女兒受歡迎， Celine媽一年已幫女兒接下近百項工作。（《蘋果日報》圖片）
探熱針
義拍寫真內幕 Celine媽 10萬秘接內衣褲廣告
七歲的「美心妹妹」 Celine楊鎧凝，在今年書展推出寫真集《童萌時光》，卻因部分照片被指意識不良，引起極大爭議，事後楊母強調接拍寫真集無收錢，只為給 Celine留作紀念。但原來早在傾拍寫真前，楊母已秘密收十萬元，幫女兒接拍了一個雞仔嘜全新內衣褲廣告，寫真集內率先鋪排 Celine穿內衣褲拍照宣傳，之後會為內衣褲廣告拍攝電視廣告，點知寫真集搞出大頭佛，電視廣告拍唔成，楊母更為求甩身，隻字不提為女兒接拍內衣褲廣告一事。
笠水停工
可愛的「美心妹妹」楊鎧凝三歲開始拍廣告，短短三年間，已經拍了八十個廣告，經常帶同 Celine出席活動的楊母，豬籠入水。
今年書展，楊母為女兒推出寫真集《童萌時光》，內有 Celine著內褲擘髀照，寫真一出，群起圍剿，眼見風頭火勢，楊母唯有將 Celine工作急停。
寫真照片被指意識不良，楊母為求自保，對外聲稱接拍寫真集是給女兒留作紀念，並無收錢。至於點解讓女兒著內衣褲影相，以及寫真集攝影師 Ronald Lam指：「內衣褲唔係我哋預備！」楊母隻字不提。
據了解，今次拍攝寫真集，楊母的確未有收取酬勞，但卻在拍寫真前，以十萬元替女兒接下雞仔嘜全新內衣褲廣告。
有晒部署
「其實 Celine已經做咗雞仔嘜代言人三年，今次新合約係雞仔嘜同布甸狗聯乘合作系列， Celine媽答應幫個女出寫真集後，亦有主動向品牌商提議，會喺寫真集著啲產品影生活相，當係做啲前期宣傳。」知情者說。
拍寫真集期間，楊母即使人在現場，但對拍攝方法、角度毫不了解，甚至連揀相出版，亦未有參與。
「喺濟州島影相嗰段時間， Celine媽全程都在場，因為以生活為主題，拍攝過程又密集，佢無諗過會出問題。其實之後佢都有問過出版社攞相睇，但出版社話啲相已經攞晒去印，咁佢就無再追，直至記者會第一次睇到本書，先知出事。」楊母身邊人說。
唔再合作
無論如何，楊母始終難辭其咎，原本計劃寫真集推出後會進行拍攝的內衣褲廣告，亦受牽連；就算已收下廣告酬金，品牌方面亦決定急停計劃，免被牽連。
「品牌都無諗過 Celine媽會同個拍𡃁模寫真嘅攝影師合作，仲要著住佢哋啲產品影擘髀相。出事後， Celine媽有同廣告商解釋，話係自己嘅疏忽，但都於事無補！品牌好重視形象，寧願損失，都唔會喺呢個咁敏感時期搵 Celine拍廣告！相信嚟緊都唔會再合作。」知情者說。
楊母享受做星媽，今年升讀小二的 Celine，在校內早已出晒名，但亦有不少同校家長認為 Celine媽將幾歲女當搖錢樹。
「 Celine媽出親嚟都成個星媽咁款，好囂張，我哋啲家長同佢都無乜兩句，之前 Celine已經成日要缺課，今次仲搞到咁大，大家都覺得佢累咗個女。」一名學校家長說。
搖錢樹
人氣童星 Celine楊鎧凝， 11年贏得小童模特兒比賽入行，因接拍美心廣告被稱為「美心妹妹」。 13年參演電視劇《愛我請留言》飾演樂悠悠一角大受歡迎，在 fb開專頁吸納逾 20萬名粉絲，比不少藝人還要多。
出道以來拍了 80多個廣告，七歲人仔已勁賺 300萬。
寫真事變
Celine楊鎧凝的寫真集內有多張露出內褲及擘腿的照片，被指含有淫褻及不雅或兒童色情的內容，惹起網民炮轟，並收到 131宗投訴，事件引來極大回響。
7月 14日 發布會
Celine為寫真集《童萌時光》於西九龍中心舉行簽名發布會，並即席與現場觀眾玩遊戲。
7月 17日 寫真下架
原定舉行的簽名會臨時取消，同日下午，封膠的寫真集宣布下架。
7月 18日 發聲明道歉
被各界批評未有盡母親責任的 Celine媽向傳媒發聲明，表示未有收取任何酬勞，寫真集出版後才首次看到全部內容和未有參與後期揀相，對事件感到內疚和傷心。
攝影師助查
同日，警方介入事件，由重案組接手調查，警方聯絡了負責操刀的攝影師兼出版社負責人 Ronald Lam到警署助查。
7月 19日 擬告出版社
有傳楊母上律師樓尋求法律意見，擬告出版社。
7月 26日 缺席動漫節
原本答應出席動漫節 PlayStation活動，最後未有現身。
|
鍾意就快D Share啦！
|
|
|
