機會嚟啦，若希！吳若希前兩晚喺節目中，話岳飛背脊刻嘅四個大字係「反清復明」，智商高到冇朋友，理所當然俾網民洗板式狂恥笑。學識唔高唔緊要，最緊要感情方面夠醒目，今日就有讀者透過本報「爆相爆片」，影到吳若希蹺住一個後生仔，喺曼谷嘅Siam Paragon商場拍拖行街！雖然兩個人得個背面，不過讀者鍾小姐就話：「個女仔(吳若希)本身好白淨，好易認得出！」陪吳若希去曼谷旅行嘅呢位新歡，係澳門才俊Alex Ho，喺澳門代理洋酒、搞團購網，仲入股某品牌眼鏡，家底有番咁上下！據知自從3月嗰陣，吳若希俾人踢爆冇咗有米uncle「十哥」林棣權嘅照顧後，吳若希就火速搭上Alex，同Alex暗撻後，二人旋即打得火熱，今年24歲吳若希仲私下同朋友講，雙方希望觀察多兩年，可以嘅話，就打算兩年後，即2018年結婚，至於嚟緊仲同無綫有5年約嘅佢，約滿之後，仲會疊埋心水，退出娛圈做少奶奶。問到同Alex拍拖遊曼谷，吳若希以短訊回覆本報答：「去還神啫，多謝關心。」問佢有冇計劃結婚，佢就話：「唔答呢啲啦，唔好意思！」
來源 source: http://hk.apple.nextmedia.com
|
鍾意就快D Share啦！
|
|
|
