各種配料炒香再煮成醬汁,味道曾因客人口味而作出調整。

朱古力味雞蛋仔會放入 Hershey's朱古力粒,味道較一般店鋪放可可粉更香更甜,較易飽肚。

細佬踏實 大哥心雄

做小食生意,細佬阿銓瞓晒身,開業前花兩個月時間調味,「前後掉咗兩百底雞蛋仔,先整到而家呢隻味。雖然 Eric爸爸有條方程式,但老人家無準確記低配料分量,最後都要慢慢試。」蛋漿堅持每天新鮮即製,現時阿銓每朝提早一小時返回鋪頭整雞蛋漿,下午用完再整過。他亦十分細心,每落一種配料都用磅秤過,加水都要量過,非常科學化,更把方程式用電腦記低,他說:「麵粉多咗,或水少咗,味道都會唔同晒。」

不過,大哥 Calvin卻志不在此,不但有其他生意在身,亦有繼續炒股。 Calvin覺得自己鋪好食過北角某著名雞蛋仔,一心只希望雞蛋仔鋪可以盡快開分店。他說:「喺旺區開分店先至真正賺到錢。我計劃要開好多間分店,之後打入台灣市場。我呢啲炒開股嘅人心態都進取嘅,唔會只做一間鋪頭咁冇大志。」他希望日後可以向銀行借錢融資,事實上要向銀行借錢做生意,公司至少要經營兩年以上,經營模式亦是考慮因素之一。「乜嘜雞蛋仔」易被人複製,現時亦只賺一萬多元,相信短期難獲貸款, Calvin打算先用炒股賺來的錢開檔。細佬阿銓卻希望循序漸進,現階段只想做好雞蛋仔,未如大佬心雄:「相比以前,我而家好有滿足感,希望可以做全香港最好食嘅雞蛋仔!」

榛子朱古力味的材料包括原粒榛子,焗二十分鐘後再親手去皮及絞碎,再放入蛋漿裡。

李小姐(右)專程由大圍來佐敦食雞蛋仔,她讚餅底夠足料,但一個人未必食得晒。

開業資料( 6/14)

租金^:$113,000

裝修:$70,000

入貨:$25,000

雜費:$32,000

設備:$60,000

總投資:$300,000

^三上一按及經紀佣金

營業資料( 8/14)

營業額:$114,000

租金:$25,000

人工:$36,000*

料材:$34,000

雜費:$7,000

盈利:$12,000

*包括兩位老闆及兩名兼職

一點意見

串燒店串皇老闆 Ringo,三月份在荃灣路得圍開設第三間分店。

1.定位不清晰:應只賣雞蛋仔,因為雞蛋仔是乾貨,但魚蛋是濕貨,至少需要兩個人手去處理,如果只賣雞蛋仔可以只用一個人手,節省工人成本,雞蛋仔蛋漿自行調製,利潤空間較大,魚蛋要靠供應商入貨,利潤空間較低。

2.趁平價囤積:要留意食品價格行情,如留意到價錢有上升趨勢,應該盡快增加存貨。

3.控制成本:堅持出售優質食品是好事,但不一定只用貴價材料就好食,雞蛋仔的蛋漿是最容易控制成本的地方,如當中的麵粉、砂糖,最貴的材料不一定最好食。



鍾意就快D Share啦!