高清低智
Do唔 Do的問題
鄭裕玲又來了，上次去歐洲 shopping，今次坐定定睇片解畫，益發錫身了。比起同類節目如《千奇百趣》餡料靠外購，《 Do姐有問題》派出張秀文等周遊列國取景，總算多番份自家製的誠意。
鄭裕玲已多年冇拍戲，曾坦言好劇本難求。好劇本固然難求，但不用記對白、記連戲卻更快靚正，所以她保持在 talk show活躍，每天電台開咪（下把拍檔咁蹺也是二男組合），長做長有。資深明星憑個人魅力和號召力，口若懸河自由發揮，只要大框架扣得住主題，四兩撥千斤無可厚非；對於藝術上的追求卻畢竟遜色。 Do姐若珍惜羽毛的話，我們仍期待她在影劇展現精湛演技。
作為嘉賓仲容易，同樣睇片段玩猜謎遊戲，森美小儀由《千奇百趣》主場變為《 Do姐有問題》作客，駕輕就熟，插科打諢就得。 TVB塘水滾塘魚，主持嘉賓來來去去一班人（例如還有金剛和梁烈唯的《男人食堂》），身份互換，觀音請完羅漢，羅漢請番觀音，有時分唔清邊個節目打邊個節目。
而且，那幾個掛在臉上的肉色咪頗礙眼，寧願索性像嘉賓夾着黑色咪仲好。以前，這種場合理應由幕後人員操作吊臂上的防風「老鼠」，邊監聽邊追位收取音效（鏡頭前見不到的），稱為 FM，是很專業的工作。改成各自夾咪，睇怕又係精簡人手。慳皮是大勢所趨，但觀眾驟眼以為藝員塊面生肉瘤，俾多啲伙記有工開得唔得？
還有，點解又加插現場烹飪環節？睇埋冠名贊助就知，因為客戶賣的是高級食材囉。軟銷而不硬 sell，但植入把戲更高明，只會令網民更享受捉住你痛腳的發現快感。
撰文：余家強
來源 source: http://hk.next.nextmedia.com
|
鍾意就快D Share啦！
|
|
|
