掃呢頁CODE去手機

2015年6月26日 星期五

《他來自江湖》明師奶出巡 五人服侍輪椅代步  83歲銀髮琴姐神隱 2年現身 [忽然1周 - 1039] 他來自江湖,李香琴,琴姐,MW,



眼仔睩睩

晚上 8時,琴姐與家人到尖沙嘴吃過晚飯離開時,記者上前訪問,琴姐精神不俗。現場觀察所得,她的體形跟兩年前差不多,沒有明顯消瘦。

打頭陣

《他來自江湖》明師奶出巡 五人服侍輪椅代步  83歲銀髮琴姐神隱 2年現身

繼《大時代》後,大台再翻播舊劇《他來自江湖》,當年飾演明師奶的李香琴生鬼搞笑,令人回味。琴姐自 2012年退休後,其間多次在家跌倒,加上同時出現腦退化徵狀,情況令人擔心。

已神隱兩年的琴姐,一直在家休養,加上勤做物理治療,身體狀況已好轉不少。上周五( 19日)晚,本刊發現琴姐罕有外出食飯。一頭銀髮的琴姐,看上去精神不俗,還貪靚薄施脂粉。而她腳傷的康復進度頗理想,在其家人攙扶之下,她可以慢慢下車,再轉身坐上輪椅。之後記者上前與琴姐傾談,她亦眼仔睩睩欲嘗試回答問題,只是口齒已沒有昔日般伶俐。此時其家人則代答:「之前佢跌親唔係好行得,但健康好好,精神呀!」









醫院度 78歲

2010年琴姐拍《公主嫁到》時已曾因跌親暈倒,被送往九龍法國醫院,更在該院過 78歲生日。當時琴姐身形已開始消瘦。《蘋果日報》圖片

琴姐在 2012年正式退休後,身體狀況急轉直下,血壓長期偏高,其雙腳萎縮乏力,出入需由男外傭抱住上落車。更不幸是她弄穿了一邊耳膜,又開始有腦退化迹象,健康狀況令人擔憂。她上次露面,已是 13年 8月。當時本刊拍下她坐着輪椅由女傭陪同下,到紅磡理工大學的復康治療中心做物理治療。

絕迹粵劇界

資深戲迷

16歲便加入粵劇界的琴姐,醉心大戲,早年不時參與慈善表演,但近月她已沒有外出睇大戲。

本刊收到消息,今年初琴姐再不慎在家跌傷左腳,雖然沒傷及其他部位,但因她畢竟已年屆 83歲,加上前年已經跌過三次,家人因此相當緊張。據知與琴姐住同一大廈的女兒及女婿,及另有家庭的胞妹,近月實行廿四小時全天候與外傭輪流照顧,確保琴姐安全。為了琴姐着想,除了每星期一次外出覆診外,家人暫時不准她參與任何粵劇活動。

知情人士透露:「自從琴姐幾年前跌親冇拍戲之後,佢僅有娛樂就係睇大戲。以前琴姐最鍾意睇任白,自從仙姐退休後,佢就睇契女寶珠姐同阿刨、阿嗲。只要有大戲睇,佢次次都去捧場。早兩年琴姐都係叫佢個妹陪去睇吓大戲,仲會口噏噏跟住唱,但舊年年中開始,已經唔見佢再出嚟!大家都好擔心,驚琴姐唔知發生咩事。有人話不如去探下佢老人家,但聯絡過佢家人,又話冇事,可能唔想我哋打擾琴姐休息啩!」

捕獲外出晚膳

經過數月來家人悉心照料,據知琴姐的精神和身體狀態已漸漸好轉。上周五( 19日)晚 6時許,她更與家人外出到尖沙嘴北京道一號吃飯,提前慶祝端午節,不過過程就頗為大陣仗。

當七人車到達時,即有 5名親友連司機、男外傭等合力攙扶琴姐。現場所見,琴姐雙腳能自行着地,再慢慢轉身坐上輪椅,動作明顯較之前靈活。只不過是早前傷及左腳,因而要以右腳做重心。單單這個下車過程,已用上近兩分鐘。

冇見接近兩年,琴姐已長滿一頭銀髮,且相當濃密,未有甩頭髮跡象。這天她還刻意着了靚衫、薄施脂粉及塗了鮮紅色唇膏,心情不俗,一家人出外吃中菜。吃了僅個半小時,眾人便離去。

此時記者上前與琴姐傾偈,坐在輪椅的琴姐全程都眼仔睩睩望實記者,好留心聽住提問。記者問她身體狀況如何?有否深宵追看自己主演的《他來自江湖》?琴姐聽罷即時有反應,發了幾個音,但由於有點口齒不清,記者未能清楚聽到她講甚麼。

親友緊張

雖然琴姐精神奕奕,但親友對 83歲的她份外緊張,爭住扶實琴姐上七人車,怕她坐唔穩。

安頓了琴姐後,一位與琴姐十足餅印的親友表示:「佢好精神,只係之前跌親唔係好行得,有心」說罷她再上車檢視琴姐座位,才安心開車離開。

家人:佢跌親行唔到(真實對白)

