2015年10月10日 星期六

Bob小春貓晒 爆粗掟咪險互片 小春,林盛斌,Bob,陳小春,



酒後失儀,搞寸Party!節目監製錢國偉(Wilson)與陳宛蔚前晚大婚之喜,廣邀圈中好友出席,但賓客之一的林盛斌(Bob)疑因飲大兩杯後,跟同樣有醉意的陳小春在婚宴上發生衝突,繼而互有爆粗兼掟咪贈興,令現場一度充滿火藥味,要鄭伊健等「古惑仔」兄弟團出手解圍。事後Bob承諾會反省,與小春向Wilson道歉! 文:音樂組 攝:司徒國榮、鄭家俊

眾「古惑仔」唱歌期間,Bob突然衝上台搞搞震兼爆粗。

有醉意的小春即扯火兼用粗口還擊,被眾兄弟拉落台。

Bob被林曉峰和江欣燕拉到一旁密斟。

小春被洪天明等拉入新娘房冷靜。

未幾小春已回復笑容與錢國偉和賓客影相。

醉到啤啤夫的Bob將眼鏡掛上額頭,並與好兄弟梁烈唯咀嘴兼晒V,更高呼:「小春係我偶像!」

圈中人緣極佳的Wilson前晚小登科,於尖沙咀洲際酒店設宴,雲集歌影視紅星到賀,不少賓客輪流上台以歌聲祝賀一對新人,場面熱鬧。惟酒過三巡後,不少酒量淺的賓客已不省人事或表演「貓步」,其中Bob更是表表者。

事緣在宴會尾段,正值鄭伊健和陳小春一眾「古惑仔」兄弟團深情演繹《友情歲月》等歌曲之際,醉爆的Bob衝上台「搞搞震」兼爆粗,因而「辣着」同樣有醉意的小春,立即發火用粗口還擊兼掟咪,而且想作勢衝向Bob!一班兄弟見勢色不對,怕兩人出事即上前分開他們,拉走明顯已經腳步浮浮的小春入新娘房冷靜,未幾小春已回復常態與眾賓客影相,而醉到啤啤夫的Bob則被林曉峰(阿Lo)拉到一旁密密斟。

阿Lo:決定擇日重賽

到凌晨一時許,醉得啤啤夫兼將眼鏡掛上額頭的Bob,在梁烈唯的陪伴下離開,等的士期間Bob突然大叫:「梁烈唯係我好兄弟!」 問到是否跟小春有爭執?已神志不清的他不停說:「冇事,咩事都冇,小春係我偶像!」之後更跟唯唯嘴對嘴,擾攘一輪才離開。

到有份拉開Bob的阿Lo離開時,開腔淡化事件:「所有朋友上台都係為咗開心啫!因為飲咗酒,我發覺娛樂圈朋友好放鬆,佢哋淨係識四個字啫!就係恭喜發財,阿Bob講咗喎!小春回應唔切,佢只係講咗多謝晒,四比三輸咗,跟住我哋決定擇日重賽,所以希望Wilson搞After Party。」

Wilson其後受訪時表示大家都為喜事而來:「係有小小事,嗰啲叫氣氛,大家後來都冇事,亦表現出我哋歲月友情嘅氣氛!」他承認席間有人爆粗,但已過去:「總之大家冇事,Bob最後同我講,我哋繼續,連小春都有同我講繼續,冇問題Bob同小春都好開心!電影都係咁啦,頭先就『起承』之後就『轉合』咪冇事囉!」

咀完唯唯斷晒片

Bob自知酒後失儀,除即場上台向所有賓客道歉外,事隔一晚,昨日受訪時認錯:「唔好意思,我斷晒片,完全冇印象咀過唯唯,點返到屋企都唔知。隱約記得自己係咁溝酒飲,臨走前同小春講唔好意思,佢話得啦得要向小春夫婦鄭重道歉,咁失禮,希望佢哋見諒。今次係好好嘅教訓,以後會控制吓酒量。」他晚上再在社交網發文道歉:「我醒來一個人靜靜地想清楚,我係冇好好控制自己!我需要好好咁去……反省!不好意思,令大家擔心,對唔住。」而小春昨日受訪時表示:「件事解決咗(口架)喇!冇晒問題,多謝大家關心。」據知,小春在Wilson和一班好友的Group Chat中,向Wilson道歉,Wilson亦稱沒有放在心上。

眾「古惑仔」唱歌期間,Bob突然衝上台搞搞震兼爆粗。

有醉意的小春即扯火兼用粗口還擊,被眾兄弟拉落台。

Bob被林曉峰和江欣燕拉到一旁密斟。

小春被洪天明等拉入新娘房冷靜。

未幾小春已回復笑容與錢國偉和賓客影相。

醉到啤啤夫的Bob將眼鏡掛上額頭,並與好兄弟梁烈唯咀嘴兼晒V,更高呼:「小春係我偶像!」

鍾意就快D Share啦!
Related Posts Plugin for WordPress, Blogger...