掃呢頁CODE去手機

2015年1月14日 星期三

[FACE - 399 - 數碼科技] 西環深度行 MF,




Geek友講場

西環深度行

中環就成日去,過澳門都會去上環,但西環畀人感覺總係靜謐而帶點距離感。

港鐵西港島線已經通車,親身落過去嘅話,唔難發現其實西環呢個地方係好特別:藝術氣息特別強烈、人情味特別濃厚、歷史文化特別重。

就等港島西地膽、港大 UStar Kathleen

帶你去勻西港島線三大站,探索下另一番風味嘅西環

西環人談西環回憶滿滿

Johnie

住在西環約 10年

「我記得細個嘅時候,爸爸成日都會帶我去一間茶餐廳食嘢,嗰度每個街坊都會定時定候落去食嘢,大家好似一家人聚埋食飯咁。有時如果見唔到某啲街坊,就會周身唔自在。雖然𠵱家已經搬走咗,但俾我揀都會住返西環,因為西環特別有人情味!」

泰利

住在西環約 26年

「西環最令我深刻係咸魚欄。細個嗰陣,每一次經過我都會覺得海味奇型怪狀,雖然嗰時媽媽都會話比我知嗰啲係乜嚟,但細細個見到啲咁得意嘅海味,都會覺得好有趣。我由細到大都一直住喺西環,呢度係個好寧靜嘅地方,可惜而家已經唔再寧靜,所以俾我揀,我會搬離西環。」

Sai Ying Pun Station 藝術步道

Leo@Living Art Cafe

西營盤位於西環海皮跟半山之間,營字代表軍營,有張寶仔盜營說、亦有駐港英軍營說,不論你相信邊個版本,西營盤自古就係一個以貨運轉口、維修補給維生、華洋共處的社區,此處斜路多、小路多,當中有不少隱世小店,獨有一份逛外國小店街的獨特文藝氣息。由於地理環境特殊,此站要在 2015年首季尾方會啟用。沒車、用腳行, Kathleen由西營盤區向上環區來一次藝術散策,邊走邊思考,發現更多。

藝術中尋片刻安寧

幾經辛苦,終於行完一條又長又斜嘅大斜路嚟到高街,成條街都唔難發現各式各樣嘅食肆,說實話,其實又真係唔覺有咩特別!然而,勢估唔到接近盡頭轉一轉入巷仔,就有一間同高街完全有違和感嘅 Living Art Café。唔單只外牆油上天空藍嘅色調,一行入去滿佈書籍及畫作,突然,彷如尋找到心中片刻的安寧。

咖啡師 Leo表示老闆就係覺得呢區比較少文藝氣息嘅地方,所以先會決定喺呢度開間 Art Café,同時亦因為老闆嘅妹妹係一個藝術家,所以就索性將佢嘅畫作放喺度展覽,公諸同好, Café彷佛變成 Gallery!佢話店子以旅客光顧為主,最深刻印象係有個德國來香港工作嘅客人,本應第二日就要飛返德國,點知當晚叫 Leo帶佢去玩,喺呢區,感覺人與人之間嘅戒心比較少, Leo好喜歡呢種單純的心態,更在 cafe一角設了「漂書區」,讓客人隨意放下、帶走圖書,就像以往的西環港口,將一件件貨物、一點點文化、一個個故事,不斷轉運。

呢三幅畫作就係老闆妹妹所畫,大家留意,其實係三為一體的一尾魚。

可在「漂書區」自由放下、帶走喜歡的書。

info box

Living Art Cafe

地址:香港西營盤兩儀坊

(西營盤高街 29-33號高宏閣地下)

查詢: 2803 0186

靜思所想

只要你對生活有感悟,到處都係藝術,不妨沿路向上環走到文咸西街的 Art Space ARTRA,新 event帶你回到過去,欣賞一個以古典油畫做主題嘅畫展,於藝術周期間還有講座、研討會、鑒賞課程、鑒賞下午茶呢。

