2016年2月3日 星期三

失敗的 man算這種?  31歲周子揚:捱唔到邊個可憐你? [FACE - 454 - 專訪] __,周子揚,MF,

真人騷失敗的man算這種? 31歲周子揚:捱唔到邊個可憐你?先旨聲明,爆完何傲兒全家大鑊,話何傲芝出到聲要每個月廿萬生活,周子揚就收到何家發出的律師信。周子揚話講事實,不過都承認怕咗律師信、怕咗郁啲要同律師開三粒鐘會,這次訪問不太敢提那廿萬,也絕不能再說何家貪錢。好在話人貪錢會俾人告,話自己貪錢唔會啫!所以周子揚不怕認,自己以前只愛音樂,現在更愛錢。背棄了理想,誰人都可以,因為就算女朋友全家唔逼人 ...


真人騷

失敗的 man算這種?  31歲周子揚:捱唔到邊個可憐你?

先旨聲明,爆完何傲兒全家大鑊,話何傲芝出到聲要每個月廿萬生活,周子揚就收到何家發出的律師信。周子揚話講事實,不過都承認怕咗律師信、怕咗郁啲要同律師開三粒鐘會,這次訪問不太敢提那廿萬,也絕不能再說何家貪錢。

好在話人貪錢會俾人告,話自己貪錢唔會啫!所以周子揚不怕認,自己以前只愛音樂,現在更愛錢。

背棄了理想,誰人都可以,因為就算女朋友全家唔逼人,生活都逼人。

31歲,周子揚說他從 21歲入行開始,條路從來冇順過:

簽約環球,在台灣受訓兩年,錄埋歌只差一步就能組成唱作組合出道,誰知道兩邊經理人不咬弦合作告吹;回流簽華納,一出道就撞正版稅風波四大唱片公司同大台交惡,唱片公司蝕唔起,五年唱片約無奈兩年就解約;改投電視台,和小花的戀情假分手玩車震分手仲要互數,電視台仲唔怕咗你?所以 11月滿約後,又冇得留低。

原來一切都是表面風光:

你看他有個西貢地王老爸,他其實做歌手一年搵唔夠三千,焗住問銀行借錢開地產公司;你看他讀喇沙名校出身,他說舊同學二十多歲已經住凱旋門揸波子,自己一年份糧唔夠人食一餐飯;你看他有個女神 BB女朋友,好識食?他說他們年半分手三十次,女朋友(及全家)的壓力讓他考埋地產、金融同保險牌向錢看,有苦自己知……

唱過歌冇乜人知,拍完劇冇乜人覺,最出名係自爆割過包皮以及分手和女朋友全家互數, 31歲一事無成,失敗的 man是這種?周子揚又話唔覺喎:

「我唔會自卑,呢行邊個唔使捱?邊個唔係要捱十幾廿年?捱到,我話你叻仔,捱唔到消失咗,邊個可憐你?我努力搵錢都係因為唔想放棄理想,唔想消失啫!」

聽了周子揚的故事,我覺得,係慘嘅……

不過亦都唔多合理,仙都唔仙下,點解會有人覺得佢俾得起每個月廿萬生活費?

喇沙班同學住緊凱旋門、揸緊波子!

同大台約幾時完?

11月尾完約,𠵱家啱啱走咗兩個月……想俾啲時間睇下出面個世界,我都好期待再返 TVB。我諗起碼要等新聞過咗先。

即係大台冇同你續約?

我期待……我自己知自己新聞多,完咗啲新聞,我會主動同佢哋傾。呢個圈好細,呢個世界係圓,我都聽前輩離開幾年又會再返去……我自己覺得我喺 TVB嘅訓練係未完嘅。

你同華納嘅歌星約幾時完?

11年 11月完,我喺唱歌方面有小小遺憾,其實個約係五年,但係提早咗合作兩年已經解約,我一開始係唔多順, 09年出道就遇着版稅風波,上唔到 TVB,第一隻碟做晒所有可以做嘅宣傳都係賣得千幾隻,第二隻碟賣幾多,我直情唔好意思問同事添……實在太難做喇,公司同我講唔係唔想幫我……

覺唔覺得唔好彩?做歌手解約收場,做藝員又係冇得續約?

