2015年7月30日 星期四

木村拓哉 又英雄回歸 [壹週刊 - 1325] 木村拓哉,木村,M1,



木村拓哉嘅《律政英雄》,相隔 3年推出劇場版,由第二季日劇原班台前幕後演出,仲有松隆子回歸,成為今年最受矚目嘅日本電影。

日韓到會

木村拓哉 又英雄回歸

十多年前,我還是一個中學生,當時迷上了日劇,於是暑假報讀了日文興趣班,繼而人生的軌道就逐漸成形。而把我帶上這條路的,就是木村拓哉。

十多年過去,木村依然是我心目中的英雄。今年《律政英雄》再拍電影版,久利生公平唔再係黃毛小子,查案仲搞到去外交層面,梗係要搵埋松隆子出嚟幫手!

我認我老土,比起新進男演員壁咚、捲衫袖,我還是覺得木村 chok住樣講人生道理比較吸引。

大叔轉型

《律政英雄》於 2001年第一次以電視劇面世,當年人人都扮木村,著住件啡色羽絨,配對 Red Wing Boots,令佢嘅人氣更上一層樓。隨着時光飛逝,當年迷倒萬千少女嘅木村,今年都已經 42歲,近年人氣大不如前,有人 cap佢圖,話佢成面皺紋,又話佢七情上面嘅演技浮誇。今年木村似乎有意轉型,上季《 I'm Home》首次挑戰做爸爸角色,打造父愛洋溢嘅住家男人形象,然後又唔怕認老,喺綜藝節目俾人笑佢係大叔,都只係笑笑口,俾着以前一定黑晒面。上年再做《律政英雄》電視劇,女主角配上細佢十幾年嘅北川景子,好多人話佢哋唔襯,最後男女主角無愛情線,幾乎係木村劇集嘅第一次。叱咤一時嘅萬人迷都總會有老嘅一日,不過而家興成熟男,四字頭嘅木村另有一番成熟魅力,似紅酒愈老愈醇。

木村為咗連戲,特登留長頭髮,令久利生公平嘅不跟隨常規嘅性格更加突出。

終於等到呢對熒幕情侶再碰頭,男女都成熟咗,好多人都想佢哋開花結果,其實遺憾也是一種美,呢個係好例子。

松隆子回歸

日本有個 term叫做「木村 children」,意思即係睇木村嘅劇長大嘅一輩。對「木村 children」嚟講,要講木村嘅日劇簡直容易過背書,如果要投票同木村最襯嘅熒幕對手,一定非松隆子莫屬。佢哋合作過三套劇,《悠長假期》、《戀愛世紀》以及《律政英雄》,當年被稱為金童玉女的一對,好多人都想見到佢哋再合作,本來上年嘅《律政英雄》電視劇,已經有傳松隆子應承演出,點知有咗 BB,唔可以太操勞,於是淨係拍電影版,腹大便便嘅佢著住大褸遮遮掩掩,總算過到關。木村同松隆子相隔多年再次合作,成為電影嘅宣傳重點之一,仲大賣關子話佢哋嘅一段情,電影最後會有交代,仲唔係引觀眾入場?香港觀眾想睇,就要等到 8月 27日喇。

北川景子同木村嘅配搭當然無同松隆子咁有火花,不過勝在佢形象入屋,又唔會搶戲,表現恰如其分。

電影版其實緊接上年嘅日劇版拍攝,一眾演員已經一齊工作幾個月,特別有默契,部分對白仲係即場爆肚。

大規模土豪宣傳

《律政英雄》電影版於 7月 18日,第一個星期票房已經超過 7億日圓(約 4,375萬),入場人數超過 54萬人,成績當然係彪炳,不過其實仲未翻本!事關今次電影鋪天蓋地式宣傳,大規模如大阪環球片場有特設區域,重現劇中酒吧、東京 JR山手線有《律政英雄》列車、涉谷車站上有巨大木村;貼身啲有 LINE貼紙、快餐店 crossover菜式、卡拉 OK主題房,基本上成個東京都係《律政英雄》。有份出錢拍戲嘅富士電視台,上映當日播出特備節目《 Hero TV》,木村同松隆子呢對熒幕情侶仲模擬拍拖約會,遊車河去水族館,完全係喚起一眾「木村 children」嘅美好回憶,實行狂谷收視同票房!

劇中角色成日打躉嘅酒吧,觀眾特別有情意結,想朝聖可以去大阪環球影城。

涉谷車站外牆係宣傳勝地,不過有廣告板出現喺屋頂,係百貨公司 80年以來第一次,高 7.5米闊 10米嘅巨大木村拓哉一樣咁有型。

節目利用觀眾對木村及松隆子嘅幻想,叫佢哋拍拖遊水族館,我諗起《戀愛世紀》。

一字排開咁行,係《律政英雄》招牌場面,松隆子著晒大褸,原來當時已經見肚喇!

鍾意就快D Share啦!
Related Posts Plugin for WordPress, Blogger...