2016年2月18日 星期四

情人節韓流襲港 男神女神各出奇謀 [壹週刊 - 1354] __,女神,M1,

《RunningMan》人氣女主持宋智孝來港出席活動,見到假「Gary」求婚,佢立即笑到見牙唔見眼。外太空情人節韓流襲港 男神女神各出奇謀2月14日呢個日子,就好似一個魔咒,情侶要諗點樣慶祝,單身要諗點樣避風頭。其實,邊個話單身唔可以慶祝情人節?韓星總是照顧到粉絲們嘅需要,情人節當日就有兩位風頭躉嚟到香港,與粉絲共度情人節,分別係《RunningMan》女神宋智孝,以及FTISLAND主音李洪基。 ...


《 Running Man》人氣女主持宋智孝來港出席活動,見到假「 Gary」求婚,佢立即笑到見牙唔見眼。

外太空

情人節韓流襲港 男神女神各出奇謀

2月 14日呢個日子,就好似一個魔咒,情侶要諗點樣慶祝,單身要諗點樣避風頭。

其實,邊個話單身唔可以慶祝情人節?韓星總是照顧到粉絲們嘅需要,情人節當日就有兩位風頭躉嚟到香港,與粉絲共度情人節,分別係《 Running Man》女神宋智孝,以及 FTISLAND主音李洪基。兩位都非常識冧 fans,無論單身男定單身女,一樣有個甜蜜情人節。

宋智孝 獲「 Gary」求婚

《 Running Man》喺亞洲各地大受歡迎,一班主持全部人氣高企,唯一女將宋智孝特別受大家喜愛。智孝到訪香港出席商場活動,同 fans一齊共度情人節。佢拎住貓紙,一出場就用廣東話打招呼,仲向在場觀眾拜年講「恭喜發財」。喺情人節呢個日子,智孝嘅出現梗係令人聯想到佢嘅熒幕好拍檔 Gary,雖然佢哋今次唔係一齊嚟,不過依然「形影不離」。先係智孝開金口唱 Gary所屬組合 Leessang嘅《關掉 TV》,玩遊戲嘅時候又有男 fans戴上 Gary嘅面具向佢求婚, fans不斷大叫 Gary嘅名,搞到智孝不禁呷醋,話自己同 fans喺香港過情人節好開心,唔使搵 Gary!智孝一向出名錫 fans,特別自費準備咗六十份朱古力作為情人節禮物送俾 fans,簽名、抱抱、自拍有求必應,咁識做,抵佢咁紅!

又簽名海報又送朱古力,智孝準備咗咁多禮物俾 fans,非常貼心。

之前智孝同吳克羣合唱國語歌《你好可愛》,佢拎住貓紙表演一小段,非常緊張。

Fans有機會被揀中玩遊戲,立即拎出手機同智孝自拍,難得佢非常親民,任影唔嬲。

李洪基 化身愛情專家解疑難

FTISLAND主音李洪基上年開始單飛活動,舉行個人巡迴,最後一站撞正情人節喺香港舉行。有別於一般嘅演唱會,今次嘅演出好似電台節目,李洪基化身電台 DJ,讀出預先喺網上收集嘅點唱信。傾得開心,佢仲唱咗幾句吳業坤嘅《陽光點的歌》同應節嘅《財神到》,俾 fans一個驚喜。不過寫得點唱信,通常都係為情所困,李洪基做 DJ做得好稱職,同 fans分享自己嘅愛情觀,例如直認自己鍾意靚女,唔介意直接抄靚女 fans牌。另一個 fans就話自己鍾意咗男同性戀者,佢就話自己去外國旅行夜蒲時,特別吸引男同性戀者埋身,搞到佢嬲到爆粗!呢個一邊傾偈一邊唱歌嘅形式幾特別, fans又可以更加了解偶像,雖然講嘢多咗,不過都唱到廿幾首歌,包括代表作《話說》及《原來是美男》主題曲《依然》等等, fans應該覺得值回票價

李洪基首先單飛來港開騷,以電台節目形式進行,讀點唱信環節大受歡迎。

今次嘅歌曲以李洪基上年推出嘅個人大碟為主,另外仲有多首佢曾經唱過嘅電視劇主題曲,大展唱功。

有 fans特別送上紅酒,洪基一見到立即雙眼發光,一邊飲酒一邊唱歌都真係少見。

適逢情人節, fans準備好多禮物俾偶像,呢個公仔似乎最得佢歡心。

撰文:關錦雯

攝影、攝錄:胡春輝


鍾意就快D Share啦!
Related Posts Plugin for WordPress, Blogger...