掃呢頁CODE去手機

2016年1月21日 星期四

王家衞落場執手尾  Angelababy等運到 [壹週刊 - 1350] __,Angelababy,王家衞,楊穎,M1,

探熱針王家衞落場執手尾 Angelababy等運到成為黃太的Angelababy(楊穎),近年憑真人騷《奔跑吧,兄弟!》名利雙收,下一個目標,自然係想攞獎!千揀萬揀,最終以《擺渡人》作為攞獎台階,希望得王家衞及梁朝偉兩人之助,企穩影圈一線。無奈導演張嘉佳是新手,監製王家衞唔收貨,要重執導演筒收拾殘局,仲要親自落手,從頭嚟過!《擺渡人》分分鐘好似《一代宗師》,有排出唔到出街。放棄度蜜月內地真人騷《奔 ...


探熱針

王家衞落場執手尾  Angelababy等運到

成為黃太的 Angelababy(楊穎),近年憑真人騷《奔跑吧,兄弟!》名利雙收,下一個目標,自然係想攞獎!千揀萬揀,最終以《擺渡人》作為攞獎台階,希望得王家衞及梁朝偉兩人之助,企穩影圈一線。無奈導演張嘉佳是新手,監製王家衞唔收貨,要重執導演筒收拾殘局,仲要親自落手,從頭嚟過!《擺渡人》分分鐘好似《一代宗師》,有排出唔到出街。

放棄度蜜月

內地真人騷《奔跑吧,兄弟!》大收,帶挈 Baby摩打手做不停,單是電影, Baby過去兩年一口氣拍了八部,當中包括荷李活電影《天煞——地球反擊戰 2》。拍極唔完,但王家衞監製的電影《擺渡人》搵上門,即使拍攝期要橫跨與黃曉明的婚禮,搞到冇時間度蜜月, Baby都照接,無非是睇中久休復工的影帝梁朝偉,和負責監製的王家衞這兩張牌,可助她升格。

「呢兩年 Baby喺國內真係好紅同拍好多電影,佢亦明白自己多人搵係同佢嘅人氣有關,而唔係演技, Baby覺得同梁朝偉、王家衞呢類星級合作,有賺冇蝕,所以寧願犧牲唔去度蜜月,同期又騎住部微電影《微微一笑很傾城》,都堅持攝時間拍《擺渡人》。」一名 Baby的同事透露。

原著作者兼導演張嘉佳(左一)雖然有影帝助陣,但因為冇拍戲經驗,結果被監製王家衞擺歪。

《擺渡人》拍吓停吓,梁朝偉唧到時間陪老婆劉嘉玲飛去日本度假。

收拾殘局

內地很多作家做埋導演,由暢銷小說《從你的全世界路過》其中一章《擺渡人》改編的,亦由原著作者張嘉佳親自執導,王家衞負責監製。導演新手,開工不夠兩星期,王大導便親自落場,收拾殘局。

「導演冇經驗,鏡頭、燈光點擺都唔清唔楚,就算高佬(王家衞)經常落場教路,但始終拍唔到佢嘅心水,與其拖落去,高佬決定自己拍番。」一名劇組工作人員透露。

王大導習慣慢工出細貨,夜晚戲就算拍室內,都要啱 mood堅持夜班通告,拍攝進度 keep住慢,原本預計農曆年前完工的計劃,幾乎不可能。

「個室內搭出嚟,燈光遷就,幾時開工都得,但導演一定要夜晚戲就夜晚先開,如果開埋日班,肯定可以快好多。」工作人員說。

農曆年前搞掂無望,但之後王家衞另有 project,男主角梁朝偉更加要去歐洲拍另一部戲, Angelababy想借二人之力再上一層,睇怕要耐心等候。

去年十月, Baby同黃曉明在上海舉行童話式婚禮,人氣更上一層樓。

Baby進軍荷李活,在《天煞——地球反擊戰 2》做戰機機師,但佔戲不多。

拍罷《一代宗師》後,梁朝偉身心俱疲,抖足兩年多才肯復工。

摩打手做唔停的 Baby,早前患重感冒發高燒,都要頂硬上開工。

慢慢來

王家衞拍戲,一個慢字,拍攝時間難以估計,製作成本變成天文數字。

《一代宗師》

02年,王家衞公告開拍功夫片《一代宗師》,男主角梁朝偉花大半年時間學詠春,做定準備,但計劃一拖五年遲遲唔開機,搞到版權到期,被黃百鳴搶到頭啖湯,甄子丹亦憑《葉問》正闖一線。其後王家衞再花一年時間搵景,邊拍邊剪,最終拍攝期長達五年, 13年上映,耗時十一年。

《 2046》

99年開機,其間劇本不停改,加上停吓拍吓,更有傳因為沒完沒了,令章子怡、木村拓哉一度考慮打退堂鼓,電影 04年上映,拍足 5年,耗資 1,500萬美元。

《花樣年華》

97年開始籌備, 99年正式開拍的《花樣年華》,經歷十五個月拍攝時間,是王家衞最快手的一部戲,有指電影耗近四十萬呎菲林(約十部電影菲林量)。

撰文、攝影、攝錄:娛樂組


鍾意就快D Share啦!