城城猴王拜年
今日踏入大年初一火猴年，萬象更新，天王郭富城恭祝香港市民萬事如意！天天開開心心！因為腳部受傷關係，城城無奈辭演春晚扮演美猴王演唱新歌的環節，經理人公司見他辛苦了一年，決定今年春節提早讓他放假！昨晚除夕，城城相約母親和兄姊等親友一起吃團年飯，今早大年初一就回母親家拜年。
撰文：陳月媚
郭富城在賀歲片《西遊記之孫悟空三打白骨精》扮演孫悟空，該片在內地的宣傳攻勢可說是鋪天蓋地，令不少中港台歌星爭崩頭想演出的央視春晚，今年亦想邀請城城上節目扮演美猴王演唱該片的主題曲，表演時間約5分鐘，必須又唱又跳配合表演。但由於城城的膝蓋十字韌帶斷裂，不能做劇烈動作，在醫生勸告下，他還是聽話乖乖辭演，昨日城城大嘆可惜：「喺猴年可以扮演美猴王上央視春晚表演係好難得，𠵱家做唔到係好可惜，但隻腳𠵱家行路都有啲痛，跳舞根本冇可能，好難夾硬做，冇辦法。」
【猴王駕到】
■城城在新戲演的孫悟空，獲不少觀眾大讚動靜、眼神都似足美猴王。
攝影：林德雄
陪媽咪食團年飯
幸好城城的腳傷不算太嚴重，但礙於他不能再做劇烈動作，而且需要休息，所以最近要跳舞的工作他都全部推掉，經理人公司更提早讓他休息，由除夕開始放假，可以陪家人吃團年飯。昨晚他相約了母親、姊姊和哥哥一起過節，城城昨表示：「原本媽咪想話喺屋企食，覺得喺屋企裏面食團年飯會開心啲，但佢年紀咁大，叫佢咁傷神整餐團年飯，我就唔想，所以同媽咪講，出街食算寧願食完飯再陪佢返屋企傾吓偈。」
在今日大年初一，城城會一早返母親家向母親拜年，然後會陪她吃飯，他說：「平時飛嚟飛去做嘢，真係冇乜時間可以陪吓佢，咁屋企比較傳統，好重視過年，所以今年有幾日假，咪盡量抽時間陪吓屋企人，大年初四就要返上海繼續拍戲，原本諗住先搞掂隻腳先返戲組開工，但諗諗吓都係唔好拖人，等3月幫部戲埋完尾，自己就停工，安心去入院搞好隻腳先。」
【家宅平安】
■今日是大年初一，孝順的城城會返母親家拜年，陪她吃飯。
【福星高照】
■城城因腳傷提早放假，有多點時間陪家人吃團年飯，可算是因禍得福。
【恭喜發財】
■城城日前接受本報專訪，提早恭祝香港市民萬事如意、開開心心！
膠水黐到皮膚爛
城城指猴年對他有特別意義，因為他演出的《西》片在賀歲檔期上映，他演的孫悟空大戰星爺的《美人魚》，雖然未知票房成績如何，但不少看過電影的觀眾都讚他扮演的美猴王不單動靜神似，連眼神也會演戲。
城城談起拍攝時的辛酸史，表示十分難忘：「其實演呢個角色之前，我都留意咗好耐馬騮啲動靜，導演鄭保瑞同動作指導洪金寶大哥都畀咗唔少意見我，希望大家滿意我嘅表現，因為演呢個孫悟空真係好辛苦，每次開工都要用幾粒鐘化妝，同埋着住件肌肉衫後，皮膚透唔到氣，又去唔到廁所，真係好難頂，一拍就14、15個鐘，到落妝嗰陣，塊面因為長時間黐住膠水，皮膚都爛晒，所以拍一日，要停兩、三日先可以繼續開工。」
化妝：郭艷君
髮型：Ian Wong
服裝：I.T
場地提供：帝苑酒店
|
鍾意就快D Share啦！
|
|
|
