【誤以為係同志】與鄧超脷疊脷濕吻 呂頌賢：死就死啦﹗
2015-10-10 13:51:00
呂頌賢對於拍男男濕吻戲，就話冇乜Feel，又謂拍攝時順利完成。
呂頌賢同太太麥景婷噚日喺中環，為一間素食生活館開張任嘉賓，兩人受訪時透露，喺上海與邵傳勇合夥，開設一間素食火鍋店，即將同吳啟華及歐陽震華拍檔開分店。
早前呂頌賢同內地男星鄧超合作拍攝電影《烈日灼心》，兩男有幕脷疊脷濕吻戲惹起極大迴響，呂頌賢話：「個個都話幾好，內地觀眾對我陌生，記得我係令狐沖，睇完仲以為我係基佬，但網上睇返意見唔錯。」
講到要同男對手濕吻，呂頌賢笑言：「冇乜feel，死就死啦，男同女對手唔同，如性感美女會諗多咗，我同鄧超有開會，拍時有同志指導，好順利好快完成。」
太太麥景婷就話：「睇嘅時候點解得咁少？」呂頌賢繼續講解：「拍時分幾鐘，只剪咗幾秒出嚟，今次打破內地審批尺度，內容講男與男同公安等，涉及唔少禁忌。」電影會競逐金馬獎獎項，呂頌賢話導演答應佢會有長版本曝光。
（攝影：陳俊強）
呂頌賢同麥景婷表示會喺上海與邵傳勇合夥，開設一間素食火鍋店。
wowowowooww
|
鍾意就快D Share啦！
|
|
|
