熱爆娛樂: 見面箍煲　超雲應承俾自由　陳山聰轉食有錢中女拒復合 [壹週刊

2016年4月7日星期四

見面箍煲　超雲應承俾自由　陳山聰轉食有錢中女拒復合 [壹週刊 - 1361] 山聰,超雲,M1,陳山聰

娛頭

見面箍煲　超雲應承俾自由　陳山聰轉食有錢中女拒復合

13年被何家三房千金何超雲分手後，形象破產的陳山聰頓成「四失聰」，做唔成賭王駙馬，惟有食回頭草𦧲返無綫，勁操減去一身肥肉洗底後，一輪衝鋒劇接劇。

升呢做男二，陳山聰更突然被何超雲傳召，應承「唔黐身」、「准拍親熱戲」氹復合。

拼搏三年難得翻身，早已跟有米中女 Apple行埋的陳山聰，對前度開出的條件毫無興趣，更陪新歡旅行派定心丸，何超雲箍煲失敗。

翻兜讓步

為保護呢段感情，陳山聰與 Apple拍拖低調小心，同場與大班朋友影相，男的亦刻意保持距離。據知新歡 Apple性格溫馴，甚得山聰朋友圈歡心。

上月，陳山聰老死郭政鴻帶住兩個女，跟失聯三年的何超雲見面，隨即傳出賭王千金翻撻陳山聰消息，而郭政鴻亦語帶雙關地，指「山雲復合」一事「順其自然交俾個天」。

事實上，何超雲的確透過郭政鴻翻兜前度，被拍到買運動衫積極操弗的她，早前已跟陳山聰見過面。

「超雲同身邊朋友講，如果今次同山聰復合，一定唔會好似以前咁專制，要佢二十四小時 standby陪住自己，會俾男朋友空間，同埋放佢出去做嘢，拍劇亦可以拍親熱戲。佢以前好大小姐脾氣，又容易着燈，有次睇到山聰喺《萬凰之王》入面同胡杏兒嘴晒，佢即刻發老脾！山聰仲試過喺屋企係咁俾佢摑，超雲而家當然知道自己嗰時係有問題，亦發覺山聰真係好就佢，所以呢幾年就算有人追，佢都係覺得山聰最好。」知情者說。

可一不可再

何家男友唔易做，跟何超雲拍拖接近三年，被指黐食黐住形象破產的陳山聰，拍拖無耐已被勒令疏遠所有女性朋友，跟契姐伍詠薇反面，就連工作都唔俾做。試過整整一年，跟住何家千金吃喝玩樂周圍飛，養尊處優的陳山聰由 fit爆變 fat爆。

「同超雲分開，山聰完全冇嘢做，之前所講話同超雲合作搞時裝生意，出自家品牌，都係講多過做。嗰段時間山聰好慘，想𦧲返無綫，但因為之前拍拖要陪玩一味推 job，好多監製都唔願再用佢，好彩添哥（李添勝）仲肯俾機會。

「可一不可再，山聰自己亦都爭氣，除咗投入工作，亦勁操做運動跑步減肥，又參加馬拉松，呢兩年佢俾人感覺真係好咗好多！難得洗底成功，佢點敢再行差踏錯；所以問佢有冇機會同超雲復合，佢都斬釘截鐵話『唔係事實唔回應』。」

經過三年時間努力拍戲洗底，陳山聰終於在大台升呢，新劇《殭》當上男二，不少網友亦大讚他有氣勢。

上月甜蜜之旅

二月「山雲戀」傳翻撻，陳山聰為向女友派定心丸，上月先後與她去新加坡及日本旅行。為新戀情做足保密功夫，兩人從不放同一背景的相片上網。

何超雲早前放出與郭政鴻女兒拜年相，漏出翻撻風聲。據悉分手近三年的「山雲」早前破冰見咗面。

幫有米新女慶生

拒與超雲再續前緣的最主要原因，其實是陳山聰已有個拍拖兩年的 Apple在身邊。據了解，年約三十多歲的中女 Apple自己做生意，亦有不少圈中朋友；當年陳山聰和超雲甩拖後，一四年便和 Apple撻着，但明知自己形象「負皮」，他於是刻意低調處理感情。

「唔敢公開，但山聰會同女友一齊出席自己朋友活動。 Apple性格比較靜，同山聰一齊就更加少講嘢，多數係山聰講佢就聽，我哋一班朋友都幾鍾意佢，覺得佢好得體知分寸。舊年 Apple生日，山聰約晒一班朋友同佢慶祝，嗰晚山聰因為遲咗收工，啲朋友好似（曾）志偉就特登陪住 Apple，等到山聰到，先一齊吹蠟燭食蛋糕。」

陳山聰近兩年狂做運動操肌，經常孖好友袁偉豪跑山， 10月就 4張的他，比以前更弗。

上月，何超雲被拍到掃運動衫，開始積極做運動減肥，誓要跟前度一樣弗爆。

上月接受阮兆祥訪問時，陳山聰還扮冇拖拍，但就表示想成家立室，隔空同 Apple示愛。

跟胡杏兒在電視劇《萬凰之王》狂嘴，出街後，何超雲即發脾氣摑了他十巴。

為掩護正印 Apple，陳山聰特登高調在 ig同李佳芯打情罵俏，扮追對方做宣傳。

旅行派定心丸

將 Apple收埋兩年的陳山聰，雖然再獲何家千金寵召，不過見過鬼怕黑，就算前度開到口肯讓步遷就，陳山聰都不為所動。

上月傳出何超雲有意翻撻消息，陳山聰立即派定心丸，特登抽時間，陪 Apple去旅行。

「佢哋習慣咗出去旅行拍拖，因為喺香港始終會俾人見到，而家人人都係記者，好難將段戀情保密。傳出超雲想翻撻佢嗰段時間，佢兩個去完新加坡再去日本，原本同阿媽一齊住喺九龍灣嘅山聰，而家同 Apple搬咗入將軍澳同居，同女友感情愈來愈好，仲點會考慮翻撻。」知情者說。