陳敏之變索腿母后佗小王子
好消息呀好消息！無綫藝人「索腿天后」陳敏之宣布懷孕四個月，一索得男，敏之昨日「擇日」於社交網報喜，原來昨日更是敏之「家姐」伍詠薇結婚17周年，可謂「囍」事重重，難怪伍姑娘坦言開心到如自己有BB一樣。為了「小王子」健健康康，敏之保持良好生活習慣，獲母親全天候照顧，幸福滿瀉。
恭喜！恭喜！37歲的陳敏之昨日宣布有喜，更一索得男，認真「叻叻」。敏之自2014年10月與拍拖多年的圈外男友雷偉信結婚後，一直都調理身體，經過近兩年努力，敏之昨日於微博宣布有BB的消息，她於微博上載一張充滿喜悅的相片，留言多謝神給她一份美妙的禮物，更透露BB是「小王子」:「A baby is a blessing. Thank you God for this amazing gift from heaven above, a precious little prince to cherish and to love.」而相片中所穿的白色衫，乃伍詠薇送她的禮物，原來別有心思，她昨日接受訪問時透露：「今日係公眾假期，同老公商量過之後，想等多啲朋友收到呢個好消息，再加上今日係家姐結婚十七周年紀念，想一家人有兩個喜訊，大家都開心！」
口味突變抗拒魚味
講到懷孕心情，敏之說：「好開心就嚟有個小王子，細佬、媽咪、老公、老爺同奶奶都好開心，呢個係天賜禮物。（佗得辛苦？）三個月時就好攰，不過好在冇嘔，佗得幾舒服，一諗起都好開心。始終第一胎，有啲緊張。」問到BB是否「Made In HK」？敏之笑言：「係呀！嗰陣啱啱拍完《親親我好媽》，timing好好，依家媽咪全天候照顧我，成日整花膠、海參我食，自己不嬲係夜鬼，依家都逼自己早啲瞓。」
敏之胃口也突變，以前很喜歡吃魚，現時聞到魚味便想嘔：「依家一起身有啲嘢會突然好想食，要食到先舒服，有時想食奇異果，有時想食牛肉。」敏之又指會選擇開刀產子。
伍詠薇似自己有B
而「家姐」伍詠薇早知敏之有B，她說：「我係頭兩、三個人知道，自己都開心咗好耐。（收BB做契仔？）唔會嘞！契仔得魔童一個。真係好開心，都知佢揀今日宣布係有意思嘅，係我結婚周年紀念，好多謝敏之，佢當我真係屋企人咁！真係甜在心，好似自己有BB一樣。」
此外，前晚敏之與森美錄影節目《Sunday好戲王》，說到森美願意做她的「太監」保護她時，敏之笑謂：「其實佢好錫我，佢之前見我成日坐都估到，見我跌支筆都會飛身幫我執，平時見我拎重嘢都幫我拎，好似家人咁，好感動！」
文：影視組
|
鍾意就快D Share啦！
|
|
|
