JC大肚旅行等求婚
「警鐘胸」女模Jessica C.（JC）昨日偕男友安志杰（Andy）現身活動，久未露面的她谷奶兼肚凸凸，孕味極濃，她大爆男友陪她在橫店拍劇一個月，莫非朝夕相對造人成功？Andy指未足三個月不能公布及準備結婚，默認快將做老竇。文：名人組
上圍Big爆的JC，腹部亦同樣凸出。
肚凸凸的JC與男友安志杰不停打情罵俏，更大讚他是好爸爸。
安志杰與女友Jessica C.昨日以情侶檔出席活動，早前離港到橫店拍劇的JC以一襲超V長裙出席，勁晒澎湃上圍，然而腹部同樣脹卜卜，十足孕婦，現場見她特別呵護小孩，又蹲低與小朋友合照。與Andy拍拖一年的她，在男友面前如小鳥依人，又拖又翹手，更不時為Andy拭汗及玩餵食。
大讚男友好爸爸
JC在台上大爆在內地拍劇期間，因拍打戲很疲倦，幸得男友陪伴照顧，大讚他是完美化身。問到是否可以「恭喜」兩人？Andy笑說：「恭喜佢喺內地拍完三個月劇集，要開槍同好多動作。（JC身體唔好要照顧？）掛住佢，上咗去陪佢一個月。（趁機造人？）哈哈！（係咪未夠三個月唔講得？）係。（幾時結婚？）佢仲有嘢要做，我計劃緊。」
JC指拍劇體力消耗多，故吃多了，笑說肚內的全是飯，但未否認有喜，不過Andy踢爆JC大食，特別愛吃芝士。JC說：「我哋拍拖就嚟一周年，會去旅行，帶我去一個好浪漫嘅地方。」問到此行是否旅行結婚？JC雙手掩耳，向Andy撒嬌說：「唔好講，我想有驚喜！」Andy表示旅行後有好消息公布。雖然未求婚，但已有做父親的心理準備，他坦言視JC為結婚對象，JC亦大讚男友會是位好爸爸，當眾打情罵俏。
Jocelyn戥老友開心
JC經理人Christine昨日回覆記者，未有否認JC有喜：「佢喺橫店拍劇，幾日前先返嚟，差不多兩個幾月冇見佢，佢部劇已經拍完，嚟緊會出席啲活動。」此外，名模Jocelyn及老公Anthony昨晚出席另一場合時表示很久沒見過JC，聞言即開心表示很美妙，對於外國人是否同樣有未足三個月不能透露懷孕的傳統，她說：「都有咁嘅傳統，三個月唔穩定，想確定BB嘅健康先至講。」
上圍Big爆的JC，腹部亦同樣凸出。
肚凸凸的JC與男友安志杰不停打情罵俏，更大讚他是好爸爸。
|
鍾意就快D Share啦！
|
|
|
