2014年9月5日 星期五

[忽然1周 997] JYP晒冷騷 盡地一煲 MW,




成個家族最紅嘅 2PM出場,就搵俊昊飛出嚟,型到呢!

韓氣逼人

JYP晒冷騷 盡地一煲

今年真係一個好年,韓國 3大娛樂公司 SM、 YG同 JYP分別舉行家族演唱會,淨係睇騷都破產。不過暫時只係得 JYP娛樂睇中喺香港亞洲博覽館開騷,上星期就由老闆兼歌手朴軫泳率領旗下歌手演出《 JYP NATION ONE MIC 2014》。

無可否認自從 JYP推 Wonder Girls去美國發展,搞到最賺錢組合變咗成盤散沙,令公司業績年年蝕。 JYP依家只係靠「國民初戀」秀智同 2PM搵錢,真係唔頂得幾耐。呢次搞家族騷冧 fans,將班星嘅優點晒冷,真係靠呢鋪博翻生嘞!







捧紅過 Rain、朴志胤、 G.O.D同 Wonder Girls嘅 JYP娛樂,因為大搞網上睇片生意,年年蝕錢。上年先蝕咗 23億韓幣(約 1千 7百 70萬港幣)咋!好彩今年佢哋班藝人生性,返大陸拍咗唔少廣告同劇,埋單有 11億 3千幾萬韓幣(約 8百 73萬港幣)利潤,總算賺少少。所以 JYP「嗱嗱聲」搞家族騷,幫旗下歌手做多啲宣傳。只係靠 miss A成員「國民初戀」秀智拍廣告賺錢,真係壓力大呀!

當晚嘅 JYP家族騷,唔似得其他韓星咁,講一堆肉麻說話冧 fans。反而好實實在在咁揀晒 hit歌,又唱又跳。除咗每隊本身嘅首本名曲,佢哋仲玩 crossover。 miss A同 2PM就最多互動同身體接觸,搞到班 fans嗌到收唔到聲。不過咁,話晒 2PM係全公司最紅組合,老闆梗係識做特登安排咗兩 part俾佢哋表演,又即場宣布今個月會出新碟,明年再嚟香港開騷。澤演仲話 10月會先做首爾場,叫 fans留意喎!咁識搵位宣傳,公司今年嘅業績真係靠你哋喇!

GOT 7成員輪住喺台上打筋斗,勁過雜耍。又真係跳得幾高喎!

08年 Wonder Girls以一曲〈 Nobody〉爆紅,隔年去埋美國發展。不過回流之後,成績未如理想,上年隊長先藝(右二)結婚,昭熙(左二)離隊,依家得番 3人。

miss A嘅 Min同 2AM趙權唱 Lady GaGa〈 Telephone〉,一個夾胸一個半裸露點,夠妖艷。

2PM唱〈整.天.想.着.你〉,俾 miss A、宣美同白娥娟攬住跳 sexy dance。老闆呢個安排,明益佢哋。

老闆 JYP(朴軫泳)帶埋佢旗下嘅女子組合開騷,呢個 opening,好有教父 feel。

2PM俊昊同 miss A秀智唱〈 Nobody's Business〉嗰陣,跳到好投入,俊昊仲掃過秀智心口,真係掂到㗎!

2PM燦盛同 miss A嘅霏跳探戈舞,霏撕去外面白裙,着住大露背性感晚裝擘髀,搞到燦盛唔知望邊好。

Behind the story……

咪以為趙權(箭嘴)掛住食,冇自拍。佢交咗部手機俾人幫佢影,喺後台同人爭食,仲放上網打卡。

2AM成員珍雲勁 high,放低結他擸咪衝入台側觀眾席,搞到班 fans癲晒。

2PM開親騷都會攞 fans手機自拍,今次都唔例外,連帶家族成員有樣學樣,成個場都掛住影相。

臨完場嗰陣,燦盛最興奮,將索滿汗水嘅 Tee除咗,掉落台送俾 fans。

香港長大嘅 Jackson,難得返鄉下,開心到爆,見到 fans仲主動攬住傾偈。



鍾意就快D Share啦!
Related Posts Plugin for WordPress, Blogger...