娛樂偵訊
被飛到怕唔敢再逼婚 胡定欣靠杏兒夫婦谷姻緣
胡定欣自從同 Band佬 Terry（陳明道）拍拖後，即努力戒甩港女性格，希望可以好似好姊妹胡杏兒胡蓓蔚等，做幸福人妻。曾許下 35歲前出嫁目標，但距離期限不夠三個月（ 9/9生日），要達標，天方夜譚！
不過，胡定欣冇放棄，還經常帶埋男友拍拖出席好姊妹夫妻聚會，藉此提起男友有結婚衝動，催谷姻緣。
戒港女性格
拍拖一年半，胡定欣早已視四十六歲男友 Terry為結婚對象，更打定底，斥資七百萬在屯門買入一個千二呎單位，準備作為婚後新居。可惜， Terry浪子性格，拍拖至今，都未有結婚打算。
之前經歷過被吳浩康、馬國明和設計師沈栢淳拋棄，痛定思痛的胡定欣今次改變作風，凡事寬鬆處理，免得男友受壓，又離她而去。唔想再做「棄婦」，胡定欣甚至搵埋班姊妹，幫手諗計。
「定欣好清楚 Terry性格，如果夾硬逼婚，只會同之前 Patt（沈栢淳）嘅結果一樣，都係分手收場。所以同啲姊妹商量過後，決定製造多啲機會，俾 Terry自己去感受婚姻生活，係可以有幾甜蜜同開心，久而久之，佢就唔會再抗拒結婚。」胡定欣身邊人說。
豹哥豹嫂撥火
定好方案，胡定欣按計劃執行，只要有活動，都盡量安排男友一齊出席，等 Terry可以親自去感覺一下，夫妻間的融洽氣氛。早個禮拜，胡定欣同 Terry，加埋胡杏兒和老公 Phil、豹哥（單立文）和豹嫂（胡蓓蔚），三 pair人一齊食飯，之後再去楊秀惠新開的刨冰店食甜品。
平時笑容唔多，個樣 cool爆的胡定欣，男友在旁，即刻平易近人得多。其間，胡定欣要男友一齊攞住刨冰玩自拍，跟住又孖份食一個士多啤梨刨冰，你一啖我一啖，超溫馨！同黨豹哥豹嫂亦吼準時機，從旁推波助瀾。
老公使計氹杏兒
至於仍處於新婚階段的胡杏兒同老公 Phil，因為杏兒蜜月後就投入工作周圍飛，所以更加珍惜共處時間，只要一有假期，就算得一日半日空檔，她都會飛返港陪老公，十分痴纏。
早已講明想生 B的 Phil，為配合老婆的工作進度，惟有將造人計劃一推再推。雖然 Phil願意遷就，但據知他跟胡定欣一樣，經常參加一些有小朋友的家庭活動，隔山打牛，等杏兒都感染吓，有仔女的歡樂，希望打動對方，提早進行生 B計劃。
轉戰飲食界
當晚杏兒、定欣和豹嫂等人專登留肚，去捧楊秀惠開的刨冰店。入行十二年，楊秀惠一直浮浮沉沉，去年拍完無綫劇《潮流教主》後冇晒影，大台不重用，楊秀惠決定轉型投資生意。
繼前年與家人合資代理開美容產品 That'so後，最近又與胞妹 Fiona合資百萬，於大坑施弼街開日式刨冰店，主打刨冰外，亦有咖啡及蛋糕等小食，價錢由 68元至 88元一杯，屬於中價消費。
力不到不為財，楊秀惠經常落鋪坐鎮，又搵了不少藝人朋友如蔡思貝、翟威廉等現身試食造勢，製造明星效應。
撰文、攝影、攝錄：娛樂組
|
鍾意就快D Share啦！
|
|
|
