陸詩韻信用卡遭盜用碌走3萬蚊
前港姐陸詩韻於情場屢敗屢戰，最近更無辜破財，認真黑仔！明明身在香港的她，卻被人在加拿大盜用信用卡買機票，被碌走約三萬港元，她直言「嚇餐死」，相信繼續搞網上生意的她要更小心。
網上世界無限大，市民被盜用信用卡的事件時有發生，可謂防不勝防。最新一名受害者是2005年港姐亞軍陸詩韻，她昨日在微博自爆信用卡被盜用買機票，被碌走逾五千加幣（約三萬一千港元）！
需時調查仍未報警
詩韻在微博透露被盜用信用卡的詳情，她寫道：「真的可怕，信用卡被盜用！昨（前）晚一直錄影節目，完成後看訊息，銀行通知話我張信用卡剛授權CAD 5,231.97元！我身在香港，又冇做任何網上交易，亦冇授權任何人！立即致電銀行查問，立即凍結張咭（卡），查到是某人用我張咭（卡）向航空公司購買機票！真是荒謬。銀行稱要等3至4日後才能查到詳情。大家真的要小心……」多位網友即紛紛留言安慰她。
事後詩韻接受電話訪問時直言「嚇餐死」，想不到自己在香港仍遭人越洋盜用信用卡，她表示尚未報警，因銀行需時調查：「相信到時銀行check唔到，應該會幫我報警啩！」她表示平日有網上購物習慣，但未知是否因此導致資料外洩：「我係有網購，但要拎到信用卡嘅資料都好容易，平時買嘢碌卡，啲店員都會拎開去碌，要抄低個信用卡號碼都唔難。我都唔知係畀邊個盜用咗，希望銀行方面查到，依家最煩係要重新搞過晒啲嘢！」
合資七位數搞網店
此外，詩韻早年淡出娛樂圈，幫父親打理製衣廠及轉做生意，去年她回復單身並解決與舊愛的錢債糾紛，簽約經理人再闖娛樂圈，聲稱有機會拍電影，並對做生意甚有野心，希望自食其力做女強人。
前晚詩韻出席網絡節目錄影時透露正與三位友人經營網上護膚品生意，合資七位數字。她說：「網上搞，因為太貴（舖）租。（反應如何？）開始咗個零月，好多朋友支持同傾吓有咩合作。我本身鍾意試新產品，會去日本、韓國同法國試。（做埋代理？）代理同代言都有。」正在經營生意的詩韻碰巧在網上失財，相信日後要更小心處理網上帳目。
文：影視組
|
鍾意就快D Share啦！
|
|
|
