[忽然1周 997] 揭港姐「離普選」 3大疑點 港姐,MW,

上屆冠軍陳凱琳俾人話係近 10年最靚港姐，而今屆冠軍⑮邵珮詩竟然成為史上第一個攞埋「友誼小姐」嘅港姐冠軍。 Well……真係好難得！

媽咪姐

揭港姐「離普選」　 3大疑點

今時今日，真係唔知仲有幾多人會坐定定喺屋企睇香港小姐競選？唉，曾幾何時，媽咪姐係港姐嘅「非官方首席星級評判」嚟㗎！屆屆𥄫到實。睇到網民話今屆港姐選舉係完美演繹何謂「假普選真篩選」，都咪話唔欷歔。

講真吖！依家資訊咁發達，有乜嘢呃得到網民呢？媽咪姐綜合咗各方意見，搵到今次港姐選舉有 3大疑點，絕對有資格成為「歷史懸案」，全香港應該只有阿梁生可以答到你。就算答唔到，佢會求其俾個「答案」叫你「袋住先」！

嘿，是是但但，「袋住先」（設計對白）

今屆港姐冠軍⑮邵珮詩係香港人，但喺加拿大讀書長大。亞軍(9)王卓淇（左）係廣州人，嚟咗香港短短 3年，話可惜自己只係攞亞軍，強國人口氣。季軍(7)何艷娟（右）喺北京出世，讀緊港大法律系。港姐三甲原來唔係「好香港」，呢個世界真係變咗嘞。

網民插爆

網民睇港姐「篩完揀」選舉，即刻諗起香港嘅真普選遲遲未到。愈講愈火滾。

(1)三甲「真篩選」？

當晚所謂嘅「普選機制」，係由 5位「星級選民」投選 3強，之後再全民投票選出誰是冠、亞、季軍。縱觀成晚，最多評判支持嘅佳麗係 3號黃碧蓮同 11號吳愷欣，但 7號何艷娟、 9號王卓淇同 15號邵珮詩竟然離奇脫穎而出入選三甲。神奇到咁，難怪一直支持 3號黃碧蓮同 6號林洛鍶嘅「星級選民」容祖兒話：「心都碎！」

Do姐同 Joey全晚都不斷提住鍾意(3)同(11)，但結果卻係意料之外。網民都發現 Do姐「好 ODD」。

(2)七號「靈異」攝位？

啱啱過咗嘅七月十四，大家有冇出入小心?媽咪姐當晚睇港姐，都有懷疑係咪未過鬼節！

事關 7號何艷娟一直都係陪跑佳麗，幾個環節裏面，司儀都不斷訪問 5位「星級選民」嘅心水，而從頭到尾都冇人提過 7號。但最靈異嘅事發生咗！最後 7號竟然成功入選三甲，當司儀宣布時，志偉直情忍唔住 O嘴。之後司儀問佢覺得冠、亞、季誰屬，志偉仲咁講：「梗係 7號橫掂都爆（冷），就爆到底。」好明顯呢個唔係佢嘅選擇囉。

而 Do姐鄭裕玲同容祖兒都不約而同直認 7號唔係佢哋心水。咦？唔係佢哋選咁邊個選呢？咁唔通真係有鬼？嗱！媽咪姐就收到風，話 7號何艷娟父母係無綫高層余詠珊世交，何喺選舉前曾經相當大口氣同朋友仔透露自己「入硬 5強」。嗱，呢啲嘢好似鬼古一樣，信不信由你喇！

當司儀宣布 3強名單後，志偉忍唔住 O嘴，之後更踩多腳：「 7號的確唔係我心水。」噢！堅傷心。網民亦發現冇人揀過(7)何艷娟。

今年僅 22歲嘅(7)何艷娟，入選以來都屬陪跑族，但一夜之間竟然成為港姐季軍，學 Do姐話齋：「好多嘢都有得發生。」

(3)奇！選票去咗邊？

普通加數題， 3組數字加埋一齊，一定唔會係 25萬囉。

話時話，節目尾段，司儀之一嘅王祖藍宣布總投票人數達 25萬 5千 9百，但最後佢哋官方 show出嚟三甲佳麗各自得到嘅票數總和，點計都只係得 20萬 9千 9百幾。咦，說好的 25萬幾呢？似乎要麻煩大會搵 XXX會計師行再點一次喎。

鍾意就快D Share啦！

下一篇 》