本身有幽閉恐懼症的周柏豪，拍完被水泥活埋的場口後，仍全身標汗震足一個鐘。
娛樂偵訊
帶病上陣 周柏豪震足 13小時
在今屆「亞洲電影大獎」奪得「亞洲飛躍男演員」的周柏豪，主演的電影一部接一部，繼夥拍劉心悠的《我老婆係明星》，本月中還有曾志偉做監製的新片《 Good Take!》上畫。
在志偉仔曾國祥執導的單元《水泥》中，要被活埋水泥中的周柏豪，面青標冷汗全身震晒，全真實反應，原來他有幽閉恐懼症，仲要捱足 13個鐘，曾國祥先肯收貨！冇陰功。
全身包保鮮紙
電影的情節，同最近荃灣工業大廈揭發一宗石屎藏屍案，如出一轍，好邪！
據幕後的工作人員說，水泥會堵塞毛孔，有機會令皮膚壞死，所以埋位前，周柏豪要先用保鮮紙包裹全身，才穿上戲服，同焗桑拿一樣，又焗又熱，不停流汗，對於有幽閉恐懼症的周柏豪來說，卻是噩夢的開始。
「好似俾蟻咬，無論企好坐好，都周身唔自在，開始有少少呼吸困難！」周柏豪說。
到正式埋位，瞓在坑內的周柏豪有半個身鋪住水泥，其間工作人員要不時在水泥中灌水，以減慢凝固速度。
全真實反應
轉燈、換位，周柏豪原本可以暫時離開水泥坑休息，但他明知一出一入，工作人員會好麻煩，惟有捱義氣死忍，一直瞓在水泥坑，直至完成所有鏡頭。一瞓十三粒鐘，幽閉恐懼症的病徵：氣喘、頭暈、焦慮、抖震，逐步浮現。
「真係一秒鐘，好似一個鐘咁難捱！」周柏豪說。
為求逼真，𦧲掂周柏豪「帶病上陣」的曾國祥，亦坦言冇想過幽閉恐懼症原來如此得人驚。
「真係想像唔到！柏豪拍完，至少有一個鐘仲係面青青同全身震晒，好感激佢肯頂住，令大家順利完成電影中最重要一個場口！」曾國祥說。
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|
