探熱針
JW衞蘭李幸倪圍攻 人妻吳雨霏笠水唔玩
吳雨霏（ Kary）去年初與三度離合的初戀男友洪立熙（ Brian）結婚做人妻後，一直玩多過做，與老公周圍飛歎世界的她，原本打算今年再發力，但見到 JW、衞蘭及同公司的李幸倪（ Gin Lee）來勢洶洶， Kary笠水，以讀書考大學學位為由，臨陣退縮！
憶蓮幫手
去年二月續約環球及推出唱片《艷羨》後，吳雨霏便展開她的悠長假期，與老公 Brian密密出埠度假。
「隻碟有幾首歌雖然係林憶蓮同恭碩良做監製，不過都幫唔到幾多， Kary又冇乜做宣傳，一月喺美國註冊，七月又去咗意大利搞婚禮，剩低嘅時間，都係同老公周圍飛，只係偶然做吓品牌活動，音樂方面嘅 job幾乎停晒。」知情者說。
驚唔夠砌
人妻原定今年重新發力投入工作，卻撞正 JW、衞蘭及同公司的 Gin Lee夾擊， Kary秤過度過，決定唔玩。
「 Kary諗住今年試新嘢，亦打算入紙申請紅館開第三次個唱，後來見到 JW、 Janice同 Gin Lee三個都係今年落重料，佢哋幾個都係賣實力， Kary覺得如果一齊硬撼，萬一唔夠砌，唔單只樣衰，甚至會影響自己再上。所以佢寧願拖到出年，睇定啲形勢先再算，避戰唔使輸，起碼可以保住現有嘅位置。」
內憂外患
選擇退守， Kary更以讀書做擋箭牌。
「 Kary對外話自己今年想讀書，要進修數學、英文同考番個大學學位，但佢事前完全冇同公司講，其實講乜都係唔想做炮灰，加上環球要捧 Gin Lee，佢覺得公司未必會放太多資源俾自己，內外受敵，去讀書係最好藉口。」
出自家品牌
出身富貴又有老公養， Kary做跟得夫人陪老公出埠公幹外，亦準備搞品牌生意。
「出自家品牌係潮流， Kary近年除咗幫老豆搞屋企自家品牌 Tee Locker外，亦開始籌備個人品牌，不過仲有好多細節未定好，其實佢好多時飛外地唔單只玩，仲會傾吓合作，為開檔做籌備。」知情者說。
撰文、攝影、攝錄：娛樂組
|
鍾意就快D Share啦！
|
|
|