我承認自己星途唔順利,好多藝人天時地利人和又有爹哋媽咪幫,我入行就真係靠自己,一次過寫咗五、六十隻歌寄過去,至會入到華納版權部,然後見面、試音至有得簽。唔只呢啲經歷,我 20歲喺美國讀完音樂返香港,其實係先簽環球去咗台灣受訓兩年,你知唔知我去到台灣個宿舍撞到邊個?關楚耀吖,佢受訓完返香港,間宿舍就輪到我入住……

跟住呢?

跟住兩年後本來係想安排我同另一個台灣男仔組合出道,後尾我經理人又同佢經理人傾唔埋欄,個合作計劃告吹咗,如果唔係……我哋當時連歌都錄埋㗎喇……我諗我嘅路又唔同……

嗰個男仔係邊個?

後尾佢都冇出道,做咗幕後,我同佢傾番偈都覺得咁就錯過咗一個機會。其實我戥𠵱家嘅新人仲辛苦,個焦點更加唔喺個人同啲歌度。

𠵱家你間地產公司做成點?

𠵱家有五、六個員工,我係老闆又係佢哋嘅經理……當初我做藝人真係完全冇諗過做生意,但係做藝人太艱辛,太多騷係冇錢……

冇錢成點?使唔使爭番公司一筆數?

冇爭公司,但做埋做埋再扣埋啲化妝整頭同媬姆車使費,我半年至會收到一張票……二、三千蚊。我兩年歌星約都係收到兩至三張二、三千蚊嘅支票,你話我可以點?我做新人做到咁慘,年紀又開始大,你知唔知我讀喇沙,啲同學廿五、六歲已經買咗凱旋門揸緊波子?我啲舊同事同我講啱啱傾完一百萬美金嘅保單,我諗淨係份佣,保守估計都有三百萬港幣……我同同學聚會,餐飯真係食得好自卑……

做歌星一年得三千蚊,捱到俾個叻你!

你張票其實連餐飯都未必夠俾?

係㗎!啲人覺得我哋藝人好多人識好威,但實質嘅嘢乜都冇,我都要生活㗎……但係公司同我講,做新人係咁㗎喇,唔好怕蝕底……

咁你有冇問唱片公司你食咩?住咩?靠半年二千蚊點維生?

公司話,你有屋企人㗎嘛……

係唔係做歌星仲衰過你喺幕後寫歌?

係㗎!我賣一首歌會收一千蚊,好似寫俾蕭正楠嗰首主題曲,大半年可以有萬幾蚊版稅㗎,不過都係唔夠生活。所以娛樂圈我當係自己夢想,但係唔可以喺度搵錢,所以我 11年先至同堂細佬自己搞生意,先至會考地產牌、金融牌,上年再考保險牌。

打本啲錢係唔係爸爸俾你?

唔係㗎,我廿五、六歲都係住屋企食爸爸,做歌手收入仲少過茶餐廳侍應,已經好自卑,所以開鋪頭我係同堂細佬喺出面貸款,夾埋五、六十萬㗎。一開始乜嘢都自己做,商業登記、搵鋪、掃地全部都自己嚟,辛苦得嚟其實好開心。我第一份工就係做歌手,真係乜都唔識,我記得以前喺個台上面次次都會俾唱片公司鬧,話我冇台風、唔知自己做緊乜……係真㗎,我冇自信,除咗唱歌乜都唔識,裡面係空㗎,呢幾年喺社會雕琢幾年,我至有番啲嘢……所以以前冇人欣賞,做歌星紅唔起,我都明點解,但係咁喎,當時嘅我有一樣嘢永遠比唔上,就係我真係好鍾意音樂,瞓覺都揸住把結他。

𠵱家最鍾意錢?瞓覺攬住錢?