年份: 17-18世紀

作者: Faustino BOOCCHI

(意大利)

創作時格林兄弟還未將民間口耳相傳的《白雪公主》故事改篇,後來此詭異版雪姑七友則成為了童話集的插畫。

年份: 17-18世紀

作者: Georg Philip I RUGENDAS

(德國)

中國乾隆皇帝曾被作者震撼的戰爭場面吸引,命宮廷畫師模仿其風格,將中國各地戰役場面繪成畫作。

info box

ARTRA藝術空間藝術周 2015

地址:文咸西街 18號

盤谷銀行大廈 5樓

查詢: 2325 7200

塗鴉何罪

早前一個 14歲嘅小妹妹因為喺金鐘「連儂牆」用粉筆畫花而無辜被警方屈「刑事毀壞」,不論有冇政治意味都好,人之所以係人,正因懂得以畫、文字表達自我,喺人人觸手可及的牆上畫上塗鴉,更是想將訊息公諸於世、何罪之有?喺西營盤東邊街同正街一帶,唔難發現到處都係 Graffiti,你又發現到乜嘢藝術訊息?

HKU Station 守望西環老店情

殖民時期初,西、上、中、下環(現今灣仔、銅鑼灣一帶)以四環九約方式規劃成「維多利亞城」,乃香港最早發展地區。中下環大家都知變晒樣啦,上環都變海味街,只剩西環乃保有舊區風貌。去完西營盤藝術遊,再落香港大學站皇后大道西一帶,雖已混入多間連鎖品牌,但仍有不少老店紮根。港鐵開站,社區面臨劇變,我們外人幻想著這城市如何悲情,但聽老闆們細說老香港故事,感受到嘅係暖暖人情味。老店或總有傳承失落一天,但願當中的人與情能長伴我城。

一腳踢舊式眼鏡店

皇后大道西近正街一帶,係典型嘅街坊舖地段,路過希路眼鏡店可能唔會留意到佢招牌,但只要細心望吓櫥窗又或者走入店內,就會被林林種種特色舊眼鏡所迷倒。周老闆雙親都從事眼鏡行業,覺得做眼鏡優雅又唔使出汗,細個就諗住做呢行。「嗰時去茂昌做學徒,𠵱家都係㗎喇,眼鏡界少林寺。不過以前冇分咩 sales,賣眼鏡嘅都要識整眼鏡。」

1989年開舖,剛過 25年大關,咁多年嚟都係自己同太太打理,除過年大節外年中無休。

同周老闆傾開先記起,細個讀書,課本上寫著香港製造業好風光。「鏡片不嬲都係外國貨,但香港出產嘅膠製鏡框喺 80年代好出名,嗰時外銷世界各地㗎,不過後來大陸開廠平,搬晒上去咪冇囉。」

𠵱家啲後生,鍾意搵舊嘢

眼鏡連鎖店咁多年都有,周生可以一間老店做到今時今日,佢話多得客人賞面。「佢哋話我驗眼好,會講解多啲,介紹咩眼鏡啱用。同埋做生意唔計較囉,壞咗一塊鏡出去配要換晒一對,嚟呢度我咪幫佢換一塊。最近就多咗人嚟買舊眼鏡,𠵱家啲後生好得意,鍾意返啲舊嘢。」

周生仔女都冇諗住繼承衣砵,佢話做多 4年左右退休,但又唔覺絕技失傳或者老店沒落可惜。「冇話可惜嘅,最多我捐晒啲珍藏眼鏡出去,又唔係咩特別嘢,仔女唔做冇人做就要執㗎喇。」

筆者都想周生為今次西區專題推介一些特別地方,但佢話諗唔到,不過就覺得西區最正係人情味。「啲街坊好好,過時過節送好多糕呀、嘢食呀過嚟。以前幫襯我啲學生,𠵱家做咗媽媽帶埋個女嚟幫襯,感覺好特別。」

