掃呢頁CODE去手機

2015年1月29日 星期四

[壹週刊 - 1299] 紅館睇騷 激瘦 16磅著泳衣 楊千嬅:你哋唔係撞鬼! 楊千嬅,千嬅,M1,




千嬅唔贊成減肥,為咗演唱會,寧願日日狂操,手臂亦練出老鼠仔。

探熱針

紅館睇騷 激瘦 16磅著泳衣 楊千嬅:你哋唔係撞鬼!

做咗人老婆同阿媽的楊千嬅,心口個勇字愈來愈大隻,為了今次演唱會,一早跟隨健身教練狂操的她,見到 Thomas Chan為她設計的泳衣歌衫,沒有退縮,反而更加搏命,三個月激減十六磅,露手露腳上台。布少咗,跳舞部分就由一 part加到兩 part。

「藝人喺唔同階段,都想有唔同改變,我相信自己仲有好多進步空間。」楊千嬅說。

有信心唔就住

做慣烈女的楊千嬅,在老公丁子高推動下,去年炮製新歌《色惑》將性感底線大幅下調,踏出第一步,今次開個唱,將性感帶到舞台;泳衣款歌衫,跳住唱!密操三個月,楊千嬅得一○六磅。

「千嬅有一份執着,決定去做就一定要做到。結婚之後,丁子高不時鼓勵佢可以有更多變化,好似今次演唱會,千嬅試咗好多唔同嘅嘢,例如跟教練 Anson做練習,亦唔單只係練氣同體能咁簡單,仲有好多改善不同位置肌肉力量嘅鍛練,效果係點冇得作,大家睇到千嬅嘅變化。」千嬅身邊人說。

過往開騷,跳舞並非楊千嬅強項,擺甫士多過跳。

「但今次千嬅同 Sunny(排舞師)講唔使就住佢,可以加多啲快同密嘅動作,佢有信心,會有足夠體能去應付。」

第一次著 deep V高衩,有肥肉都著唔到。

又唱又跳廿幾分鐘,千嬅亦無氣喘。

千嬅與男 dancer熱舞,期間更將心口壓向男 dancer塊面。

著住泳衣款歌衫在過萬觀眾前跳住唱,對自己的轉變,楊千嬅自嘲說:「唔使驚,你哋唔係撞鬼!好感激 fans包容我,就算我做嘅唔啱佢哋口味都會支持,我覺得係要有目標先會進步。」

七場演唱會均由千嬅自己邀請嘉賓,第二場就請來宿敵容祖兒世紀同台合唱,劉浩龍更坐台前欣賞女友演出。

千嬅在後台化妝期間,老闆林建岳入房打氣,二人雞啄唔斷。

丁子高抱住囝囝撐老婆,未夠三歲的 Torres不斷揮動熒光棒,千嬅媽則抱住丁生契女。

丁子高早走

一直在旁推動楊千嬅「變多啲」的丁子高,上週六(一月二十四日)頭場帶埋囝囝 Torres到紅館為老婆打氣,但由於翌日要參加渣馬四十二公里賽事,十點未完騷就要提早走人。

至於老闆林建岳,頭場亦有到場睇騷,又親往後台探班打氣。

「千嬅同公司就嚟約滿,雖然之前太陽城嗰邊有開過條件叫佢過檔,但佢喺寰亞八年,加上老闆(林建岳)都想千嬅留低,所以雙方再合作嘅機會好高,不過形式方面應該會有啲唔同。」一名寰亞人說。

激瘦千嬅唔單只狂晒腿,仲有大露背睇。

千嬅與觀眾握手時,被 fans狂扯,差啲企唔穩。

自嘲同千嬅肥瘦同台的 Eason說:「我今日見到升級版千嬅。」



鍾意就快D Share啦!