坤哥同溫拿本來大纜都扯唔埋，但經倫伯欽點後，有溫拿嘅地方，坤哥都可以自由出入
真面目
過肥年 升呢做男一 倫伯欽點坤哥做𡃁版溫拿
加埋過 300歲的溫拿出道 43年，近年多次舉行復出演唱會搶錢。
有指今年農曆新年的演唱會舉行後，溫拿就會「終極解散」，其實倫伯都 65歲，退休都係時候。
從此無咗溫拿？唔會！倫伯近日和邵氏已經部署緊開拍「少年版溫拿」電影，倫伯仲欽點近期紅人坤哥吳業坤做男一，在初步 casting時，坤哥扮演與自己有 8成似的陳友。怕飾演陳友戲份唔夠多？唔怕！編劇嘅嘢，好死啫！
《超級巨聲 2》出身， 25歲吳業坤出道 5年，一首〈原來她不夠愛我〉令他橫掃樂壇頒獎禮多個獎項，更估唔到連樂壇校長譚詠麟都睇中坤哥，孖邵氏開戲俾佢做男一！
最似陳友
據知待農曆年的《溫拿 NEVER SAY GOODBYE演唱會》舉行完畢，便會着手與邵氏開「少年版溫拿」電影，仲預埋坤哥、胡鴻鈞和馮允謙飾演溫拿成員。
倫伯早前已與邵氏高層樂易玲開過會，倫伯更點名想坤哥參演做男一，同樣對坤哥寵愛有加的樂易玲當然舉腳贊成。據知坤哥甚有機會被安排飾演陳友，而劇本方面亦因坤哥為男一而加重大量陳友戲份；樂小姐同時提議加埋馮允謙和胡鴻鈞，實行《巨聲》幫拍住上。
踩上門偷師
上月 27日，溫拿為演唱會進行練習期間，坤哥踩場探班，倫伯事後更在微博笑指坤哥和陳友似樣；而坤哥亦在 instagram上寫住「偷師」，一來為歌唱技巧偷師，其次其實係揣摩角色。
坤哥氹得人歡心，除得張敬軒在台上激讚工作態度有熱誠後，又有倫伯開到聲點名升格做男一，呢期坤哥真係行運行到落腳指尾喎！
𡃁版未必好
𡃁版乜乜乜都唔係新鮮嘢，不過翻拍又係咪咁多人鍾意睇？未必！好似以下呢幾部，收視、口碑都只屬一般。
《少年五虎》
早於 93年，大台已經搵咗朱健鈞、魏駿傑、蘇永康、鍾漢良、鄭敬基和阮兆祥幾位藝員扮演溫拿，但劇名就改做《少年五虎》嚟掩人耳目，不過收視未有吸引到大班溫拿迷。其中係得鍾漢良叫做在台灣同大陸發到圍。
《女人俱樂部》
14年大台搵嚟陳慧珊、李若彤、李麗珍、袁潔瑩、葉蘊儀幾位已半退出娛樂圈嘅花旦拍《女人俱樂部》，時空穿梭嘅劇情之間，陳瀅、陳嘉寶、王敏奕、吳嘉熙、黃山怡等人即有份參與扮演𡃁版， gimmick有晒，最高收視仲有 36點，算係𡃁版代表作
《古惑仔：江湖新秩序》
鄭伊健喺 90年代拍嘅《古惑仔》系列雖然大家都好想睇，不過幾位古惑佬似乎唔想再行番條舊路，結果 13年羅仲謙被欽點演浩南、梁列唯演山雞、沈震軒演𡃁坤，拍咗新一部《古惑仔》，不過俾人話似鴨仔多過似古惑仔。
採訪、撰文：娛樂組
|
鍾意就快D Share啦！
|
|
|
