2015年2月17日星期二

年宵市場使出「撒嬌功」黃美棋o氹男生買咕o臣黃美棋,

【年廿九啦】年宵市場使出「撒嬌功」黃美棋o氹男生買咕o臣

2015-02-17 08:30:00

(攝影:仇志德)

港視藝人黃美棋(美棋BB)、周家怡同李雨陽，噚日喺維園年宵市場，為一個攤位做售貨員，吸引咗大批市民圍觀，三人表現十分落力，不停大嗌「埋嚟睇，埋嚟揀」。

美棋向一位青年推銷原價一百二十八蚊嘅粉紅色心形咕o臣，呢位青年起初唔肯，美棋BB即時出撒手鐧話：「你唔買，我嬲你！」呢位青年最終就範，選購一個粉藍色四方形咕o臣，仲畀佢優惠價八十八蚊。

美棋BB表示一直想喺年宵市場投個攤檔做生意，連周家怡都話：「我都想，不過唔敢，因為唔知賣乜好，又怕冇人嚟買。」佢哋透露每年都會行年宵買蘭花，家怡話：「行年宵好似行大運，所以每年都會同屋企人一齊行，但係今年媽咪去咗旅行，冇得同佢行，不過媽咪之前已經買定年花，仲有桃花添。」

美棋BB話：「咁咪可以轉﹖」家怡笑住話：「擺喺窗台，唔夠位轉呀。」美棋BB指佢前兩年開始有個習慣，就係去文武廟拜神，間廟出面有棵桃花，佢會圍住棵桃花行幾個圈。