網頁

請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2016年2月4日 星期四

玩 1世 劉小慧 [壹週刊 - 1352] __,劉小慧,M1,

豪語錄玩1世 劉小慧提早元宵猜燈謎——幸福餐單,猜某女歌手(答案在本欄找)。那一輩寶麗金女歌手,周慧敏好高貴,關淑怡好型格,黎瑞恩好唱得,劉小慧說:「我就好貪玩。」廿幾年過去,高貴的情郎偷食,型格的神神化化,唱得的豪門婚變;不變的,惟有劉小慧,她也嫁了,嫁着個同樣貪玩的草蜢蘇志威。拿起玩具槍,猶帶《急色鬼愛出位》況味,仍跳着紅番的土風舞嘩啦……玩,真可以玩一世。像遊戲過版,男朋友射個公仔送給你,婚 ...


豪語錄

玩 1世 劉小慧

提早元宵猜燈謎——幸福餐單,猜某女歌手(答案在本欄找)。

那一輩寶麗金女歌手,周慧敏好高貴,關淑怡好型格,黎瑞恩好唱得,劉小慧說:「我就好貪玩。」

廿幾年過去,高貴的情郎偷食,型格的神神化化,唱得的豪門婚變;不變的,惟有劉小慧,她也嫁了,嫁着個同樣貪玩的草蜢蘇志威。拿起玩具槍,猶帶《急色鬼愛出位》況味,仍跳着紅番的土風舞嘩啦……

玩,真可以玩一世。像遊戲過版,男朋友射個公仔送給你,婚後,你射個公仔送給女兒,再之後,師奶推推金幣亦足以過日辰。期望不老,不老的代價先要甘於平凡。劉小慧自嘲:「唔紅係有道理嘅。」

她永遠 MK,不只 stand for Mong Kok, stand for Mo Kau(無求)。

壞學生

劉小慧綽號「學生情人」,小學 Mary Knoll,古堡般校舍,似公主添,不過情人做得早,好學生便談不上。

「 Panasonic太子女都喺度讀。放學成街勞斯萊斯、 Daimler;我爸爸就係司機,媽咪揸保母車,接觸得多,於是千方百計送晒五兄弟姊妹入名校。

「我讀到六年班,考尾幾,不能直升,轉到西貢鄭植之,卻成了高才生,因為 build up番自信。香港教育制度是癌症,一個小結會變大結,好彩解除快。」

說得輕鬆,輪到身為人母呢?「初時我對大女很緊張,中學後便懂放手了;到細女,我寧願她留級來轉到一間較自由的。」

聖誕節,只帶大女去旅行,理由竟然係細女連一天額外假期都不願告。「愛返學到咁,她找着開心了。」

這天與細女來本刊影樓回程去公立圖書館借書做功課。

劉小慧其實是好學生,她至少誠實,貫徹對女兒。她不避忌在女兒面前吸煙。

「冇得呃嘅,我會同她們分析,凡事只有利弊,冇對錯。」

好情人

對於郭晉安,「各自都啤咗兩件,所以唔怕提。」

《豪語錄》遇過最大煙癮數羅嘉良了,一支駁一支,他告訴筆者:「小慧教我的,拍《成功路上》時。」按此推斷,劉小慧更加煙鏟吧?又不是。「我相信意念,樂觀咗先啦。那時他和郭晉安受同一個經理人壓迫得苦,我正和安仔拍拖嘛,就『導』嘉良解解憂,還幫他們出頭。」

主動提起前度,其實不應該提,觀眾只道劉小慧貪新(蘇志威)棄舊。

「除了小時候差勁的男朋友,一個圈外、一個安仔、一個老公,三個都嫁得過。同安仔,有緣,無分;會幸福嘅,他錫我,但我越咗位,擔任主導角色,在他人生最慘時,一齊咁多年,我好攰。他現在改變了,和我分手後,終於有勇氣站出來。我等他開始上番才離開,因為我係一個有雷嘅人。

「同居是對的,相處睇到微細,別等結婚慢慢磨合,錯晒!冇仔女,離婚亦冇問題;到生咗,為『唔捨得』三個字,咁就一世!」

前台後台

唱遊堂般的[!85D1]麗金年代。

劉小慧自己的路頗平順,靚女歌手,人做佢做。「唔同黎瑞恩,我音域窄。問可否拍戲為主,公司說:『唱歌易紅,矜貴啲,在台上係唯一主角。』我食個樣㗎咋!」

她更是亞洲首位推出 CD-Rom,興盛同時是危機—— CD-Rom宣告了家用電腦也可燒製老翻, MK智慧告訴她見好即收,然後唱片市道急跌。「還有電台鼓勵原創,但根本,有史以來的 hit歌通常 cover version;大家轉型做創作歌手,要聲色藝俱全已經難,仲要創作埋?我不裝模作樣的。

