熱爆娛樂: 換 2千萬新樓請 3工人　陳志雲繼續豪使 [壹週刊

2016年1月21日星期四

換 2千萬新樓請 3工人　陳志雲繼續豪使 [壹週刊 - 1350] 志雲,M1,陳志雲

娛樂偵訊

換 2千萬新樓請 3工人　陳志雲繼續豪使

現任商台首席智囊的陳志雲，在職無綫時被指收受利益，上月被判罪成及罰款 8萬 4千元，大步𨂾過唔使踎監，但拖拉超過五年的官司，已令他花掉 600萬。

財來有方！去年陳志雲以 3100萬放售持貨 14年的雅麗居，賬面進賬 1900萬！即時樓換樓，以 2200萬買入北角新盤柏傲山。新居未入伙，陳志雲暫住月租 8萬山頂文輝道前政府宿舍，有司機有三個工人，繼續豪。

驚要坐監

在無綫呼風喚雨的陳志雲，一○年三月被廉署高調拘捕，指他與當時的助理叢培崑收受利益，雖然兩度審訊被判無罪，但去年十月上訴庭推翻原審判決，要原審法官潘兆童將他定罪及判刑。由於一度有揣測陳志雲可能被判入獄，因此當法官宣判他只須罰款，陳志雲如釋重負。

「單官司搞咗咁耐，佢已經身心俱疲！一一年被判無罪， Stephen都以為冇事，諗住喺商台再大展拳腳，就算一二年嗰次重審，佢都好有信心，唔似得今次咁忐忑，因為上訴庭要原審法官定罪判刑， Stephen唔知法官會點判，最驚係要坐監，所以佢都好擔心！」陳志雲友人說。

陳志雲與林姓密友行去食飯期間，刻意保持一定距離。

當晚約了林以諾牧師及 Moiselle太子爺陳柏熹等好友飯聚的陳志雲，離開時逐一揮手話別。

代價大

最終判罰款八萬四千元，避過牢獄之災，但這場耗時五年多的官司，律師費驚人，由審訊初期，陳志雲毫不猶豫聘用資深大律師謝華淵及其副手，連同事務律師的費用，至今已花過六百萬。

「 Stephen係個好有諗法嘅人，佢覺得錢財係身外物，當時身邊朋友提議佢用謝華淵，因為對方最叻打貪污案，律師費當然唔平，但 Stephen認為最重要係打贏官司！」

被指在職無綫期間秘撈，未經同意收取 11.2萬酬勞而惹上官非，代價之大，天文數字計。但陳志雲投資有道，就算唔見一截，仍然繼續富貴。

柏傲山位於北角天后廟道，要今年三月才正式交樓。

任職無綫總經理期間，與鍾嘉欣、楊怡、陳敏之、楊思琦影賀年相，陳志雲當時絕對紅過一班花旦。

返到屋企，陳志雲一馬當先行去㩒𨋢。

賺多幾百萬

去年三月，陳志雲以二千二百萬買入北角新盤柏傲山一個高層單位，並同時將持貨十四年，○一年買入的雅麗居成功放售，賬面獲利千九萬，換樓零壓力。

「一四年律政司第二次上訴得直，單 case要發還重審，又要繼續使錢打官司，當時好多朋友叫 Stephen賣咗雅麗居間屋套現，但佢睇好個市，舊年先賣仲賺多幾百萬！」

柏傲山新居收樓後還要裝修，預計年底才可以入伙，去年陳志雲以每月八萬元，暫時租住山頂文輝道前政府宿舍。

「間屋有成二千三百幾呎，又有個大露台，雖然樓齡高，但 Stephen鍾意嗰區夠靜，但要打理咁大間屋，佢請咗三個工人，加埋司機，開支都唔少！」陳志雲友人說。

林姓密友細心幫陳志雲開車門。

陳志雲在無綫呼風喚雨，當年《勁歌》頒獎禮，亦由他操生殺大權。

陳志雲是方逸華契仔，更是六叔六嬸身邊紅人。

密友擋頭

本週日（一月十七日）下午五時多，陳志雲由林姓密友陪住到金鐘太古廣場行超市，上糧之外，還買了大堆過年揮春，之後由司機接載，一齊返回山頂文輝道寓所！

同日晚上七時，二人又再孖咇出動，原來陳志雲約了於這幾年來與他並肩作戰的林以諾牧師，以及 Moiselle太子爺陳柏熹等友人飯聚。一餐飯食足三個鐘，離開時，陳志雲同眾人揮手道別後，便與林姓密友一齊坐上官司結束後才買入的凌志新車返歸；上車時，密友用手擋一擋，以免陳志雲碰到頭，勁細心！

當年愛將崔建邦、鄧健泓，先後因陳志雲失勢而疏遠他。

陳志雲仔細拎起揮春睇效果，密友則在旁俾意見。

陳志雲除擔任商台首席智囊，每朝更有份主持《在晴朗一天出發》。

行完超市，陳志雲先上車，司機則落車幫手開車尾箱，讓林姓密友將戰利品放好。

返抵文輝道寓所，陳志雲先上樓，林姓密友則攞齊物件再上樓。

大上大落

現年 56歲的陳志雲， 92年獲商台挖角唔打政府工；兩年後再轉投無綫電視，擔任節目總監， 04年被升任電視廣播業務總經理，年薪高達 400萬！職位三級跳，陳志雲一度是六嬸方逸華身邊大紅人，陳總更粉墨登場，主持節目《志雲飯局》，訪問巨星名人，其時身邊陪出陪入的藝人被稱「迷雲黨」，成員包括：鄧健泓、崔建邦、王喜、陳敏之等。

10年，陳志雲涉嫌貪被捕，即時被停職，翌年 9月，陳志雲被裁罪名不成立，當庭釋放，無綫隨即恢復其業務總經理權責；同年尾，他向無綫請辭， 12年 3月，出任商台行政總裁， 14年轉任商台首席智囊。