掃呢頁CODE去手機

2016年4月7日 星期四

機艙黐埋坐 雙宋香港拍拖 [壹週刊 - 1361] __,雙宋,宋仲基,宋慧喬,M1,

落機時,兩人一路行一路有講有笑,仲講到手舞足蹈!探熱針機艙黐埋坐 雙宋香港拍拖韓劇《太陽的後裔》熱爆亞洲,兩位主角宋仲基同宋慧喬人氣高企!今個星期開台嘅ViuTV押中寶,立即重金禮聘「雙宋」來港宣傳,實行打響頭炮!集合到兩位主角宣傳機會少之又少,加上戲假情真嘅新聞鬧得熱烘烘,「雙宋」合體可以話係全世界都望住!喺韓國影唔到兩個人一齊上機,落機又行到離行離列,其實飛機上難掩興奮心情,今次可以行孖咇出埠 ...


落機時,兩人一路行一路有講有笑,仲講到手舞足蹈!

探熱針

機艙黐埋坐 雙宋香港拍拖

韓劇《太陽的後裔》熱爆亞洲,兩位主角宋仲基同宋慧喬人氣高企!今個星期開台嘅 ViuTV押中寶,立即重金禮聘「雙宋」來港宣傳,實行打響頭炮!

集合到兩位主角宣傳機會少之又少,加上戲假情真嘅新聞鬧得熱烘烘,「雙宋」合體可以話係全世界都望住!喺韓國影唔到兩個人一齊上機,落機又行到離行離列,其實飛機上難掩興奮心情,今次可以行孖咇出埠,話唔定微服出街拍吓拖呀!

落機即刻彈開

宋仲基宋慧喬旋風式訪港宣傳, ViuTV非常大手筆,除咗有指酬勞高達七位數之外,所有配套都要係最高級,包括來回頭等機票、入住六星級四季酒店、用房車接送等等。 4月 4日雙宋坐 KE613由韓國仁川機場飛往香港,據知兩個喺頭等嘅第一排一齊坐,不時有講有笑,講到落機都唔肯停。

本來並肩一齊行出機艙,不過一見到大班機場職員喺出口用手機影相睇熱鬧時,宋慧喬立即煞有介事彈開,仲超前宋仲基行到幾丈遠,低頭㩒電話扮唔熟!明明傾得好哋哋突然被冷落,就好似劇集入面嘅情節一樣,戴黑超著皮褸嘅宋仲基雖然保持笑容,都難掩失落,唔通真係要保護戀情?

宋仲基勁識冧女,公開打情罵俏,氹到宋慧喬經常望住佢甜笑。

當見到有人影相,宋慧喬立即彈開,仲搵經理人隔着!

記者會打情罵俏

到埗第二日雙宋著到靚靚出席記者會,喬妹一條灰色及膝連身裙,非常斯文,而宋仲基就寶藍色西裝配開胸恤衫,型格十足!佢哋喺合照環節不時咬耳仔,宋仲基仲輕輕搭住喬妹膊頭,好有默契!兩位先打招呼,喬妹成日嚟香港,用廣東話打招呼梗係無問題,而第一次嚟香港宣傳嘅宋仲基就用普通話:「大家好,我係宋仲基,見到大家好高興。」已經足夠令到所有女 fans尖叫。

之後大會安排十個幸運 fans上台同兩位主角握手,本來都好有秩序,後來有 fans開始同佢哋傾偈、傳紙仔,合照完之後仲有 fans要求抱抱,難得宋仲基好親民,攬咗兩個!講到佢哋喺戲中嘅角色造型,著軍服同醫生袍,喬妹大讚緋聞男友一百分,宋仲基用普通話回番「漂亮,真的漂亮」,公然打情罵俏!

記者會上,宋慧喬同宋仲基有唔少身體接觸,搭膊頭之餘仲來一個深情對望。

35歲的宋慧喬,憑住甜美的笑容,加上露出半條長腿,已經成功殺死唔少 fans。

雙宋連動作都經常一致,非常之有默契。

之前雙宋出錢搞慶功,喬妹滿場飛同人影合照,但她刻意唔 post同宋仲基合照,反而 post了與男配角晉久合照。

續集難產拍唔成

《太陽的後裔》氣勢如虹,韓國播到最新一集,收視破紀錄收 33%,做多兩個星期,播埋最後四集就大結局,好多人都睇好《太》劇可以打破最高收視、 2012年金秀賢主演《擁抱太陽的月亮》嘅 42.2%,超越《來自星星的你》!由於劇集已經一早拍好,無得添食,於是電視台決定喺大結局播完之後, 4月 20至 22號一連三日推出特輯,重溫精彩片段以及公開幕後花絮,希望可以延續收視神話!

對電視台嚟講,最想都係拍續集!賣埠賺到盆滿鉢滿,海外好多買片都好想有第二輯,劇集監製就話佢都想拍,不過如果要拍嘅話,一定要原班人馬。男女主角宋仲基同宋慧喬而家片約不斷,工作排到密密麻麻,要度期拍絕對唔容易,睇怕好難成事,各位劇迷要失望喇!

雙宋喺劇中有多場浪漫吻戲,令 fans羨慕又妒忌,更加有指佢哋嘴到日久生情!

緊隨其後的宋仲基友善得多,聽到 fans尖叫報以微笑,臨上車前仲 360度向 fans揮手,非常識做!

兩個人刻意分開出閘,喬妹戴番副超率先步出,面無表情上車。

雙宋係近期眾多韓星來港中,場面最墟冚一次,有超過五百位 fans到機場接機。

宋仲基憑住劇中劉時鎮一角成為萬人迷,人氣勁到上新聞,係第一位藝人在新聞報導受訪。

撰文、攝影、攝錄:娛樂組


鍾意就快D Share啦!