6月 7日：面對面皺晒眉
記者連續兩星期追訪魏氏夫婦，發現魏駿傑和張利華只有呢日一齊出現，不過二人絕對係零交流。呢個皺眉頭對峙數秒的畫面，已經係最親密的距離。
滾熱辣
嫩妻日日扮靚唔黐家 魏駿傑死撐：佢喺屋企溫書啫！
早前魏駿傑的嫩妻張利華被踢爆與前港隊單車手鄧宏業攬腰夜會，魏駿傑公開表示「心裏有條刺」，但為了 5歲女兒 Jessica，仍會努力維繫呢個家。
夫妻感情出現缺口，要挽救亦需要時間。過去兩星期，這對老夫少妻的關係非常疏離，湊女更是分更制。嫩妻張利華每日送女返學，魏駿傑則負責接放學，只有一日齊齊現身，不過二人卻零交流。
為填補心靈空虛，張利華每日都扮到雀咁靚，送女返學後便自由活動，早出晚歸唔黐家。不過魏駿傑似乎唔知嫩妻去咗邊，死撐說：「佢喺屋企溫書啫！」
47歲的魏駿傑與年輕 20載的重慶嫩妻張利華早前傳出婚變，魏還表示會為 5歲大的囡囡 Jessica努力守住這個家。魏駿傑早前更坦言半年前已斥資逾二千萬，購入西貢五千呎獨立屋，新屋業權嫩妻張利華都有份，亦講到明因為是獨立屋，就算二人再嗌交都可以到另一間房瞓避一避。言下之意，似乎想有多些空間讓夫婦冷靜去解決問題。
嗌交後分房瞓
據知情人士透露：「傑仔其實都好照顧呢頭家，搵嘅錢全部都放晒喺個女同屋企上，仲成日買名牌俾張利華㖭。不過佢啲脾氣好大，郁啲就爆粗，講啲好難聽嘅說話就在所難免。上次嫩妻同單車手傳緋聞，傑仔嬲到話如果佢（張利華）要走，就乜都唔使旨意拎走。老婆重慶嘅父母就等老婆自己養番，傑仔會收番結婚前喺當地買嘅嗰層樓。有時兩公婆火起上嚟都會有啲推撞㗎！為免面左左，佢哋已經分房瞓一段時間。雖然咁唔開心，但張利華有太多顧慮，咁多年都係傑仔養佢全家，所以佢唔會輕易離婚。」
魏駿傑曾直斥嫩妻甚少陪伴女兒，但過去兩星期所見，張利華一反常態，每日都會準時送女兒到九龍塘校舍返學，放學則由魏駿傑獨自湊女回家。難得一天（ 7/6星期日）見到二人同車出門湊女，但都是零交流，氣氛並不融洽。
其餘的日子，張利華每次送完個女返學，都會把魏駿傑價值 83萬的白色 Range Rover座駕停泊在路邊，然後獨自乘的士離開。而每次她均打扮到花枝招展，經常以鮮色短裙及孭着名牌手袋。她行徑亦非常鬼祟，每次都是失驚無神在人群中截的士，其間不時四處張望，看來有心逃避傳媒追訪。
唔知老婆行蹤
上周四（ 18日）下午，心情勁靚的魏駿傑準時出門湊女放學，面對記者採訪表現輕鬆，還幫嫩妻講好說話：「我老婆點？因為佢要考船牌，依家要繼續上堂，所以成日匿喺屋企溫書。」但本刊記者連日所見，張利華除了湊女返學，其餘時間都是約朋友行街、食飯和按摩，似乎連魏駿傑都唔知老婆節目咁豐富。
本周二（ 23日）魏駿傑返回內地開工，張利華湊女返學時，記者上前問她夫妻關係是否疏離，她最初表現忟憎：「我哋兩公婆好好，冇離婚。嗌交會有，解決咗依家我有去讀書，讀緊船牌課程，仲有做珠寶同讀珠寶設計。（你同魏駿傑成日都分開湊女喎？）要做嘢嘛！兩公婆要分工合作。（着到咁靚唔怕引嚟狂蜂浪蝶？）我着得靚係尊重人哋，又或者係場合需要，但好多報道話我去識男仔。我一着得唔靚唔好睇，就話我老公冇錢。（咁新屋裝修進展點呀？）下個月應該搬得入去，用咗近 200萬去裝修，因為我老公好有要求。」張利華聲稱自己不是大花筒，現在已有工開，不過每日要送女返學後才能上班。
唔想再牽涉入內
至於被踢爆與張利華密會的前港隊單車代表鄧宏業，據知他與張利華近月已鮮有見面，二人在 fb內的合照，已在報道出街後被剷走。記者日前致電鄧宏業，他即時與張劃清界線：「佢（張利華）只係我嘅學生，我承認我哋係比較啱傾，係好投契，但真係冇嘢。呢件事發生咗，我俾媽咪鬧咗好耐，依家我哋已經冇再見面。我唔想再牽涉入佢兩夫婦內，放過我」據知過去因為張利華介紹，不少人跟鄧宏業學踩單車，但二人關係不再，鄧現時要在大埔一單車運動舖掛單做教練維持生計。
兩公婆牀頭打交牀尾和，希望魏駿傑收斂大男人的脾氣，張利華亦安份做個好媽媽，順利過渡他們的「七年之癢」。
|
鍾意就快D Share啦！
|
|
|