地鐵通車,周老闆坦言唔通好過通,但就話業主都有良心冇加租。「變咗好多喇,好多舖都冇做,附近啲業主都好人冇乜點加租,但可能隔一兩條街情況已經好唔同,據我知有啲都加咗 5成。」

呢副 Christian Dior 80年代女裝超睇到 Kathleen同女攝記哇哇聲,鑲石加 S型特別支架,係貴氣嘅。約$1,200

Zeiss鍍金舊鏡,周老闆話舊眼鏡做工好唔同,螺絲構造複雜好多,用十幾年都唔會鬆,當中德國貨最好。約$1,500

近年多咗唔少潮人嚟呢度搵舊眼鏡。老闆話好多貨都係以前舅父唔做時收返嚟,賣一副就少一副,仲話當年捐咗唔少畀救世軍走寶。

info box

希路眼鏡公司

開業: 1989年

業務:眼鏡店

地址:西環皇后大道西 276號得利大廈地下

新潮紙紮屹立不倒

老店未必守舊,位於西營盤東邊街同第二街交界一條巷仔入面,就有一間新潮紙紮鋪——天寶樓扎作。勢估唔到老闆夏中建師傅係香港鼎鼎大名「獅王」夏國璋嘅兒子,有獅王都唔做,自然有段故。

「講緊 30年前,當年一個獅頭成本要 1萬,舞一次獅就要用 30隻,獅頭一爛,就即係損失咗 30幾萬,所以當時好多紙紮師父吼住我地呢單大客。屋企為咗慳錢就自己去修補,點知我就喺過程中產生興趣。本來打算拜師學藝,但個個知我係獅王個仔都唔敢收,怕我學識之後佢哋會冇生意!最終都俾我搵到同舞獅冇衝突嘅『花燈大王』梁有錦做我師傅,一做就做咗 32年!」

話天寶樓新潮,皆因佢哋唔只造祭祀品,公司搞 party都會搵夏師傅,貪紙紮夠輕身同平,好似萬聖節,夏師傅就試過幫客人紮科學怪人。面對西港島線通車,夏師傅話地產商出到 3000萬買鋪,但熱愛紙紮藝術嘅佢就覺得呢啲錢毫不需要,話要繼續堅守呢門手藝!

客人要求想幫一對先人冥婚,訂造紙紮龍鳳鈪,點知第一次嘅成品俾「鬼」退貨!經問米婆轉述,先人嫌唔靚唔收貨,信不信由你喇!

紙紮科學怪人,夏師傅真心熱愛紙紮藝術,客人話要試新嘢都絕不抗拒。

info box

天寶樓扎作

開業: 1982

業務:紙紮店

地址:西營盤第二街 1-11號東祥大廈地庫 C鋪

港大生最愛飲早茶

嚟到香港大學站,唔搵 Kathleen講吓港大生活又點得。港大 campus分得散,各 hall都有自己玩法,不過大部份港大仔女溫書、做 project或其他原因通頂的話,都會去士美菲路嘅新興飲早茶。凌晨 3點開舖,晏晝 4點放工,個流沙包確實一絕,仲有一磚磚嘅蒸蘿蔔糕,加埋用點心紙出去拎點心,夠地道,我鍾意。

info box

新興食家

西環士美菲路 8號地下 C號舖

Kennedy Town Station 塘西風月

一路向西、從香港大學站到達堅尼地城站,當中的石塘咀區,於香港開埠初期至 1930年代中禁娼為止,原是色情事業集中地,其紅燈區比灣仔、中環石塘咀更為繁盛。今時今日色情場所當然已禁絕,但此區的的確確有一段繁盛嘅風月史,是為「塘西風月」,也是港島西區歷史的一部份,實在不用站在「堅離地城」道德高地、視之為污穢之事而恥於重提,最終只會令歷史資料都煙沒!