咁又唔係……我 31歲,男人三字頭,我追求嘅成功感,會踏實得多。但係前排我去咗間投資公司返咗半年工,亦都有個體會……每日六、七點出門口返工,夜晚六、七點至收工,我發覺我唔知自己做緊乜,係為錢為生活定係為乜嘢呢?點解變咗一隻螞蟻一樣?係要感受下其他工作,我至知呢一行嘅機會有幾重要,做自己鍾意嘅嘢有幾幸福。

會唔會好矛盾呢?又要講興趣,又覺得冇錢搵?

鍾意表演係與生俱來,但係我都要生活,你有冇試過一年收三千蚊支票呢?作為一個男人唔可以咁樣。呢行分分鐘要捱十年,廿年後都仲未輪到你,捱到你叻你有運,捱唔到一定會消失,而冇人可憐,我努力搵錢唔係因為多心,係唔想消失啫……錢可以主動搵,但係呢行嘅工作,唔係你肯去求人,人哋就會俾戲你拍、俾歌你唱㗎,係唔需要你就係唔需要你。

講開矛盾,又要問下你,點解同何傲兒 13啜之後就分手?

我自己就……對於愛情……好簡單,淨係想有一段好真摯嘅愛情。就算我係藝人,紅與唔紅,拍拖我都會認,我想公開㗎一直,我都幻想好似 TVB其他藝人情侶一樣,同我當時另一半公開以後一齊成長,但呢個諗法係我單方面,佢未必想,可能佢屋企、公司各方面都有諗法。

所以當時係假分手?

係,假分手!仲衰,你都見到,跟住就重覆再重覆分手、俾人影到、跟住又要出嚟解釋,又要話係 friend,喺韓國撞到……好多嘢,我真係好被動。紙包唔住火,結果公司覺得我哋講大話,觀眾又係覺得我哋講大話。

同何傲兒拍拖咁辛苦,邊有心情識第三者?

你成日都話佢屋企人點點點,即係佢屋企親口講,定何傲兒話有屋企壓力?

老老實實,我同佢爸爸媽媽淨係喺佢生日會嗰陣時見過,跟住就拍拖,點知年幾發生咁多嘢,最後連手都分埋,都未同世伯伯母正正式式見一面。

但係你同佢家姐又可以熟到講錢講生活費?

我的確係同何傲兒家姐熟在先,但係講錢我怕又收律師信,我淨係可以喺度講番啲心底話……拍拖呢段時間,我同 Lily都飽受壓力,來自傳媒、公司同佢屋企,我屋企人真係冇乜嘢……我哋好小心處理呢段感情,其實根本我淨係同佢都行得咁辛苦,邊度仲有心情去識其他人,去有第三者?點解會搞到呢個地步?點解唔係互相祝福?點解驅使我有個行動(自爆被何家要求廿萬生活費),係因為我真係被抑壓咗年半,我覺得俾人逼咗去懸崖邊,已經過咗我底線,所以至會有呢個爆發點,講咗啲事實出嚟。

所以因為你忍夠喇,至會爆大鑊?

諗番轉頭我係衝動嘅,但我都係講事實啫。

拍拍下拖,俾人要求廿萬生活費,你係覺得「都黐嘅」定覺得自己冇用俾唔起呢?

另一方面我都要多謝佢哋,係佢令我搞咁多生意,明知做呢行搵到只可以係有限錢,所以我至會不停進修考牌,我要有能力至幫到佢屋企。

佢屋企要你幫咩?

我唔知佢屋企有咩問題, Lily對佢屋企嘢好沉默……我當時嘅壓力,就係好想俾好嘅生活佢。

撇除佢屋企,你覺得何傲兒自己有冇咁鍾意錢?

我唔覺得佢係一個睇錢嘅女仔,我唔係攻擊,想講事實,我同 Lily相處,從來唔覺得佢貪錢,我哋拍拖好簡單,佢對我冇任何要求。

佢家姐同你講錢,你有冇話番俾何傲兒知?

我有,但係我唔係太記得佢講乜,好似係迴避咗……

你哋拍緊拖,咁大件事點解可以迴避到?

