苗彤唔選港姐做御用攝影師
今年港姐為搞新意思，早前欲邀請苗僑偉與戚美珍的索爆星二代囡囡苗彤參選，但因苗彤無意做幕前而婉拒無綫好意，不過她除盡得母親真傳，擁有索爆外表之外，原來還十分喜愛藝術，是一位很有熱誠的攝影師，其作品成功得到余詠珊垂青，更力邀她為今年港姐擔任外景攝影師，苗彤已答應肩負甚具挑戰性的任務，並將赴日本化身美女攝影師為一班準港姐追夢留倩影！苗彤的加盟，亦成為今屆港姐一大亮點！
有多年歷史的《香港小姐競選》近年一直銳意革新，今年除與《香港先生競選》大玩Crossover，更有意找來星二代助陣加強選美陣容，而《港男》方面成功吸納多位星級弟弟參選，而港姐方面，原來今年亦有星二代參與其中，不過並非參選佳麗，而是擔任攝影師！這位星二代攝影師，正是苗僑偉與戚美珍的索爆大女苗彤，她將以隨團外景攝影師身份，齊齊到日本與一眾佳麗拍外景，為佳麗拍下追夢一刻，美女拍美女絕對得心應手！
擅長人像攝影
現年25歲的苗彤身材有料，盡得母親戚美珍優良遺傳，不時在社交網站晒噴血泳照及家庭照，早年在加拿大求學時，已多次傳出將參選港姐。而有意找星二代助陣的無綫，今年主動與苗彤接觸，身為港姐統籌經理的余詠珊於籌辦初期曾飛往溫哥華尋找合適的海外佳麗，條件優厚的苗彤當然是目標之一，不過大學畢業後，修讀藝術的她早已醉心攝影工作，表明無意透過參選港姐進入娛樂圈。
余詠珊認為機不可失，欣賞過苗彤的攝影作品後，主動促成另一項合作，她說：「知道三嫂個囡囡好靚，無奈佢冇興趣，不過睇過佢作品，覺得佢人靚作品又好，唔想錯過合作機會，今次就提出另一種方式合作，苗彤自己都好有興趣，結果搵咗佢做媲美港姐嘅最美攝影師！」苗彤早年大學畢業後，修讀藝術的她決定一展所長，與幾位志同道合的同學開辦小型工作室，從營運到攝影一腳踢。而苗彤擅長人像攝影，捕捉人與人的感情交流，畫面細膩，余詠珊認為苗彤在攝影方面甚有天分，相信年輕有熱誠的她，能為一眾佳麗的港姐夢留倩影。
三嫂力撐追夢
三嫂一直支持苗彤的攝影工作，得知女兒拒選港姐，她笑說：「佢本身意願唔係選港姐，聽到個提議就話：『唔好啩？我唔鍾意囉！』佢真係冇諗過選美，但一直對藝術好有興趣。」
談到無綫邀請女兒擔任攝影師，三嫂說：「係呀，知TVB有咁嘅計劃，個女有同我講，佢都好有興趣，又鍾意影相。我自己都後生過，明白佢到咗呢個年齡，又冇乜牽掛，如果可以搵到鍾意嘅嘢，向理想進發係一件好幸福嘅事，好支持佢做呢個工作。（咁靚女唔參選嘥咗？）咁佢自己有自己嘅諗法，依家做人父母，都唔可以左右到年輕人諗法，都大個女啦，我好支持佢嘅理想。」講到女兒的攝影工作，三嫂興奮地說：「我有睇佢啲作品，覺得有板有眼，自己都好欣賞o架！」
文：影視組
|
鍾意就快D Share啦！
|
|
|