中產階級的風流軼事

當時中環區的妓院主要聚集高級洋妓,有錢佬都會堆哂喺中環;而消費力低啲嘅男丁,例如短期停留的水兵,就會去灣仔;而石塘咀就夾喺兩者之間,自然而然就會係最多夾心階層、亦即是中產聚集嘅地方,有傳有富家子和土豪為了討得名妓歡心,會用鈔票當柴火煲綠豆沙,好不豪華。

當時嫖妓也不全是「污糟」事,承繼傳統中國社會的情色生活,女孩子多能歌善舞,能登大雅之堂,好多時男人亦只係想有女人陪自己把酒談歡,甚至係聽聽塘西姑娘唱吓歌,彈吓琴,享得春宵一刻。男人嘛,好多時都係「醉翁之意不在酒」。女孩子亦有真情一面,比如當年石塘咀妓院裡面最出名嘅塘西著名粵曲歌伶「花影恨」,自幼父親早逝,得返母親撫養,但最終都因為家境貧困而喺 16歲被逼為娼。 1939年一個夜晚,突然感懷身世,留下一封遺書,就吞食鴉片煙膏自殺。遺書嘅最後一句寫上:「生無可戀甘為鬼,花影恨絕筆。」轟動香港一時!

塘西姑娘必到之處

花影恨女士自殺的報導,當時塘西有很多才子佳人浪漫故事,有睇過《姻脂扣》嘅話,相信不難明白!

當年嘅高級洋妓會喺啲西報上面扮哂正經咁賣廣告,例如蜜糖、 Gin酒、 Brandy……識途老馬都會知道,其實呢啲就係「黃色分類小廣告」,按地址上門就得!

太平戲院

位於皇后大道西一條龜背斜坡上嘅太平戲院,係因為當年嘅淫業興旺下嘅衍生品。 1904年開業嘅太平戲院就係當時全港最 high class嘅戲院,當時係啲公子哥兒討好塘西姑娘嘅好去處。

金陵酒家

論全塘西最豪華嘅酒家一定非金陵酒家莫屬, 1910年,佢哋全港首創「酒家」一詞,大概取自詩詞「夜泊秦淮近酒家」一句,自此香港其他酒樓食肆都開始跟風。當時,無論係商人定公子作樂,都鍾意包廂聽吓塘西故娘唱歌,玩樂一晚。

性病醫院

《大內密探靈靈發》內,婦科醫星爺跟外父解釋:「妓女都係人、妓女都會病……」今日嘅西營盤賽馬會分科診所,就係昔日嘅「國家醫院」,喺山頭嘅其中一座,當時就有專為塘西姑娘而設嘅性病醫院。早喺 1845年因為淫業太興旺,性病橫行,政府於是發牌監管妓女,牌費就係用作營運性病醫院之用。

塘西潮語

「鴇婆」

妓女點解會叫做「雞」?眾說紛紜,但小記覺得最言之成理嘅就係有說「妓」係由北方傳入,因為普通話嘅「雞」同「妓」係同音,傳到入南方就變咗「雞」喇。

「琵琶仔」

喺中國傳統上,多係指妓院嘅事頭婆、泛指女性。當然都有男性,就會叫「龜公」,即現代嘅「馬伕」。「鴇」其實係指唔會飛走嘅鳥,喺中國古代象徵淫賤。

「一蚊雞」

係一個召妓過程,話說當時石塘咀嘅酒家茶樓會以一張「花箋」作為召妓之用,而當時每張「花箋」值一蚊,即係召妓落訂。塘西姑娘收到花箋,一蚊就可以袋袋平安,再去酒家陪客人。可是,當時一個普通侍仔月薪得三至五蚊,所以一蚊召妓都唔平㗎!

「琵琶仔」

多為出身貧苦被賣的未成年少女,自細被鴇婆養成雛妓,學習唱歌彈琴、吟詩作對。因為佢哋從來都冇性行為,所以特別值錢,啲阿叔、紈絝子弟就最興糟蹋佢哋,好慘㗎!佢哋賣咗身之後,就會變為「老舉」。



鍾意就快D Share啦!