娛樂講呢啲
有種副業，叫港姐殺手
大台每年都孕育一班香港小姐，原來不經不覺也造就了一些「港姐殺手」出來。這名稱猶如職業一般，美麗之餘又帶點血腥，甚有「肉類分割技術員」之妙。
譚小環結婚八年，去年得老公蔡強榮打本榮升魚蛋檔老闆娘，大家都以為她幸福指數爆燈。如不是老公最近與女性朋友在偷情勝地圓方一日遊，我們都忘記了他除了是位把炮的保險公司區域總監之外，還是一名「港姐殺手」，過往戰績有向海嵐和梁佩瑚。據他解釋，是自己玩得太忘形，下次會「玩得檢點啲」。搞到老婆要死撐，仲要累埋兩位前緋聞女友再次見光，可能係殺手意識鬆懈咗，下次去玩記住咪再去圓方喇！
胡杏兒最近似乎嫁杏有期了，經營獵頭公司和蘭桂坊夜場的男友 Philip Lee原來也是跟港姐們關係密切。每次介紹他出場時大家總不忘加上溫馨提示，他跟李詩韻和張曦雯都曾經幾好明友，搞到見慣大場面的胡杏兒都要大發嬌嗔，叫大家別再叫他「港姐殺手」。啱嘅，「殺手」終於「金盆洗手」，係應該忘記過去。
再講遠一點吧，經常在籌款節目出錢出力的前仁濟主席吳守基，跟港姐也是特別有緣份，好朋友名單之中便有佘詩曼、葉翠翠、李詩韻（又有佢份！）等。大家還記得海馬集團老闆鄔友正嗎？這位可算是「港姐殺手」始祖。他先跟 97年亞軍李明慧傳婚訊，但最後娶的卻是冠軍翁嘉穗。同時傾倒兩位同屆港姐，也真是魅力非凡。
做得「港姐殺手」，最好有財有勢，有名車有豪宅，樣貌也不能太衰，這才襯得起人家。拖着位聲稱美貌與智慧並重的港姐出街，想必是十分威風的事吧！所以呢，有幾多「殺手」會如上述這幾位般真的「金盆洗手」？新一屆港姐不久又出爐，各位甘願「被殺」前記住用自由意志停一停諗一諗，一但入咗對方史冊，就會永遠被記錄在案，以後對方或對方另一半有乜頭暈身㷫，你的名字也必定會再次出現，萬試萬靈。到時先發覺自己豬咗，真係喊都無謂。
|
鍾意就快D Share啦！
|
|
|