「演戲,高潮低潮有人拍住上;歌手呢,入行美麗,卻單打獨鬥,一冇便全部冇,哈,幾公平。」

如今,同輩紛紛復出還心願。「我零興趣,唯一一次在○五年草蜢演唱會,與阿細(蘇志威)合唱,適逢結婚周年, fans在網上提醒的,自己次次唔記得。我更 enjoy在後台煎牛扒,終於搞到紅館通告不准明火煮食。」

熱血師奶

雷氣到一地步,劉小慧退隱後最大新聞,出現於投訴版。

「陌生人辣着我,我會同你死過,有底冇面。我投訴電訊公司濫收費用,朋友笑:『唏,你唔志在啦,是否搏宣傳?』搏宣傳不揀咁肉酸嘅事,我被呃喎!電訊公司好快俾番錢,記者問:『仲報唔報導?』我話照報照出鏡,要開個先例,讓其他用戶免受影響——大貪總由小貪起。

「對黎瑞恩之前嫁得好,我們冇聯絡,甚至因一點誤會反咗面。到她出事(婚變及患癌),我陪着她,直至一天我話:『阿恩,負面夠了,做不成夫婦,不等如做仇人,每件事你都有份參與。』

「有個 case俾老公打,任誰審判,一定男人唔啱,但點解你容許他長期虐待?如果結識第一日就打你,你都唔受溝點解有問題唔即刻解決?」

劉小慧說 case,因為她搞了個網上節目,推廣新心靈運動,主持之一的黎瑞恩寡言,她便由此助她開放自己。劉小慧還學中醫、學拔罐,但學生時代陰影發作,「醫朋友便好,考唔考 cert算罷啦,我不想俾人告。」節目名叫《講乜靈嘢》,應該又是她的 MK鬼主意。

「很多人幫我,首先我願意幫人,由介紹律師到介紹買個煲,乜都識啲。朋友叫我『劉太』,因為我永遠流流哋。」

講數夫妻

流流哋成為蘇太。

「大住肚大排筵席,當年女歌手甚少咁高調,其實一早在美國註冊,大家覺得我未婚懷孕,信又好,唔信又好,我需向 BB有交代。」

無論如何,劉小慧欠缺說服力,講心靈康復,她不夠反面教材。

「我代表着年齡中位數,大部分人像我,四十幾,兒女十歲八歲,悶悶哋,一樣需要。

「怎會沒挫折過?九八年金融風暴,老公生意走下坡,草蜢未 hit番,我佗住大女搵湯記(湯寶如),因為她 keep住登台,喊住話:『幫我接 show,我生完用最短時間修身。』結果我又唔使點做,老公有些新 idea,做 trading,重上軌道。但我相信,如果我沒釋放那種正能量,事情不會變好。

「冇飯開都試過,過咗去唔怕講。」

居安思危,瓣數愈多愈好。

「插秧啦,我做吓爛鬼軍師,唔齋死娛樂圈,不可能唱到老,跳舞少啲, fans會唔高興,草蜢自己都唔高興。

「阿細同台上一樣,極度貪玩、長不大,做人做到咁,開心嘅,唔玩女人就得。我們每晚坐在廚房,至少傾一粒鐘,互相報告一天發生了什麼事。有些夫妻認為要保存私隱,久而久之咁就出事嘞。

「阿細係『數佬』,乜都計一餐,大女五、六歲時,他說:『正因為我們太愛佢,有咩事豈不 total lost?』於是生出細女,如今兩姊妹作伴——開心可以計出來。

「真係愈計愈開心,睇中部弧形屏幕電視,老公話:『貴成幾千蚊。』我話:『一萬蚊買支紅酒又捨得?成屋人日日睇喎。』於是我領悟出一啲道理,你話人生幾得意?」

男女不公平,蘇志威也好,郭晉安也好,長做長有。

「我就 enjoy唔使做。」

大女十六歲,細女八歲。

從不高調晒恩愛,但興到公開嘴都得。

黎瑞恩與金利來太子婚變,劉小慧講得比當事人更肉緊。

謎底

叫我『劉太』,因為我永遠流流哋。

她真是留小胃,訪問這天正在斷食,最高紀錄八十小時,只喝水;她同時愛吃愛煮,送上自製 XO醬給筆者作見面禮(在此鳴謝)。

失名校學席而不自暴自棄,吸煙而不過量,學中醫而不求文憑,熱血而自嘲,在在不計較;但她又享受計較的樂趣,這才叫留小胃。

你仲搵緊燈謎的答案?抑或根本不知,幸福近在眼前?

撰文:余家強

攝影:梁炳權

攝錄:胡春輝

協力:蘇韻詩

化妝: Yvonne@Private i Salon

髮型: Perry@Suave


鍾意就快D Share啦!


Related Posts Plugin for WordPress, Blogger...