日韓到會
SMAP神話不滅
每逢年頭總會有人預言今年會有人結婚、離婚、分手、復合等等，不過相信點都無人批到，日本天團 SMAP會傳出解散！消息震驚整個日本，連日來大篇幅頭版報導，重視程度仲緊張過日本股市下瀉！
SMAP出道已屆 25年，五位成員經歷過唔少風雨，雖然之前都曾經傳過解散，不過今次言之鑿鑿，唔通真係無彎轉？
公司高層內鬥
作為一個留意日本藝能界嘅迷妹， SMAP今次傳出解散，唔係空穴來風。早喺幾年前， SMAP所屬嘅尊尼事務所，已經分成兩派，一邊由社長喜多川 Johnny嘅姪女 Julie帶領，另一邊係手握公司一哥嘅經理人飯島三智。有指飯島一向野心重，上年就有雜誌訪問 Julie嘅媽媽 Mary，佢大發雷霆話唔容許有人僭越，仲當住記者面大鬧飯島，叫佢如果唔滿意就帶埋 SMAP離開，因此埋下伏線，飯島將會喺今年 2月辭職。
SMAP當年出道成績唔好，仲話過三年內做唔出成績就解約，當時飯島對佢哋不離不棄，知道靠唱歌行偶像路線唔 work，就改變策略主攻綜藝節目，要佢哋扮鬼扮馬，從而建立而家嘅入屋形象。五個成員都非常尊重佢，所有工作上嘅決定都要經過佢批准，所以今次佢辭職，外界都推測 SMAP會跟佢離巢。不過隊中王牌木村拓哉認為 Johnny社長對佢哋恩重如山，唔應該做反骨仔，於是偏向留低，形成 4對 1嘅局面。如果傾唔掂，最後 4位成員離開嘅話，佢哋以後就唔可以以 SMAP嘅姿態出現，甚至唔可以唱 SMAP嘅歌，形同解散。 Johnny事務所亦罕有發聲明，指事件喺協議當中，暫時唔會發表意見。有指 SMAP嘅合約於今年 9月到期，仲有時間拉鋸，且看最後天團如何拆解。
經濟損失天文數字
SMAP五位成員涉獵歌影視，打開電視每一日都有 SMAP嘅節目及廣告。木村拓哉主攻拍劇，組合未成名之前佢已經係日劇天王。其他四位成員亦各自搵定位，隊長中居正廣係金牌司儀，手執五個綜藝節目，又多次為紅白擔任司儀；稻垣吾郎同草剛分別因為危險駕駛同醉酒鬧事，令事業陷入低潮，最近積極向舞台劇界發展，成績不俗；年紀最細嘅香取慎吾形象親民，係各大廣告商嘅寵兒，最近為纖體公司擔任代言人，曝光率極高！有日本經濟學家分析，如果 SMAP真係解散，經濟損失高達 280億日圓（約 18.2億港元），難怪解散消息未經證實，已經驚動全日本！
SMAP
SMAP於 1991年出道，起初有 6位成員， 1996年森且行退出，以 5人姿態維持至今。近年佢哋主要作個人活動，以 SMAP名義一齊演出就有每星期綜藝節目《 SMAP X SMAP》，以及每兩年一次嘅巡迴演唱會。
撰文：關錦雯
|
鍾意就快D Share啦！
|
|
|
