凸腩陳智燊 拖宋熙年混吉
【中環】今年37歲、外貌忠忠直直嘅陳智燊絕對係城中筍盤，可惜佢已經名草有主，去年公開咗同細佢8年嘅宋熙年蜜運中，兩個人仲經常都會將甜到漏嘅合照放上網。上年，陳智燊被問到會幾時迎娶宋熙年等女友做陳太時，佢仲話諗住婚期定喺2017年，覺得係時候成家立室咁話，咁有計劃嘅男人，相信會令好多女士「葡萄」！
【十指緊扣】
■陳智燊同宋熙年拍拖3年幾，大前日又見到佢哋拖住手行中環。
【齋睇唔買】
■陳智燊不停研究個銀包，但最終都混吉冇買。
【肚腩凸出】
■用力挺起胸膛嘅陳智燊，連個腩都挺咗出嚟。DV圖片
邊行邊揈手
大前日星期日晚大約8點幾，呢對沐浴愛河嘅戀人手拖手喺中環蘇豪區行街，雖然拍拖已經3年幾，但就咁睇佢哋仲好似熱戀期，唔單止十指緊扣，宋熙年仲好似細路女咁，拖住男友手邊行邊揈，之後佢哋行入一間賣皮具嘅舖頭睇銀包，陳智燊睇中咗其中一款，宋熙年即刻落力畀意見，但陳智燊最後都混吉，決定唔買，兩人再行到附近一間有機店買嘢食。
■一手拎嘢嘅陳智燊，另一隻手就搵車匙。
展紳士風度
當晚陳智燊負責做柴可夫，揸女友架車做司機，思想比較洋化嘅陳智燊，同一般港男亦好唔同，雖然拎到一手都係食物，冇手幫女友開車門，但全程企喺車門旁邊，等女友上咗車坐定定先返番司機位，超級細心！不過，陳智燊似乎有急切收身必要，事關佢唔單止心口冇「朱古力」，仲驚現肚腩，同宋熙年纖瘦身形有強烈對比。
採訪、攝影：畢紹基、羅德光
■前華姐冠軍宋熙年同男友陳智燊年紀相差8年，但無礙佢哋嘅感情發展。資料圖片
|
鍾意就快D Share啦！
|
|
|
