莊端兒避雪壓軸凸圍
昨日書展開鑼，寫真大戰隨即掀起戰幔，33C孫慧雪昨日稍露香肩親臨攤位谷銷量，逼到水洩不通，更指三千本寫真已賣逾一半，率先報捷！而同攤位賣書的莊端兒卻「避雪」留前鬥後，打算後日（23日）才壓軸出場，以「35E導彈」狙擊雪雪！
一連七日的書展昨日正式開鑼，大批書迷為搶購心頭好不惜凌晨排隊等入場，各式各樣的寫真集成為一眾宅男的頭號獵物，當中以入行十年、初度開封33C上圍的34歲無綫小花孫慧雪，所影的大解放噴血寫真最為矚目，昨日她亦露香肩到書展宣傳谷銷量，引來幾十位粉絲逼爆攤位，雪雪喜出望外說：「之前搞咗兩次簽名會，以為要嚟o既人都嚟咗，點知仲有咁多人支持，多謝！（今日露肩性感咗喎！）係呀，啲記者叫我唔好太密實，好我就露個膊頭啦。（下次再性感啲？）睇情況靚都可以o既。」雪雪透露今次印了約三千多本，暫時賣了逾半，暫決定不再加印。
準備搶眼戰衣
對於o靚模姚紫茵聲稱有老闆及契爺包起五千本，雪雪笑說：「我冇老闆同契爺，都係靠Fans買！」她又表示出寫真後多了不少要求她性感的工作，但她盡量不接：「我想澄清我唔係專行性感，我係演員，如果有適合角色我都OK。（泳衣內衣都OK？）要睇吓，真係要同Fans講唔使擔心，我唔係轉行性感。（有冇泳衣騷搵你？）推咗三個，冇諗損失咗幾多錢，一問我就話唔接，未問幾錢，希望密實番啲。」她又透露最近騷價有增加，笑言是客戶主動加碼。
昨日有超過十個大大小小的寫真書簽名會，不過，名媛諸葛紫岐旗下藝人、今年寫真戰中的「巡航導彈」35E莊端兒，未知是否因同一攤位賣寫真的雪雪「峰」芒畢露，選擇「避雪」暫不露面。據知，她打算後日（23日）才壓軸出場，誓要在當日獨領風騷。至於其寫真集亦極度吸睛，超過十二、三個造型，有七套性感泳衣，大騷招牌四吋事業線！除了烏身、剝衫等火辣甫士外，又有着住泳衣洗車洗到成身泡，又有戴住鑽飾、以超低胸晚裝在遊艇豪「讓半球」的造型，性感高貴，簡直搏到盡！
莊端兒對於在書展第四日才「壓軸登場」搞簽名會，笑言自己抽到好籤，不會太遲：「假期咪仲多人，我聽日（即今日）會去書展行吓睇反應。（點突圍？）老闆（諸葛紫岐）好好，親力親為，幫我揀咗件好性感、好Sharp嘅戰衣去，啲人一望就見到我。（叫齊公司啲人嚟撐場？）要睇吓佢哋個期，我Fans club都有過百人會支持。（今年書展邊個係勁敵？）今年雪雪、崔碧珈都好靚，但都唔係勁敵，係百花齊放，我同雪雪仲係同一個攤位，所以唔覺得係打對台，而係互相支持，最好啲粉絲個個都支持啦。」
張致恒唔開心
至於莊端兒男友張致恒，對於女友推出火辣寫真集，身在內地雲南工作的他已從不同媒體看過女友的寫真靚相：「唔使畀我睇都睇晒（唔驚女友畀人睇蝕？）梗係怕，做男友最驚女友畀人睇，我都冇得講啲咩，佢有佢工作同事業，冇計，自己匿埋一邊唔開心囉。」
文：影視組
|
鍾意就快D Share啦！
|
|
|
