俞琤與「小小超」李澤楷多年來一直關係密切，二人曾結伴出席《 2046》首映，當時有記者問小小超為何不約女伴？他笑指：「依家咪拍緊拖囉！」俞琤地位可見一斑。
娛樂偵訊
始終最愛小小超 俞琤過檔 now揸旗
上月俞琤忽然宣布辭任商台副主席及董事，有傳她此舉是為將要做密友何超瓊幕後軍師而部署，不過當事人對外界的揣測一直未有作出回應。本刊得悉， 61歲的俞琤滿腹大計，甚至已秘密同好友「小小超」李澤楷傾掂數，四月會過檔旗下的 nowTV（已易名 ViuTV）揸旗，加入打電視仗。
長期合作
俞琤在商台效力逾四十載，○三年一度過檔小小超的「盈科天馬動力」，做過十六個月行政總裁，之後再回歸商台。○八年雙方再合作搞「天比高創作夥伴」計劃，兩人更不時相約飯局，結伴出席公開場合，保持夥伴關係。
上月在商台聖誕聯歡會上，俞琤突然宣布元旦日正式離開商台，全台同事譁然。一直未有公布去向的她，其實將會過檔四月開台的 ViuTV，幫小小超發展免費電視業務，力拼大台無綫。
「上星期有高層 call meeting，同我哋講 YT（俞琤）會嚟睇我哋，叫我哋醒定啲！因為嚟緊要打仗。不過消息未可以對外公布，高層下咗令，叫大家唔好傳出去。」知情人說。
有指近年因為政府與商台抗衡，甚至不斷有傳今年八月商台會續唔到牌，令俞琤心灰意冷，加上 ViuTV四月開台，用人之際，李澤楷一直游說和他合作無間的俞琤過檔幫手，雙方一拍即合。
大力支持
俞琤轉會，其實有跡可尋。離開商台後，她高調現身《 100毛》雜誌舉辦的《第一屆毛記電視分獎典禮》，親自上台領獎，而 ViuTV亦全程獨家直播整個節目；據了解，在俞琤拉線下，小小超將會大力支持《 100毛》雜誌。
「《 100毛》創辦人林日曦、陳強以前喺商台跟過 YT，大家一直都有合作搞 project，所以好熟， YT久不久都會掟啲橋俾佢哋，大家亦師亦友。《 100毛》想大搞，咁就要有金主支持，反正要搵條大水喉， YT梗係益自己友嘅 Richard（李澤楷）」知情人說。
傳媒大亨
49歲的「小小超」李澤楷，多年來與傳媒結下不解緣。 90年創立衞星電視，三年後轉售傳媒大亨梅鐸，獲利 8億美元。攞住第一桶金創立盈科集團，赴新加坡借殼上市，旗下的電訊盈科，之後創辦互聯網平台 now.com.hk，並建立 now收費電視台。 03年與商台合作「盈科天馬動力」計劃，開拓網上娛樂節目，同時拉埋俞琤轉會，過檔擔任行政總裁。 05年購入大國文化集團，主力大中華地區的唱片、演唱會及舞台劇製作等，高峰時期旗下藝人有郭富城、古天樂、李玟、黃曉明等。
撰文、攝影、攝錄：娛樂組
|
鍾意就快D Share啦！
|
|
|
