心外壓急救
詩雅被救出水面之後隨即昏迷，工作人員即時同佢做心外壓急救。
真面目
搵命搏 詩雅墮冰河足本畫面流出
衞詩雅接拍四川衞視真人騷《怒放霸王花》，《 FACE》早前率先踢爆詩雅喺拍攝期間，不慎失足跌落冰河搞到昏迷；當地電視台一直未有公開細節，最近本刊終於取得事發當日，詩雅跌落冰河的一刻，畫面驚心動魄，見到詩雅誤踩結了冰的沼澤，更迅速沉下，以及昏迷被救上水一刻。
衞詩雅去年底往四川拍攝真人騷《怒放霸王花》，要同另外 15名內地女藝人和運動員分成幾組，在海拔 3千幾米高嘅四姑娘山進行野外求生比賽。各人要喺零下十幾度兼不時刮起大風雪嘅嚴寒下追逐奔跑，喺拍攝期間已多次發生撞傷跌傷等意外。
「最恐怖下面係沼澤」
昏迷消息曝光後，當地電視台仍未有交代細節，直到詩雅返港出席活動才解釋經過：「我以為係結咗冰，當我去到嘅時候，成嚿冰跌咗落去，跟住最恐怖係下面係沼澤，一路沉緊落去。」幸好當時工作人員在附近，即時將詩雅拉番上嚟，但因為詩雅當時全身被冰水浸濕，身體抵受唔住極度低溫下即時昏迷，其中一個做過軍人嘅工作人員，立即替詩雅做心外壓急救，再送到醫院，至救番條命。
嗌「救命」求救
近日終於有出事時畫面流出，見到詩雅喺急流河水中跌倒，拍攝一刻已有半身跌咗落冰水，全身濕透，詩雅勉強用左手撐住河底，但原來冰河底下係沼澤同浮泥，詩雅愈用力就沉得愈快，身後的攝影師初時還未意識到，仍一直拍攝，直到詩雅叫救命先知「出事」。
而另一張照片見到詩雅已被救上岸，昏迷倒臥喺地上，旁邊工作人員拉住佢手臂，據知之後詩雅就被送到當地醫院。詩雅醒番之後，只係休息兩日就返回拍攝現場，據知她更比賽到最後階段，精神可嘉。早前詩雅回港出席活動已表示無大礙，但重提意外仍然眼濕濕，人仔真係唔易賺呀！
人肉起底
內地真人騷《怒放霸王花》喺 1月 17日內地首播，首次參演內地節目的詩雅，與 15名來自各界的女性進行追逐求生賽，每集分組追捕及逃跑，要喺限時內完成比賽，當中除咗追逐之外仲要野外求生，冇電話又冇備糧，類似韓國受歡迎節目《叢林的法則》咁要考驗求生技能。
真人騷播出了三集，由於全都是年青靚女，內地網民即時人肉起底，連帶詩雅演出電影《囡囡》、《前度》的性感片段都在微博瘋傳，據知電視台見詩雅有話題，即時在第四集之後加重詩雅的鏡頭。
採訪、撰文：娛樂組
|
鍾意就快D Share啦！
|
|
|