早瞓睇唔到《江湖》

此時,琴姐身後相信是其胞妹的一位親友,開口代琴姐答話,「嗰個時間咁夜,佢瞓咗覺㗎喇!咁夜睇唔到喇!今晚出嚟食飯已經夜咗!因為佢依家好早要瞓!(咁琴姐身體健康嗎?)係行動唔好,之前跌親,唔係好行得啫,但健康好好,精神呀!唔該晒!有心。」再問她是否琴姐胞妹?她不欲解釋,只說:「屋企人啦。」說罷便一同上車離去。

前年要人抱

13年 8月,當時本刊拍得她到理工大學做物理治療時,需要男外傭抱起。而這位男外傭,上周亦有現身為琴姐推輪椅。

現時自己企

雖然今年初琴姐曾不慎跌傷,但上周五( 19日)外出時,由家人扶實,琴姐可以自行起身。

菊姐爆:日食 4餐

琴姐在何文田山道豪宅居住多年,除了家人輪住照顧,跟琴姐關係最親密的契女關菊英亦不時上門陪琴姐解悶,早前她更爆契媽胃口大:「琴姐一日食 4餐,胃口唔錯呀,所以最近肥咗!」至於一直有指琴姐患上腦退化症,關菊英則說:「佢認得我嘅,但可能有啲人少見面,再見番就未必叫得出名。」

定時覆診

13年琴姐健康情況較差,當時她身形消瘦,雙腳纖幼乏力,被本刊拍得一周內兩度到理工大學做物理治療,令人擔心。

菊姐陪解悶

琴姐圈中朋友最親密的便是契女關菊英,昔日二人經常結伴欣賞粵劇表演。

在家做伸展運動

現時琴姐除了外出做物理治療之外,幾乎全天候在家休養,她亦會間中在露台舒展手腳筋骨。「琴姐要長時間留喺屋企,最初都唔係咁開心㗎,不過好彩佢有大把屋企人錫,又有成班契仔契女輪住探,到依家都慣咗留喺屋企。琴姐都知道如果自己唔郁下,啲筋骨仲退化得快,所以佢都日日做下啲簡單伸展運動。有時屋企人又陪佢打番兩圈衞生麻雀,等佢腦筋靈活啲囉!另外琴姐呢幾年都有食中藥去保健身體,佢自己話信中藥多過西藥好多喎。生活有規律咗,個人都自然肥番精神番。」知情人說。

琴姐在娛圈廣結人緣,亦有不少忠實 fans,現時她身體無礙,食得瞓得,相信不少人都放下心頭大石。

最後露面

未跌親前琴姐精神爽利,行得走得。 12年 5月《盛世仁傑》飯局,琴姐便最後一次在公開活動露面。

拍廣告跳跳紮

琴姐退休前亦拍下 Snickers朱古力廣告,當時她要在球場上與不少男士一同走來走去,跳跳紮活力十足。

2013年,有指琴姐患腦退化症,無綫高層樂易玲和監製何小慧即約她飲茶,更即時發相,表示琴姐精神無礙。

老友關心琴姐

圈中出名人緣好的琴姐,愛熱鬧又豪爽,不時請朋友到家中作客。但自她身體轉差後,精神狀態已大不如前,不少老友對她都相當關心。

羅蘭:我最近拍劇未得閒探佢!

與琴姐友好的羅蘭姐,是少數獲安排上門造訪的圈中好友。不過近日羅蘭姐忙於拍劇,二人已很久未見面:「最近一次見已經係舊年過年前,佢精神好好,我哋有傾偈。(但最近琴姐講嘢有啲唔清楚!)唔係喎!佢嗰時講得好好。」

周驄:始終年紀大!

好拍檔周驄則表示有託朋友問候:「我有朋友之前探過佢,我有託佢問候,我自己就無謂打擾人啦。始終年紀大,希望佢靜心休養。」

譚炳文:當然關心對方

「探佢同佢講嘢,講兩句又話要瞓,做朋友當然關心對方,不過打電話俾佢,佢已唔再識接。人去到呢個年紀,健康總會有問題。」

健康指數回升

琴姐 3年前身體便開始變差,要定時做物理治療及覆診,幾年間身體狀況常有起伏,至近日情況才穩定。

琴姐《江湖》經典場口

大台食住舊劇熱潮條水,接住《大時代》推出《他來自江湖》,縱然《江湖》已經是 26年前作品,但劇中的無厘頭情節一啲都唔 out。

飾演萬梓良母親的「靚姑」李香琴,對白抵死啜核,連星爺都不禁說﹕「靚姑語錄,句句入肉。」

第 11集,萬梓良和恬妞感情大躍進,還有激咀戲份。不過劇集中段恬妞要求推遲跟萬梓良婚期,李香琴即拋下金句寸恬妞,「佛有兩面,人有兩條心未為多!」

第 12集,周星馳忽然發財,全家人合力向他「度水」,搞到星爺衫都剝埋。琴姐數錢表情相當搞笑。之後星爺說:「仲有兩蚊,明師奶攞去吖!」琴姐說:「唔拘呀!」

網友激讚

此劇無疑是星爺、吳孟達等人較搶鏡,但網民亦一致大讚琴姐演技出色,搞笑得來又可愛,沒有被星爺的光芒所掩蓋。

鍾意就快D Share啦!