2015年8月29日 星期六

洪天明細仔百日宴 三代同堂糕興 洪天明,

天明抱着竟琋,與大仔大仁及爺爺洪金寶齊吹蠟燭。

洪天明細仔百日宴 三代同堂糕興

「帶子洪郎」洪天明自兒子出世後,生活習慣徹底改變,賣命工作,做個顧家男人,月初天明為細仔竟琋舉行百日宴,與爺爺洪金寶三代同堂切蛋糕。昨日他又與周家蔚帶同兒子到主題樂園玩。不過這位廿四孝爸爸說到剛上幼稚園的大仔大仁於學校感染病菌返家,隨即傳給細佬,面對兩個心肝齊齊病倒,天明亦冇覺好瞓!

天明與周家蔚婚後三年抱兩,一家四口樂也融融!8月6日乃細仔竟琋出生100天,天明提早兩日筵開6席招呼親朋戚友,圈中好友包括元彪、佘詩曼、文頌嫻及方中信等紛紛到賀,天明更與父親及兩子三代同堂吹蠟燭切蛋糕,場面熱鬧。天明表示:「本嚟想正日先食飯,但爺爺(洪金寶)趕住返內地工作,又避開錢嘉樂生日,所以改喺4日搞啫。雖然咁高興,但我嗰晚要做屋企人嘅柴可夫(司機),所以滴酒不沾。(咩禮物最特別?)都係啲衫仔、鞋仔,同埋利是咁囉,大家咁畀面嚟,已經好好嘞。」洪金寶出席完孫兒百日宴後,更要連夜趕飛機,難得開心,頻撲也值得。

心痛寶貝齊病

天明不諱言最感恩是竟琋健康狀況比大仁出生時更理想,不過隨着3星期前大仁開始上學,兩兄弟即齊齊病倒,至今仍未完全康復。他無奈表示:「阿哥喺學校傳染咗感冒,返到屋企一家大細都有可能一齊病,最慘係細佬搞到鼻塞,佢飲奶透唔到氣發忟,夜晚頻頻起身扭抱,我試過用吸管幫佢吸鼻涕,都幫唔到幾多。小朋友最多畀少少藥佢食,但藥力少又會好得慢,搞到細佬瞓咗,朝早阿哥起身又要黐住我,我依家每日瞓得幾粒鐘咋。」天明又表示不想只當「負責賺錢的爸爸」,希望多花時間在兒子們的成長路上,可見兩個心肝地位舉足輕重。

天明昨日與太太家蔚帶大仔到主題樂園,開心盡興。
  • 天明昨日與太太家蔚帶大仔到主題樂園,開心盡興。
家蔚與大仔玩機動遊戲。
  • 家蔚與大仔玩機動遊戲。
天明與家蔚難得出遊,貼頭自拍晒恩愛。
  • 天明與家蔚難得出遊,貼頭自拍晒恩愛。

樂園親子喪玩

天明指幸好大仁比較定性,已習慣學校的群體生活,亦可以自己搭校車返、放學,天明說放下心頭大石。在細佬的百日宴上,大仁更「搶咪」上台大唱生日歌娛賓,樣子萌爆,氹得台下的長輩們開心不已。問到天明可打算讓兒子「承繼衣鉢」,他坦言:「咁早邊知佢係咪真係有興趣吖?仲細,睇情況啦,最緊要畀佢自由發揮吓先。」

溫韾全家福
  • 溫韾全家福
竟琋百日宴,圈中好友及親戚到賀,場面熱鬧。
  • 竟琋百日宴,圈中好友及親戚到賀,場面熱鬧。

而昨午天明夫婦帶同兒子又再出動,相約大肚婆湯盈盈等現身主題樂園耍樂,天明與家蔚陪大仁睇煙花及玩機動遊戲,十足大細路一樣,而天明坦言兒子出世後令自己的生活習慣徹底改變,現時已甚少現身夜場。

文:影視組

鍾意就快D Share啦!
Related Posts Plugin for WordPress, Blogger...