探熱針
瞞住無綫 苟芸慧炒車手尾長
苟芸慧上週六（七月二十五日）於珠海參加蓮花盃賽車時，高速掟彎甩尾剷上壆，車身失控連打四個空翻，最後反肚落地。奇跡般車毀人冇事，苟姑娘只是扭傷頸和嚇餐死；不過今次瞞住無綫去賽車，本已失寵的她要面聖解畫，有手尾！
驚青包尾
因為身形一發不可收拾，苟芸慧近年被大台貶做大茄，剛拍完劇集《 EU超時任務》，放假去珠海參加賽車，事前未有向公司報備。上週五（七月二十四日），苟芸慧跟同樣一起參加明星賽的方中信、方力申、劉浩龍、狄易達及曾國祥等落場練習試車，身為賽車初哥的苟姑娘，全程時速唔過一百公里，包尾而回。
甩尾失控
翌日（二十五日）苟姑娘再落場練車，忽然放膽狂片，但因為揸唔慣棍波，高速掟彎時甩尾剷上石壆，車身失控連打四個空翻，最後四輪朝天落地。車身損毀嚴重報廢，尾隨的車輛嚇到即刻收油，工作人員立即搶前救出苟姑娘，驚魂未定，幸好沒重大損傷，入院檢查發覺只是扭傷，非常大命。
有人看過她戰車內的攝錄片段，發現炒車時，她最初緊握軚盤，控制不了後就驚到舉高雙手大嗌，其實兩種表現都唔合格，因為她落場前，大會教過遇意外要雙手緊抱在胸前，保護自己。
「苟姑娘揸九十九號紅色辣跑，佢掟彎太心急，加上嗰日有雨賽道較濕滑，所以炒得咁甘。大會每個藝人贊助四十幾萬，包括考國際賽車牌，而且仲每個都有大利是，收多收少就個個唔同今次賽車係為咗預備十一月澳門格蘭披治其中一個環節做熱身，因為參加澳門賽車嘅藝人要有認可賽車牌，所以大家上嚟學車兼考牌。苟姑娘炒完車都話唔驚，仲話仍然想考個賽車牌，都好大膽！」知情人說。
四空翻
要同公司交代
週一（二十七日），本刊聯絡苟姑娘時，她已返港並在醫院接受檢查。
壹：壹週刊 苟：苟芸慧
壹：你參加明星賽炒車？
苟：（猶豫）其實係自己去玩啫， personal嘅嘢，唔係咁方便分享。
壹：炒車有冇整親？
苟： OK嘅，唔係就唔可以同你傾偈
壹：你架車打咗幾個空翻先落地！
苟：呢啲嘢就唔講啦，因為我仲做緊檢查，唔係咁方便喺呢啲時候講。等齊晒所有嘢，我都要同公司交代咗先。
壹：再入院檢查是否有手尾？
苟：其實我已經檢查過，而家只係 follow up。
|
鍾意就快D Share啦！
|
|
|
