爸 B倦了
郭政鴻入行 30年拍劇無數，最近不時返國內拍劇。這日抽空與妻女外出，在咖啡店坐下明顯露疲態。不過面對細女，他全程慈父上身，即使累了亦任囡囡魚肉。
滾熱辣
丁利蟹變慈父 郭政鴻任 4歲女糟躓
《大時代》呢套神劇一出，劇中所有演員都成為「野生捕獲」對象。飾演丁蟹幼子丁利蟹的郭政鴻，現實生活中曾被指欺騙滕麗名感情，暗地裏與內地妻連生兩女。浪子回頭，今時今日的他已變顧家男，面對得意囡囡更慈父上身。
上周五（ 8日），本刊捕獲郭政鴻與太太帶住 4歲細女到紅磡報名學芭蕾舞，其間他被女兒撩鼻、篤眼再插口，但只是笑笑口叫「唔好」。
沉醉於父女獨處時刻的郭政鴻，事後知道一家被捕獲感到意外：「我哋咁小心都俾你哋發現！依家我好重視囡囡嘅成長期，只要有時間都會陪佢哋，唔經唔覺變咗怪獸家長。」
在神劇《大時代》，丁蟹的四個仔全都是大奸大惡的衰人，最後更被丁蟹親手逐個掉落樓冇好收場。現實中，演丁利蟹的郭政鴻卻浪子回頭，近年除了修心養性努力工作外，更變身成為一個好老公好爸爸。
為女兒浪子回頭
09年，郭政鴻被爆出一腳踏兩船，邊跟滕麗名玩地下情，邊跟另一操普通話女子同居，兼育有一名 9個月大女兒。享齊人之福遭踢爆後，郭政鴻與滕麗名隨即斬纜，返回當時仍未結婚的內地女友身邊。據知情人士透露：「好多報道都寫錯同認錯，以為郭政鴻依家個老婆仲係 03年結婚嗰個廣州小姐李欣穎，事實佢哋已經分開咗。佢依家太太姓楊（即 09年被本刊拍到的內地女子），當年係朋友介紹認識嘅。郭政鴻以前係做錯過，老婆好愛佢，一直吞聲忍氣，好彩最後都守得雲開。郭政鴻為咗兩個女有個完整嘅家，佢冇再搞搞震喇！依家大女 6歲半，細女就嚟 4歲。」
據知兩年前郭政鴻正式迎娶楊姓內地女子，之後搬離鑽石山龍蟠苑居屋。
向來私生活十分低調的郭政鴻，上周五（ 8日）下午三時許，與太太及 4歲細女現身紅磡都會商場。頭戴黑色 cap帽黑衫黑褲的郭政鴻不時四圍張望，警覺性甚高。兩公婆行到商場內一間芭蕾舞學校門前停下，經過一輪商量後決定讓女兒入內試堂，二人再到附近茶餐廳食 tea打發時間。
約一個小時後待細女跳完舞，郭政鴻與太太決定報讀一個月 8堂學費 1,600元的課程。趁太太在學校內為女兒辦理手續，郭帶住囡囡到對面的咖啡店食蛋糕。眼見他小心翼翼把蛋糕送入女兒口中，原來大男人也有溫柔時。
當時郭政鴻似乎有點倦意，坐在沙發閉目養神，但囡囡周身郁冇時停，更當眾用紙巾捲成條狀向他的鼻孔猛撩，之後甚至用小手指為他撩鼻孔、篤眼再插口。面對囡囡長達 10分鐘的連番「攻擊」，郭政鴻竟一句指罵都沒有，只細細聲說；「唔好」勸囡囡收手。
蟹子有孝心
郭政鴻稱因工作關係中港兩地飛，未能重看《大時代》。他指丁利蟹不算是衰人：「佢都唔係好壞，只係當時年紀細冇咗媽媽，老竇丁蟹又喺台灣坐監 14年，全靠大佬丁孝蟹，都係為生活啫，我覺得好有孝心。」
公開多謝太太
在女兒面前，郭政鴻收晒火脾氣甚好。周二晚（ 12日）他透過電話回應記者：「我覺得自己成熟咗，可能有咗家庭，係小朋友嘅爸爸，心境同以前唔同晒，正能量多好多。（上星期見你帶囡囡去芭蕾舞學校喎？）係呀，咁都俾你哋發現到。我太太鍾意跳舞，想細女試下學，嗰日係帶佢去搵啲比較好師資嘅芭蕾舞學校，希望發掘囡囡呢方面嘅天份。其實兩個女都有學跳舞，太太就擅長跳中國舞。（要照顧一頭家兩個女，辛苦嘛？）要照顧小朋友真係勞心勞力，都幾辛苦㗎！我不知不覺做咗怪獸家長，現時啲學校制度，除咗讀書外，課外活動都好重要。當所有家長都咁做我唔能夠唔跟住做，所以要搵學校學跳舞、寫作仲有畫畫。呢段係我第二段婚姻，依家一家生活得好開心，好多謝我太太，感激佢好用心照顧兩個寶貝女。」
現時正翻播 23年前的《大時代》，網上亦有不少人評論 50歲的郭政鴻 keep得好，好似食咗防腐劑一樣，他即自爆：「其實係先天基因好，我爸爸九十歲望落仲好似六十幾。我由細就好貪靚，加上多年來均衡飲食，仲有做大量運動，好似跑步和打功夫咁，先有今日嘅成績。」
錯唔緊要，最緊要知錯能改，相信大家都會對今日充滿正能量的郭政鴻另眼相看。
2007年撻着阿滕
單身多時的郭政鴻，與滕麗名拍《野蠻奶奶大戰戈師奶》時朝夕相對而撻着，被拍下深夜上女方香閨（上圖）。至 09年郭被踢爆與另一操普通話女子同居，更育有一名約 9個月大的女兒。
2011年再做老竇
一向絕口不提家事的郭政鴻， 11年 7月和太太現身九龍法國醫院，誕下七磅六細女。
中年大隻佬
85年已經加入大台的郭政鴻，今年已經 50歲，效力 30年拍過逾 70套劇，可惜冇做過男主角又未曾獲獎。不過外貌與身形都 keep得好，而且練得一身好武功，令郭政鴻站穩二線小生之列，最近他更返國內拍劇搵真銀。不少網民大讚他保養得好，完全唔似 50歲。
|
鍾意就快D Share啦！
|
|
|
