2015年8月25日 星期二

Chilam賺埋一鋪清 股神淪陷 Chilam,股神,張智霖,

Chilam賺埋一鋪清 股神淪陷

【太陽報專訊】全球股市大跌,恒指連跌七日,昨日更重創1,158點,不少「星級股民」慘變大閘蟹,向來投資有道的張智霖(Chilam)今次都跌晒眼鏡,身為「股神」的他自言淪為「股民」。名模莊思敏勁蝕逾百萬,她說:「我依家係好大隻蟹。」

文:專案組

環球股市下跌,昨日恒指收市跌1,158點,股民蝕到眼坦坦,一向投資眼光獨到的「股神」張智霖坦言看不透近日的股市,昨日他接受本報記者電話訪問時說:「今朝我仲估個市點都會升番,因為內地公布養老基金政策,銀行又減息,有好多利好因素,有隻基金我想買,對住電腦,做好所有手續,係差最後撳個掣,不過最後都係唔買。原本4至6月賺到,但7月個勢開始麻麻,上上落落保守估計打個和。(你不嬲係股神嚟喎?)唔係次次都賺,咪又係股民。」他表示現時沒有持有任何股票,短期內亦不打算入市,笑言要買都買自己公司的股票,起碼了解公司運作。

「今次真係重創」

據知,Chilam一向少掂樓市,但經此一役後,他揚言考慮轉買磚頭保值:「以前計落覺得買股票回報大啲,但依家世界太多不明朗因素,都會考慮轉攻樓市。」此外,Chilam昨午現身中環,離開往取車時發覺座駕被抄牌,他急急拿起告票便上車,問到被抄牌時他只說:「係又抄咗。」

而在4月無綫重播神劇《大時代》時,曾賺得六位數字的名模莊思敏,昨日亦表示受股市拖累勁蝕逾百萬:「唉!冇眼睇,其實上星期五晚已有朋友同我講會出事,但係都太遲呢排好多不利環境因素,人民幣又跌,我依家係好大隻蟹。有人叫我趁低吸納,但我就唔敢,留番啲錢傍身。(因為重播鄭少秋《誓不低頭》?)唔關秋官事,次次跌市都賴佢,對佢好唔公平。」問到蝕多少?她說:「都過百萬,唔係點會咁愁,呢排都要節衣縮食,嚟緊開季都唔會買衫。上次股市跌極都有隻比較硬淨揸喺手,但今次就真係重創。我諗都要過埋個暑假,再睇定啲先,自己衰貪心,價位OK嗰陣又唔放,不過好彩今次蝕嘅都唔係應急錢。」

薛家燕要慳住使

另外,薛家燕在電台訪問時談及股市大跌,她表示兩星期前以為股市跌所以入貨,豈料低處未算低:「閒閒哋都蝕幾十萬,所以本身仲話想入,但助手話都係再睇定啲,因為全世界都跌緊,所以唔緊要擺(口係)度等一年,好在我唔等錢使。D錢擺(口係)度都只係數目字嚟,好似買樓升咗好多都唔會即刻賣樓。(驚唔驚股市再跌?)可能會,因為國內經濟唔好,香港都係,呢段時間咪睇住嚟使,好在我一直都咁慳,唔會大使。」

第一手消息請下載on.cc東網iPhone/iPad/Android Apps
Chilam賺埋一鋪清 股神淪陷被抄牌的Chilam匆忙上車離開。在股巿損手的薛家燕表示要慳住使。
鍾意就快D Share啦!
Related Posts Plugin for WordPress, Blogger...