被網友攻擊多日，杜如風周日依然帶住兩隻愛犬行百萬行，表示心情不受影響。
真面目
唔怕你話 最貴買 4萬蚊勞 平反港女臭朵 杜如風：同男友旅行都係 AA制！！
到底係大台不思進取一成不變，定係怕咗班慣性觀眾唔敢變？呢個問題嘅答案，隨住杜如風輯《流行首爾》開播終於浮面：唔係第一日以自 high癲喪 style做旅遊節目，杜如風做咗八年主持相安無事，一入主流免費電視就俾人圍插，你話係主持定觀眾問題？仲有呀，唔好乜都賴晒班師奶，大把上網留言人身攻擊的都係後生巴絲，又話唔睇大台嘅？
被插又肥又老兼世界級港女，杜如風終於反擊：「乜港女定義唔係攻心計使男人錢咩？但我冇一個男朋友係有錢人、我同男朋友旅行都係 AA制喎！」
香港人幾時變得蠻不講理，係又投訴唔係又投訴？食家名人主持旅遊節目狂嗌悶、翠如 BB又話高層偏心自己人，今次大台一心求變，搵嚟杜如風主持《流行首爾》，播得一集就瘋插求腰斬，其實由旅遊兼專欄作家，升格變旅遊節目主持；由大台收費台，做到上免費電視，杜如風的旅遊節目長做長有、越播越主流，都係因為其爆肚亂吹癲喪格人冇我有全港獨家。
自封垃圾婆
一夜之間臭名遠播，杜如風周一（ 12日）接受本刊電話訪問，不失口硬兼玩得本性，似乎心情未受影響：「話我唔貴唔買絕對錯，我係垃圾婆就真，乜都買乜都儲，最鍾意捐窿捐罅買嘢， 5蚊件、 19蚊件都會尋寶。一世人買過最貴，都係隻四萬蚊勞力士俾我爹哋 70大壽。其實講真，我真係唔知港女嘅定義係乜，我一直以為港女係有好多攻心計啦、去勾住個男人啦，然之後就使啲男人錢啦，但係我啲男朋友冇一個係有錢人、我同男朋友去旅行都係 AA制！咁我啲錢又唔係天度跌落嚟，我做咗八年主持、寫書寫專欄又有接 job，又唔係靠父母又唔係靠男友，都係用我自己賺番嚟嘅錢，咁我諗都唔係好嚴重啩。啲網友評論已經超出節目製作，去到人生攻擊，我又冇乜嘢，一笑置之囉！」
潛力港女
杜如風算唔算港女有待深究，不過前大台小花岑潔儀就因為睇唔過眼喺微博發聲撐，暫時幫杜如風轉移視線，成為網友攻擊新目標，岑潔儀話：「我睇得好開！」
|
鍾意就快D Share啦！
|
|
|