我咁睇啦,我同 Lily年紀相若,外形匹配,拍拖係 match嘅,但係未去到一個談婚論嫁嘅階段,作為一個男朋友,我係唔係要 support全家使費呢?我能力當然未達到,亦到覺得有啲嘢要商量下,講得肉酸啲,係包嘅……咁我又唔係吖嘛,我又唔係超級富豪,又唔係包,我哋拍拖啫……呢樣嘢我真係覺得好委屈。

你當時有冇同何傲芝咁講?

我又冇,講咗出口我又覺得唔係男人,可能呢個社會真係存在呢樣嘢,一直係有需有求呢?不過佢屋企嘅求未必係我需呢?我噚日去咗一個婚宴,問個新郎哥點樣可以娶到一個好老婆,佢話我知,一個女人喺你飛黃騰達嘅時候同你一齊,定係願意同你並肩作戰呢?作為男人,你要諗下你想娶嘅係邊個?嗰個肯同你一齊捱嘅人,至係真愛。我相信我同 Lily曾經都有過真心,好無奈,太多壓力……

咁你哋點解分手?

我相信係因為誤會,當時我嘅心得佢一個,但係我哋細,識嘅人經歷嘅嘢都少,我出去做生意好難交待得太清楚,兩個人一齊係講個信字,唔係攞住啲好小嘅嘢發到好大……

所以佢係捉到你一啲嘢?

絕對唔係!我作為男朋友,絕對冇背叛過佢,但係佢有啲位……都係緣份同 timing問題,絕對唔係因為我有第三者……分手呢段時間我真係覺得好輕鬆,唔使再交待。

之後又有報導話佢暗示分手係因為佢守貞,因為宗教原因?

呢一個問題嚟得比較尷尬,男女朋友拍拖係唔係要講晒做過啲咩呢……我只可以話,我同 Lily拍拖時係 sweet嘅……

應該做嘅都做咗?

唔係咁講,我係話拍拖就係拍拖,關宗教咩事呢?

由 09年出道到𠵱家,唱歌冇乜人知,拍劇冇代表作,拍拖又搞到咁,覺唔覺得自己樣樣都好失敗呢?

我覺得自己呢一兩年有個大躍進,喺出面做生意……但喺娛樂圈呢,我慣咗呢個模式,尤其入咗 TVB,比我慘嘅人太多,好多前輩付出十年、廿年甚至大半世嘅青春都喺嗰個 level,當然亦有人入去一、兩年就做男女主角,每個人條路唔一樣,我唔會自卑,因為我做嘅嘢都對得住自己,每個人搵我做嘢,我都俾足 100分。

咁分手搞到要數前度同全家,你覺唔覺得唔太好?

我覺得唔好,俾我揀,我都想好來好去,之前嘅女朋友分手都好哋哋……點解搞到咁,真係因為抑壓太耐,太多委屈,去到某啲位唔出聲佢會㩒住我再踩多腳,嗰陣時我想為自己爭番啖氣,絕對唔係想𡁻完唱。呢件事一直我都太被動太軟弱,我唔係要攻擊人,都想保護自己,我都有屋企人,都有形象,都有尊嚴,一直都只為你形象,我都要形象㗎,我都有屋企人要捍衞㗎!點解臨尾分手都要賴落我度,話我有第三者?

分手 30次說愛你

13啜啜完分手,一齊遊完韓國再分手,何傲兒離開大台又話分手,訪問去到尾聲,我純屬好奇,問了句加加埋埋你哋分過幾多次手,想不到遠遠不只三分三合。

「每次影到都會分一分手,跟住又一齊番,加加埋埋呢年半……嘩,好誇張,我諗有三十幾次。我𠵱家先至開始明,原來女仔講分手唔係真心要分手,我奉勸大家女仔,如果你真心鍾意個男仔,真係唔好咁隨便講分手。」

一齊年半,分手三十幾次,即係好哋哋見面拍拖幾多次?一個月好哋哋見唔得幾面,但係講緊要斷月計俾廿萬生活費……就算呢盤係生意,計落點都係蝕。

撰文:朱小博

攝影:范仲良

化妝、髮型: Meegan@Bridal Corner

形象: Bryan@the Flaming

服裝: Mr.Collection


鍾意就快D Share啦!
Related Posts Plugin for WordPress, Blogger...