掃呢頁CODE去手機

2015年7月30日 星期四

扮 friend陳瀅 楊秀惠見機行事 [壹週刊 - 1325] 陳瀅,楊秀惠,M1,



知道俾鏡頭隊住,楊秀惠化身友誼小姐,主動坐埋「手機失主」陳瀅(箭嘴)身邊傾偈。

同你吟一吟

扮 friend陳瀅 楊秀惠見機行事

上星期日(七月十九日),大台新劇《潮流教主》喺觀塘一幢高級商廈拍外景,陳豪、張國強、蔡思貝、陳瀅、呂慧儀,仲有合作主持《姊妹淘》嘅楊秀惠、莊思敏兩位「姊妹」都有份埋位。

現場所見,向來同楊秀惠冇偈傾嘅莊思敏,等埋位期間企開一二邊篤住手機;新丁蔡思貝、陳瀅亦有自知之明,同有鋪扮阿姐癮嘅楊秀惠有咁遠離咁遠;人夫陳豪就更加坐咗去管理處,避開班 lady,遠離是非。

直到發現《壹》仔鏡頭,楊秀惠立即見「機」行事,主動坐埋蔡思貝、陳瀅身邊有講有笑,之後仲一齊揮晒手對住鏡頭笑,友誼小姐上身。

楊秀惠話齋,佢同陳瀅私下係好朋友,至於之前喺電視城化妝間陳瀅唔見咗手提電話,最終經「 find my iPhone」功能搵到原來喺佢個喼入面,楊秀惠話只係忙中有錯,得啖笑嘅誤會。講到咁,楊秀惠當然要做埋俾人睇!

等埋位期間,陳瀅同蔡思貝(左一、二)大部分時間黐住許亦妮、湯洛雯,同鍾意蝦新丁嘅楊秀惠保持距離。

合作主持《姊妹淘》已經冇兩句,莊思敏、楊秀惠企埋一齊,零交流。

有女人就有是非,陳豪自我隔離,客串大廈管理員。

鍾意就快D Share啦!